Read Hmar INṬANNA 41 Bible Online

INṬANNA 41 - Hmar bible

INṬANNA 41

¹Chun, kum hni zet hnungah Pharao chun mang a nei a: Nile vadung panga hin a lo ngir a.

²Bâwngpui pasari naltak tak, thâutak tak tuia inthawka hung suok a, phairuong laia tla hi a hmu a.

³Chun, bâwngpui dang pasari bertak tak, chêrtak tak hi tuia inthawk bawka an hnunga hung suok ve chu a hmu a, bâwngpui danghai kâwlah vadung panga chun an lo ngîr a.

⁴Chun, bâwngpui bertak tak, chêrtak tak chun bâwngpui naltak tak, thâutak tak chu an fâk zo el ta a. Chun, Pharao chu a ṭhanghar ta a.

⁵Chun, a hang in nâwk a, mang a nei nâwk chun, bu kûng khata hin vui sari lientak tak, ṭhatak tak an hung suok a.

⁶Chu hnunga chun vui sari chitê te khawsak thliin a mût ṭâwl bir berhai chu an hung suok nâwk a.

⁷Chun, vui chitê têhai chun vui sari lientak tak, ṭhatak takhai chu an lem zo el ta a. Chun, Pharao chu a ṭhang a, a mang a lo ni zing el ti a hriet a.

⁸Chun, zîngtieng chun a lunginzîng ta hle el a; chuongchun, mi a tir a, Aigupta rama mitvaidawithiem po po le mivar po po chu a ko a; Pharao chun a mang chu a lo hril tâwl a: nisienlakhawm, Pharao hrilfie thei tukhawm an um naw a.

⁹Chun, uoin pe hotu tak chun Pharao kuomah, “Vawisûn hin ka suksuolzie ka hriet suok tah:

¹⁰Pharao a siehlawhai chungah a lunginsen a, vêngtu pâwl hotu ina chun kei le bei siem hotu tak chu a mîn tângtir a;

¹¹Chun, kei le ama chun zân khatah mang kan nei a, mang umze tum ve ve a nih kan nei chu.

¹²Chutaka chun kan kuoma vêngtu pâwl hotu siehlaw, Hebrai mi, tlangvâl pakhat a um a: ama chu kan hril a, ama chun kan manghai chu a mi hril a, kan mang ang dungzui pei chun a mi hrilfiepêk ve ve a.

¹³Chun, a mi hrilfie ang tak chun a hung um ta ngei a nih: kei chu ka sinthaw hi a mîn thawtir nâwk a, ama chu a khaihlum ta a,” a ti a.

¹⁴Chuongchun, Pharao chun Josef chu ân kotir nghâl ta a, inhmawtakin ripa inthawk chun an ṭhuoi suok ta a; chun, ama chu ânvaw fai a, a silfên chu a thleng a, Pharao kuomah a hung lût a.

¹⁵Chun, Pharao chun Josef kuomah, “Mang ka nei a, a hrilfie thei tukhawm an um naw a, nangin mang hi a thu i hriet chun i hrilfie thei ti i chanchin mi hril ka lo hriet a,” a ti a.

¹⁶Josef chun Pharao chu a dawn a, “Chu chu keimaa um a ni naw a, Pathienin Pharao chu thlamuongthlâktakin dawn lem a tih,” a ti a.

¹⁷Chun, Pharaoin Josef kuomah, “Ngai ta, ka manga chun Nile vapanga hin ka lo ngîr a,

¹⁸bâwngpui pasari naltak tak, thâutak tak hi tuia inthawk chun an hung suok a, phairuong lai hin an lo tla a:

¹⁹chun, bâwngpui dang pasari bertak tak, chêrtak tak le inthirtak tak, chuong ang hrima sie Aigupta ram po poa khawm ka la hmu ngai naw hi, an hnungah an hung suok ve a;

²⁰chun, bâwngpui bertak tak, chêrtak takhai chun bâwngpui pasari thâutak tak hung suok hmasahai chu an fâk zo el ta a.

²¹Amiruokchu, an fâk zo hnung khawm chun tu khawma an fâk ti an hriet chuong nawh, a phuta ang bawk khan an la ber zing a. Chun, ka ṭhang ta a.

²²Chun, ka manga chun bu kûng khata vui sari lientak tak, ṭhatak tak hung suok ka hmu bawk a;

²³chu hnunga chun vui sari vuoi sil sel, chite te, khawsak thli imût ṭâwl bir ber hi an hung suok nâwk a:

²⁴chun, vui chite tehai chun vui sari ṭhatak takhai chu an lem zo el ta a. Chun, mitvaidawithiemhai chu ka hril a, nisienlakhawm, a mi hrilfie thei tukhawm an um si naw a,” tiin a hril a.

²⁵Chun, Josef chun Pharao kuomah, “Pharao mang hi thuhmun a nih: Pathienin a thilthaw ding Pharao ân hriettir a ni chu.

²⁶Bâwngpui pasari ṭhatak takhai chu kum sari an nih, bu vui sari ṭhatak takhai khawm chu kum sari an ni bawk a; mang chu thuhmun a nih.

²⁷An hnunga bâwngpui pasari bertak tak, chêrtak tak hung suokhai chu kum sari an nih; bu vui sari a si ruok khawsak thli imût ṭâwl bir berhai khawm chu: chuong chu ṭâm kum, kum sari ding a nih.

²⁸Chu chu a nih Pharao kuoma ka hril kha: Pathienin a thilthaw ding Pharao ân hriettir a ni hi.

²⁹Aigupta ram sûng po poa hin hausakna nasatak kum sari a hung tlung ding a nih;

³⁰chu hnunga chun ṭâm kum, kum sari hung um nâwk a tih, chuongchun, hausakna po po kha Aigupta rama hin theinghil vawng ni tâng a tih; ṭâm chun ram hi fa se zo a tih:

³¹hausakna kha a zuitu ṭâm lei chun hi rama hin hre ta naw ni hai, a nasa hle ding a ni si a.

³²Chun, Pharao mang ân nei nawntirna che chu hi lei hi a nih, thil thaw ding chu Pathienin a sukdet a, Pathien bawkin ân tlungtir vak ding leiin.

³³Chuleiin, tuhin Pharao chun mi pakhat vartak, bengvârtak zawng suok sienla, Aigupta ram chunga hin hotuah inumtir raw se.

³⁴Pharaoin chu chu thaw sienla; chun, ram chunga hin hotuhai ruot sienla, hausak kum, kum sari sûng chun Aigupta ram bu hi hmun ngaa ṭhea hmun khat pei la khâwm raw hai se.

³⁵Anni chun chuong kum ṭhat kum hung tlung dinga bu po po chu Pharao thuneinain la khâwmin, fâk dingin khuoahai sung khâwmin vawng ṭha raw hai se.

³⁶Chuongchun, ṭâm leia ram hi a bohmang nawna dingin, bu chu ṭâm kum, kum sari, Aigupta rama hung tlung ding sûnga ding chun, hi ram ta ding hin inringlâwkna ding nîng a tih,” a ti a.

³⁷Chu thu chu Pharao le a siehlawhai po po chun ṭha an ti zâwng tak a ni a.

³⁸Chun, Pharao chun a siehlawhai kuomah, “Hieng ang, Pathien thlarau umna mi hi, ei hmu zo ding am a nih?” a ta.

³⁹Pharao bawk chun Josef kuomah, “Pathienin chuong po po chu ân hriettir che leiin, nang anga bengvâr le var hrim hi an um nawh:

⁴⁰nang hi ka sûnghai chunga hotuah um i ta, ka khuoletui po po i thu thuin um a tih: lalṭhungphaa ṭhung thua chau hin nanga nêkin inlal ka tih,” a ta.

⁴¹Pharao bawk chun Josef kuomah, “En ta, Aigupta ram sûng po poa hin hotuah ka siem che,” a ti a.

⁴²Chun, Pharaoin a kuta inthawkin a hming namna kutsebi chu a phawi a, Josef kutah ân buntir a, puon zai inhmia siem silfênhai ân hâktir bawk a, a rîngah rângkachak khaidiet ân hlîtir a;

⁴³Chun, a tawlailîr nei pahninaa chun ân chuongtir a, a hmaa chun, “Dingṭhaṭhuon[49] ro,” tiin an khêk pei a; chuongchun, Aigupta ram po po chunga chun hotuah a siem ta a.

⁴⁴Chun, Pharaoin Josef kuomah, “Kei Pharao ka nih, nanga thu naw chun Aigupta ram sûng po poa hin tukhawmin an kut amanih, an ke amanih inlet naw ni hai,” a ta.

⁴⁵Chun, Pharaoin Josef hmingah Zaphenath-paneah ân bûk a: On khaw thiempu Potiphera naunu Asenath chu nuhmeiah ân neitir bawk a. Chun, Josef chu a suok a, Aigupta ram chu a fang ta a.

⁴⁶Josef chu Aigupta lal Pharao hmaa a ngîr laiin kum sâwmthum mi a nih. Chun, Josef chu Pharao kuoma inthawk chu a suok a, Aigupta ram po po chu a fang suok ta a.

⁴⁷Chun, kum ṭhat kum, kum sari sûng chun hnuoi chun hlâwktakin bu an suo hlak a.

⁴⁸Aigupta rama kum ṭhat kum, kum sari hung tlunga bu po po chu a lâk khâwm a, bu chu khuohaia chun a sung khâwm ta a; khaw tinah a vêl lova bu seng chu a sung khâwm pei a.

⁴⁹Chuongchun, Josef chun bu chu tamtak, tuisuorieta phaiphin zâtin a sung khâwm rei rui el a, ân khi khawm chu a ma ta hiel a, inkhi sêng ruol a ni ta si naw a.

⁵⁰Ṭâm hung tlung hma chun Josef chun naupasal pahni a nei a, chuhai chu On khaw thiempu Potiphera naunu Asenath chun a neipêk a nih.

⁵¹Josef chun a nau lutîr hminga chun Manasse[50] a sak a, “Pathienin kân rimna po po le ka pa sûnghai chu a mîn theinghiltir ta si a,” a ta.

⁵²Chun, a nau pahnina hminga chun Ephraim[51] a sak a, “Pathienin ka rinum tuorna rama hin chi a mîn thlatir ta si a,” a ta.

⁵³Kum ṭhat kum, kum sari, Aigupta rama hung tlung chu a hung bo ta a.

⁵⁴Chun, ṭâm kum, kum sari chu Josef hril ang takin a hung tlung phut ve ta a: ram tinah ṭâm a hung tla ta a, Aigupta ram sûng poa ruok chun fâk ding a um a.

⁵⁵Aigupta rama mi po po chu an ṭâm phingleh Pharao kuomah fâk ding hniin an khêk a. Pharao chun Aigupta mi po po kuoma chun, “Josef kuomah fe unla, a hril taphawt cheu chu thaw ro,” a ti a.

⁵⁶Ṭâm chu ram po poa a hung tla phing chun Josef chun an sung khâwmna in po po chu a hawng a, Aigupta mihai kuoma chun a zawr a: Aigupta rama chun ṭâm chu a tla nasa hle a.

⁵⁷Chun, hnuoi chung po poa ṭâm chu a tlâk nasat hle leiin ram tina mihai chu bu inchaw dingin Aiguptaa Josef kuoma chun an hung a.