Read Hmar INṬANNA 46 Bible Online

INṬANNA 46 - Hmar bible

INṬANNA 46

¹Chuongchun, Israel chu a nei po po leh a suok a, Beer-seba chu a tlung a, a pa Isak Pathien kuomah inthâwinahai ân hlân a.

²Chun, Pathienin zâna a manghaia chun Israel chu a biek a, “Jakob, Jakob,” a ti a. Ama chun, “Hitaka hi ka um,” a ti a.

³Chun, ama chun, “Kei Pathien, i pa Pathien chu ka nih: Aiguptaa zu fe chu ṭi naw rawh: chutaka chun chi ropuitakah ka siem ding che a nih.

⁴Aiguptaa chun nang leh fe vêng ka ta; chun, zu ṭhuoi kai nâwk ngei ngei ka ti che: chun, Josef chun i thi pha i mit a siempêk ding che a nih,” a ti a.

⁵Chuongchun, Jakob chu Beersebaa inthawk chun a suok a, Israel naupahai chun an pa Jakob le an nauhai le an nuhmeihai chu chuongna dinga Pharao tawlailîr inphurhaia khan an inchuongtir a.

⁶Chuongchun, Jakob le a thlahai po po chun, Kanaana an them suok, an ranhai le an thuomhnawhai chu an sawm a, Aigupta chu an tlung ta a.

⁷Jakob chun a naupasalhai, a tupahai, a naunuhmeihai, a tunuhai, a thlahai po po chu, Aiguptaa chun a lûtpui tâwl ta a.

⁸Chun, hieng hi Israel thla Aiguptaa lût, Jakob le a naupasalhai hming chu a nih: Reuben, Jakob nau lutîr chu.

⁹Chun, Reuben naupasalhai chu: Hanok, Pallu, Hezron le Karmi.

¹⁰Simeon naupasalhai chu Jemuel, Jamin, Ohad, Jakin, Johar le Kanaan nuhmei le an naupasal Saula.

¹¹Levi naupasalhai chu Gerson, Kohath le Merari.

¹²Juda naupasalhai chu Er, Onan, Selah, Perez le Zera. (Er le Onan chu Kanaan ramah an thi tah). Perez naupasalhai chu Hezron le Hamul.

¹³Issakar naupasalhai chu Tola, Puva, Job le Simron.

¹⁴Zebulun naupasalhai chu Sered, Elon le Jahleel.

¹⁵Hienghai po hi Leah naupahai, a naunu Dina leh Paddan-aram rama Jakob a neipêkhai chu an nih: a naupasalhai le a naunuhmeihai po po chu sâwmthum pathum an nih.

¹⁶Gad naupasalhai chu: Ziphion, Haggi, Suni, Ezbon, Eri, Arodi le Areli.

¹⁷Aser naupasalhai chu: Imna, Isva, Isvi, Beria le an farnu Sera. Chun, Beria naupasalhai chu: Heber le Malkiel.

¹⁸Hienghai hi Labanin a naunu Leah a ipêk Zilpah naupasalhai chu an nih, hienghai hi Jakob a neipêk a, mi sâwmparuk an nih.

¹⁹Jakob nuhmei Rakil naupasalhai chu: Josef le Benjamin.

²⁰Josef chun Aiguptaah naupasal Manasse le Ephraim chu a nei a, chuhai chu On khaw thiempu Potiphera naunu Asenathin ama a neipêk a nih.

²¹Chun, Benjamin naupasalhai chu: Bela, Beker, Asbel, Gera, Naaman, Ehi, Rosh, Muppim, Huppim le Arda.

²²Hienghai hi Rakil naupasalhai Jakob a neipêkhai chu an nih; hienghai hi Jakob a neipêk a, an rêng chun sâwmpali an nih.

²³Chun, Dan naupa chu Husim.

²⁴Naphtali naupasalhai chu: Jahzeel, Guni, Jezer le Sillem.

²⁵Hienghai hi Labanin a naunu Rakil kuoma a pêk Bilha naupasalhai chu an nih; hienghai hi Jakob a neipêk a, an rêng chun pasari an nih.

²⁶Jakob naupasalhai nuhmeihai tiem lovin Jakob le Aiguptaa lût ve, a ṭhalbea suok po pohai chu, an rêng chun sâwmruk paruk an nih;

²⁷chun, Josefin Aiguptaa naupasal a neihai chu pahni an nih: Jakob sûnghai po po Aiguptaa lût chu sâwmsari an nih.

²⁸Gosen ram tieng lo khikhmu dingin Juda chu Josef kuomah Jakobin a lo in fe hmasatir a: chuongchun, Gosen rama chun an lût ta a.

²⁹Chun, Josef chun a tawlailîr chu a siemrêl a, Gosenah a pa Israel tuok dingin a hang fe a: chun, a kuomah ân hriettir a, a ir a suktuo a, sâwt fe a ir suktuoin a ṭap a.

³⁰Israel chun Josef kuomah, “Damin i la um a, i hmêl ka hmu nâwk ta lei hin tuhin chu nuom leh thi ta de ning,” a ti a.

³¹Josef chun a unauhai le a pa sûnghai kuomah, “Hang fêng ka ta, Pharao hril ka ta, a kuomah, ‘Ka unauhai le ka pa sûnghai, Kanaan rama umhai kha, ka kuom an hung tlung tah;

³²anni chu ran vaituhai an ni leiin berâm vêngtuhai an ni a, an berâm ruolhai le an bâwng ruolhai le an nei po po an hung sawm vawng a nih,’ tiin, hang hril ka tih.

³³Chun, Pharao chun a ko cheu a, ‘Ieng sin am in thaw hlak ?’ a ti pha cheu chun,

³⁴nangnîn, ‘I siehlawhai hi kan thlatuhai chenah naupang chite kan ni laia inthawk tu chen hin ran vaituhai kan nih,’ ti ro: chuongchun, Gosen ramah um thei in tih. Berâm vêngtu hrim hrim chu Aigupta mihai tirdak zâwngtak a ni si a,” a ti a.