Read Hmar INṬANNA 39 Bible Online

INṬANNA 39 - Hmar bible

INṬANNA 39

¹Josef chu Aiguptaah an ṭhuoi thlâk a; chun, Pharao hnuoia hotu pakhat, vêngtu pâwl hotu Aigupta mi Potiphar chun, chutaka hung ṭhuoi thlatu Ismael mihai kuta inthawk chun ân châwk a.

²LALPA chu Josef kuomah a um a; chuongchun, ama chu mi hlawtlingtak a hung ni ta a, a pu Aigupta mi ina chun a um a.

³A pu chun LALPA chu a kuomah a um a, a thilthaw taphawt LALPAIN a kutah ân hlawtlingtir ti a hmu a.

⁴Chuongchun, Josef chun a pu lunginsietna a hlaw a, ama rawngbâwltuah a um a; chun, ama chu a sûnghai chunga hotuah a siem a, a nei po po a kutah a sie ta vawng a.

⁵A inah hotuin a siem a, a nei po po chunga hotua a siem chena inthawk chu Josef leiin LALPA chun Aigupta mi sûng khat chu mal a sâwm ta a; in tieng le ram tienga a nei po po chu LALPAIN mal a sâwm a.

⁶Chuongchun, a nei po po chu Josef kutah a sie tlat a, a kuoma thil um hrim hrim chu a hrietpui dêr naw a, ama bufâk bak naw chu. Josef chu mi pien ṭhatak a ni a, a hmêl khawm a ṭha hle a.

⁷Chuong hnunga chun hieng hi a ni a, a pu nuhmei chun Josef chu dit enin a en a, “Mi zâlpui rawh,” a ti a.

⁸Ama ruok chu a nuom naw a, a pu nuhmei kuoma chun, “Ngai ta, ka pu chun hi ina hin ka kuomah ieng ieng am a um a hriet si naw a, a nei po po chu ka kutah a sie vawng a;

⁹hi ina hin keia nêka lien lem tukhawm an um naw a: a nuhmei i ni leiin nang bak naw chu ka ta dingin iengkhawm inro a nei bawk nawh: chuleiin, iengtin am hi suol lientak hi thawin Pathien chungah thil suksuol thei ka ti leh?” a ti a.

¹⁰Ni tinin Josef chu thlêm hlak sien khawm, ama zâlpui ding le ama kuoma um ding thu chu Josef chun a pawm nuom naw a.

¹¹Nisienlakhawm, ni khat chu, a sin chu thaw dinga in sûnga a va lût lai, chu ina mi tukhawm hrim an um naw lai chun,

¹²ama-nu chun, “Mi zâlpui rawh,” tiin a silfênah a lo man a; ama chun a silfên chu ama-nu kuta chun a tlânsan a, a suok ta dai a.

¹³Chun, a silfên chu a kuta mâksanin a tlân suok tah ti a hriet phingleh,

¹⁴ama-nu chun a ina umhai chu a ko a, an kuomah, “En ta u, a mi sukmuolpho dingin Hebrai mi pakhat ei kuomah a ṭhuoi lût ta hi; mi zâlpui tumin ka kuomah a hung lût a, chuongchun, râwl inringtakin ka khêk a;

¹⁵chun, râwl insuoin inringtakin ka khêk ti a hriet phingleh, ka kâwlah a silfên hi a tlânsan a, a suok ta dai a ni kha,” a ti a.

¹⁶Chun, Josef pu a hung hmakhat chu a silfên chu a kâwlah a lo sie zing a.

¹⁷A kuomah chu thu bawk chu a lo hril a, “Hebrai siehlaw ei kuoma i hung ṭhuoi kha, mi sukmuolpho tumin ka kuomah a hung lût a:

¹⁸chun râwl insuoa ka khêk phingleh, ka kâwlah a silfên hi mâksanin a tlân suok a nih,” a ti a.

¹⁹Josef pu chun a nuhmeiin a kuoma, “I siehlaw hin hieng ang hin a mi thaw,” ti a hril chu a hriet chun, a lunginsen ta thut a.

²⁰Chuongchun, Josef pu chun ama chu a ṭhuoi a, intângna in, lal mi intâng khuopa an umnaa chun a khum a, chuongchun, chutaka intângna ina chun a um ta a.

²¹Nisienlakhawm, LALPA chu Josef kuomah a um pei a, a chungah za a ngai a, intângna in vêngtu khawm ân lunginsiettir a.

²²Chuongchun, intângna in vêngtu chun intângna ina intânghai po po chu Josef kutah ân kawltir ta vawng a; chuongchun, chutaka an thaw taphawt chu Josef chu a thawtu a ni pei hlak a.

²³LALPA chu Josef kuomah a um a, a thilthaw taphawt LALPA chun ân hlawtlingtir hlak leiin intângna in vêngtu chun a kuta thil um hrim hrim chu ama ngaisak ṭûl a ti ta naw a.