Read Hmar INṬANNA 37 Bible Online

INṬANNA 37 - Hmar bible

INṬANNA 37

¹Jakob chu a pa khuolchâmna Kanaan rama chun a um ta a.

²Hieng hi Jakob thlahai chu an nih: Josef chu kum sâwmpasari a niin a uhai, a pa nuhmeihai Bilha le Zilpah naupasalhai leh ran ruol an inthla a. Josef chun an suol thukhawchâng chu a pa kuomah ân tlun a.

³Chun, Israel chun Josef chu a tar tieng nau a ni leiin a nauhai po po nêk chun a hmangai lem a; chuongchun, zakawfuol rawng tamtaka ṭiel a siempêk a.

⁴An pa chun ama chu a uhai po po nêkin a hmangai lem ti a unauhaiin an hriet chun ama chu an theida ta hle a, ṭawngbau ṭha hrim a chungah an rawl thei ta naw a.

⁵Chun, Josef chun mang a nei a, a uhai kuoma a hril chun ama chu an theida zuol ta a.

⁶Ama chun an kuomah, “Lunginsiettakin ka mang thu hi lo ngai ro:

⁷ngai ta u, loa hin buphalhai ei lo intêl a, ngai ta u, ka buphal chu a hung tho a, a ngîr ta a; in buphalhai chun an hung inhuol a, ka buphal chu chibai an bûk tâwl a,” a ti a.

⁸A uhai chun a kuomah, “Nang tehin kan chungah ro i rêl vei ding maw? Nang tehin kan chungah thu i nei vei ding maw?” an ti a. Chuongchun, a mang lei le a thuhril lei chun ama chu an theida nâwk zuol det a.

⁹Chun, mang dang a nei nâwk a, a uhai chu a hril nâwk a, “Ngai ta u, mang ka nei nâwk a, nisa, thla le arasi sâwmpakhat khin chibai an mi lo bûk chu tie,” a ti a.

¹⁰Chun, a pa chu a hril a, a uhai khawm; chun, a pa chun a kâwk a, a kuomah, “Mang i nei hi ieng mang am a ni lie? Kei le i nu le i uhai hin hnuoi sikin chibai kan bûk hlak ding che am a nih?” a ti a.

¹¹Chun, a uhai chun ama chu an îtthîk a, a pa ruok chun a thuhril chu lungrilin a vawn zing a.

¹²Chun, a uhai chu Sekema chun an pa ran ruol chu inthlain an fe a.

¹³Israel chun Josef kuomah, “I uhaiin Sekemah a ni maw ran ruol chu an inthla? hung ta, an kuomah tir ka ti che,” a ti a. Ama chun, “Mi tir ta la,” a ta.

¹⁴A pa chun a kuomah, “I uhai an dam am, ran ruol khawm an dam am va en la, an chanchin mi hung hril nâwk raw aw,” a ti a. Chuongchun, Hebron ruoma inthawk chun a tir suok a; ama chun Sekem chu a va tlung ta a.

¹⁵Chun, mi tuin amanih phûla ân vâk ân vâk lai chun a hmu a; chuongchun, mi chun, “Iengam i zawng leh?” tiin ân dawn a.

¹⁶Ama chun, “Ka uhai ka zawng a nih: lunginsiettakin ran ruol an inthlâna chu mi hril ta khai,” a ti a.

¹⁷Mi chun, “Hitaka inthawkin an suok kha tie, ‘Dothanah fêng ei tiu,’ an ti chu ka hriet,” a ti a. Chun, Josef chun a uhai chu a hnawt a, Dothana chun a va hmu a.

¹⁸Anni chun hlataka inthawkin an lo hmu a, an kâwl hnai a tlung hmain ama thatna ding thu an lo rawt ta a.

¹⁹“En ta u, mang neipa a hung saw.

²⁰Thaw ro, that ei ta, khur pakhatah thlâk ei tiu khai; chun, ‘Sain a se tah,’ ei ti el ding annâwm: chuongchun, a manghai chu iengtin am a um hre el ei tih,” an inti tâwl a.

²¹Reuben ruok chun chu chu a lo hrietin an kuta inthawk chun a sansuok a, “A that êm chu that nâwng ei tiu,” a ti a.

²²Reuben bawk chun a pa kuoma ṭhuoi nâwkna dinga an kuta inthawk chu a sansuok theina dingin, an kuoma chun, “Thisen chu insuo naw ro, thlalêra khura hin thlâk unla, kut chu a chunga hin thlâk naw ro,” a ti a.

²³Chun, Josef chun a uhai kuom a va tlung chun, ama chu a zakawfuol rawng tamtaka ṭiel a ihâk chu an lo hlîppêk a;

²⁴an ṭhuoi a, khurah an thlâk ta a: khur chu a ruok tui um nawna a nih.

²⁵Chun, bu fa dingin an hang ṭhung tâwl a; chun, an hang dâk a, Ismael inzinpâwl Gileada inthawk an sanghâwngseia riminhnik, thing hnai damdawi le murra phura Aiguptaa zu fe ding hunghai chu an hmu a.

²⁶Chun, Juda chun a unauhai kuomah, “Ei sang ei that a, a thisen suok ei ip chun iengam ṭhathnemna um a ta?

²⁷Thaw ro, a chungah kut thlâk lovin Ismael mihai kuoma sawn zawr el lem ei tiu; ama hi ei sang, ei tisa ngei a ni si a,” a ti a. A unauhai chun a thu chu an zâwm ta a.

²⁸Chun, Midian mihai sumdâwng an hung a; chuongchun, Josef chu khura inthawk chu an khai suok a, Ismael mihai kuoma chun Josef chu tangka sawmhniin an zawr ta a, anni chun Josef chu Aiguptaah an ṭhuoi ta a.

²⁹Reuben chu khura chun a hung kîra Josef chu khurah a lo um ta nawh ti a hmu chun a silfênhai a keithlêr a,

³⁰chun, a sanghai kuom tieng a kîr nâwk a, “Bawipu kha a um ta nawh, kei hi khaw tieng am fe tâng ka ti le aw?” a ta.

³¹Chun, Josef zakawfuol chu an lâk a, kêlchal an thata a thia chun zakawfuol chu an inchie a.

³²Chun, zakawfuol chu an inphur a, an pa kuoma chun an hung chawi a, a kuomah, “Hi hi kan hmu ringawt a, i naupa zakawfuol a ni am a ni naw en ta,” an ti a.

³³Ama chun a lo hriet el a, “Ka naupa zakawfuol a ni hi, sahrângin a se a ni hi aw, Josef chu keinawi nengin a um ni ngei a tih,” a ti a.

³⁴Chun, Jakob chun a silfênhai a keithlêr a, saiip puon a dierkei a, ni sâwttak a naupa chu a sûn a.

³⁵A naupasalhai po po le a naunuhmeihai po po chu ama thlamuon dingin an tho a; nisienlakhawm, ama chun thlamuon a nuom naw a, “Ni lo, lusûn pumin thlânah ka naupa kuomah ka fe ding a nih,” a ti a. Chuongchun, a pa chu ama ngaiin a ṭap hlak a.

³⁶Chun, Midian mihai chun Josef chu Aiguptaah Pharao hnuoia hotu pakhat, vêngtu pâwl hotu Potiphar kuoma chun an zâwr a.