Read Hmar INṬANNA 38 Bible Online

INṬANNA 38 - Hmar bible

INṬANNA 38

¹Chuong lai chun hieng hi a ni a, Juda chu a unauhai laia inthawk chu a fe thla a, Adullam mi pakhat a hming Hira chu a zu bêl a.

²Juda chun chutaka chun Kanaan mi pakhat a hming Sua naunu a hmu a, ama chu a neia a pâwl ta a.

³Chuongchun, ân rai a, naupasal a nei a; chun, Juda chun a hmingah Er a sak a.

⁴Chun, ân rai nâwk a, naupasal a nei nâwk a; chun, a nuin a hmingah Onan a sak a.

⁵Chun, naupasal a nei nâwk a, a hmingah Selah a sak a: chu chu a nei lai chun Juda chu Chezib-ah a um a.

⁶Juda chun a nau lutîr Er chu nuhmei a neipêk a, a hming chu Tamar a nih.

⁷Nisienlakhawm, Juda nau lutîr Er chu LALPA mithmuah mi suol a ni a, LALPAIN ama chu a sukhlum ta a.

⁸Chun, Juda chun Onan kuomah, “I u nuhmei chu pâwl la, pasalhai unau thaw ding chu thawpêk la, i u ta ding chun chi thlapêk rawh,” a ti a.

⁹Nisienlakhawm, Onan chun chithla ding chu ama thla a ni naw ding a nih ti a hriet a; chuongchun, a u nuhmei a pâwl po leh a u ta dinga chi thlapêk lo dingin a chi chu hnuoiah a sukthlâk hlak a.

¹⁰A thilthaw chu LALPA mithmua chun suoltak a nih; chuleiin, ama khawm chu a sukhlum ta a.

¹¹Juda chun a monu Tamar kuoma chun, “Ka naupa Selah hi a puitling hmakhat chu i pa in tieng pasal nei lovin lo um phawt rawh,” a ti a. “Chuong naw chun ama khawm hi a uhai angin thi rawi a tih,” a ti a nih. Chuongchun, Tamar chu a pa in tieng chun a va um ta a.

¹²Chun, a nakie chun Sua naunu, Juda nuhmei chu, a thi a; chun, a ngai a hung bo a, Timnaa berâm hmul vawtuhai kuom tieng chun ama le a ruolpa Adullam mi Hira chu an hang fe a.

¹³Chun, Tamar chu, “I tarpupa chu a berâm hmul vaw dingin Timnaah a hang fe ding a nih,” tiin an hril a.

¹⁴Ama chun a pasal sûnna silfênhai chu a hlîp a, inkhumna puonin ân khum a, ân tuom tlat a, Timna lampuia Enaim kul kawtkhâra chun a lo ṭhung a: Selah chu a puitling ta si a, a pa chun a nuhmei dingin ân neitir naw zo a ni tah ti a hriet si a.

¹⁵Chun, Judain ama chu a hmuin nawchizawr amanih a sâwn a, a hmai chu ân khum tlat si a.

¹⁶Chuongchun, lampui sîra nuhmei tieng chu a va pan a, “Hung ta, lunginsiettakin zâl hmunkhat ei tih,” a ta; a mo kha a nih ti a hriet si naw a. Ama chun, “I mi zâlpui chun iengam mi pêng i ta?” a ti a.

¹⁷Ama chun, “Ran ruol laia kêlte inphur ka ti che,” a ti a. Chun, ama chun, “Chu chu i mi hung inphur hmaa lo hrên ding iemani bêk i mi pêk ding?” a ti a.

¹⁸Ama chun, “Hrên ding ieng am pêng ka ti che a?” a ta. Amanu chun, “I hming namna le i hrui, i hmawl chawi le khan,” a ti a. Chuongchun, a pêk a, a zâlpui ta a; chun, amaa inthawk chun nau a vawn ta a.

¹⁹Chun, a tho a, a inkhumna puon chu a hlîp a, a hmeithaina silfênhai chu ân bel nâwk ta a.

²⁰Chun, Judain a thil hrên chu nuhmei kuta inthawk la dingin a ruolpa Adullam mi kutah kêlte chu ân phur a, nisienlakhawm, ama chun a va hmu zo naw a.

²¹Chuongchun, nuhmei umna laia mihai kuoma chun, “Lampui sira Enaima nawchizawr um kha khaw lai am a um ta leh?” tiin ân dawn a. Anni chun, “Nawchizawr hrim hitaka hin an um naw ie,” an ti a.

²²Chuongchun, Juda kuoma chun a kîr nâwk a, “Ama chu ka hmu zo nawh, a hmuna mihai khawmin, ‘Nawchizawr hrim hitaka hin an um nawh,’ an lo ti bawk a,” a ta.

²³Juda chun, “Nei sawng el raw se, chuong naw chun muolpho rawi ei tih, en ta, hi kêlte hi kân phur a, ama i hmu zo si naw a,” a ti a.

²⁴Thla thum vêl amani hnunga chun Juda chu, “I monu Tamar chun tlangvâl a dit a, chunawa khawm, ngai ta, sâwn a pai nghe nghe annaw,” tia hril a ni a. Juda chun, “Ṭhuoi suok unla, raw hlumin um raw se,” a ti a.

²⁵Chun, an ṭhuoi suok chun Tamar chun, “Hi thil neitupaa inthawk hin a nih nau ka vawn chu,” tiin, a tarpupa kuoma chun mi a tir a; ama bawkin, “Lunginsiettakin hieng hming namna hai, hrui hai, hmawl hai hi tu ta am a nih en chieng ta khai,” a ti bawk a.

²⁶Juda chun chuong thil chu ama ta a nih ti a hriet a, “Ama chu keia nêkin a fel lem a nih, ama chu ka naupa Selah chu kân neitir ta si naw a,” a ti a. Chun, Juda chun ama chu a pâwl nâwk ta dêr naw a.

²⁷Chun, nauhain a se laiin, ngai ta, a sula chun inphîr an lo um a.

²⁸A nau pakhat chun a kut a hung pur dawk a; chuongchun, nau dawm mi chun, “Hi hi a suok hmasa lem a ni hi,” tiin a chel a, a kuta chun pat sen ân buntir a.

²⁹A kut chu a kei lût nâwk lai chun, ngai ta, a unau chu a hung suok ta a; chuongchun, nau dawmtu chun, “Iengdinga suokna ding insiem am i ni a?” a ti a, chuleiin, a hmingah Perez an sak a.

³⁰Chu hnunga chun a unau pat sen bun kha a hung suok ve a, a hmingah Zera an sak a.