Read Hmar INṬANNA 47 Bible Online

INṬANNA 47 - Hmar bible

INṬANNA 47

¹Chun, Josef chun Pharao chu a hang hril a, “Ka pa le ka unauhai, an berâm ruol dâm, an ran ruol dâm, an nei po po leh Kanaan rama inthawkin an hung tlung thla ta a: tuhin Gosen ramah an um,” a ta.

²Chun, a unauhai laia mi panga a ṭhuoi a, Pharao chu ân hrietttir a.

³Pharao chun a unauhai kuoma chun, “Ieng sin am in thaw a?” a ti a. Anni chun Pharao kuomah, “I siehlawhai hi kan thlatuhai chenah berâm vêngtuhai kan nih,” an ti a.

⁴Anni bawk chun Pharao kuomah, “Hi rama um phawt ding hin kan hung a nih: kan ramah i siehlawhai berâm ruolhai fâk ding a um ta si nawh, ṭâm hi Kanaan ramah a tla nasa hle si a; chuleiin, lunginsiettakin i siehlawhai hi Gosen ramah mîn umtir rawh,” an ti a.

⁵Chun, Pharao chun Josef a biek a, “I pa le i unauhai hi i kuomah an hung ta a.

⁶Aigupta ram chu a um duoi annâwm: i pa le i unauhai chu ram ṭhatna lailiah umhmun inkhuortir ta la, Gosen ramah umhmun khuor raw se; chun, anni laia mi thilthawtheitak hriet i nei lem chun ka ran chungah hotuah siem rawh,” a ti a.

⁷Chun, Josef chun a pa Jakob chu a ṭhuoi lût a, Pharao hmaa chun ân ngîrtir a: chuongchun, Jakob chun Pharao chu mal a sâwm ta a.

⁸Chun, Pharaoin Jakob kuomah, “Kum iengzat am i ni ta a?” a ti a.

⁹Jakob chun Pharao kuomah, “Ka khuol inzin kum chen chu kum za le sâwmthum a ni a, ka dam sûng kumhai hi a tlâwmin a rimsikthlâk a nih, a mi thlatuhai an khuol inzin laia an dam sûng kum khawm a zât ve bawk nawh,” a ti a.

¹⁰Chun, Jakobin Pharao chu mal a sâwm nâwk a, Pharao kuoma inthawk chu a suok ta a.

¹¹Chun, Josef chun a pa le a unauhai chu umhmun ân khuortir a, Pharao thupêk angin, Aigupta rama ram ṭhatak laia Rameses rama chun ro dingin ram a pêk a.

¹²Chun, Josef chun a pa le a unauhai le a pa sûnghai po po chu, an sûngkuo ang peiin fâk ding a pêk a, a châwm ta a.

¹³Chun, chu ram po poa chun fâk ding hrim a um ta naw a, ṭâm a tla nasa hle si a; chuongchun, ṭâm lei chun Aigupta le Kanaan ram chu a chau ta a.

¹⁴Josef chun an bu inchâwkna manah Aigupta ram le Kanaan rama tangka um po po chu ân khâwm pêk zo vawng ta a; chun, Josef chun chu tangka chu Pharao inah a hung chawi a.

¹⁵Chun, Aigupta ram le Kanaan rama tangka po po an hmang zo hnung chun Aigupta mi po po chu Josef kuoma chun an hung a, “Fâk ding mi pe raw khai, i hmaa hin kan thi el ding am a nih? tangka hlak a um ta si naw a,” an ti a.

¹⁶Chun, Josef chun, “In ranhai hung pe el ro, in ranhai manah fâk ding pêng ka ti cheu,” a ta.

¹⁷Chuongchun, an ranhai chu Josef kuomah an hung ṭhuoi a; Josef chun chuong sakawrhai, berâm ruolhai, bâwng ruolhai le sabengtunghai mana chun fâk ding a pêk pei a: chu kum chun an ran po po manah fâk ding a pêk a, a châwm tâwl ta a.

¹⁸Chu kum chu ân vawi a, kum a hung thar chun an hung nâwk a, a kuomah, “Pu, kan tangka po po kan hmang zo tâkzie le, kan ran ruolhai i ta a ni tâkzie hi, pu, i kuoma hin ip naw ning ungah: pu, i mithmua hin kan ramhai le kan tisa bak naw chu iengkhawm a um ta dêr naw a;

¹⁹i hmaa hin keini le kan ram hi kan bohmang el ding am a nih? Keini hi kan ram pumin fâk dingin mîn chaw rawh; chuongchun, keini le kan ram hi Pharao siehlawhai ni el kan tih: chun, thi loa dama kan um theina ding le, ram hi mâk a ni nawna dingin bu chi mi pe bawk la,” an ti a.

²⁰Chuongchun, Josef chun Pharao ta dingin Aigupta ram po po chu ân châwkpêk ta a; ṭâm chu an chunga a tlung nasa bêk leiin Aigupta mihai chun an lo chu an zawr si a. Chuongchun, ram chu Pharao ta a ni ta vawng a.

²¹Mihriemhai chu Aigupta ramri khingtieng tâwpa inthawka khingtieng tâwp chenin khuoahai chun ân tâwltir tâwl ta a.

²²Thiempuhai ram bak ân châwk naw a; thiempuhai chun Pharaoa inthawk chanvo an nei a, Pharaoin an chanvo a pêk chu an fâk hlak a nih: chuleiin, an ram chu an zawr ve naw a.

²³Chu hnunga chun Josef chun mihai kuoma chun, “Ngai ta u, vawisûn hin nangni hi in ram pumin Pharao ta dingin kân châwk ta cheu a, hi, hitaka hi in ta ding bu chi a um hi, hnuoiah chîng ro.

²⁴Chun, bu lâk pha chun Pharao ta dingin hmun ngaa ṭhea hmun khat pei pêng in ta, a hmun li chu nangni ta nîng a tih, in chîng nâwk ding, in fâk ding le in nau le tehai fâk dingin,” a ta.

²⁵Chun, anni chun, “Nangin kan hringna hi i sanhim ta a: pu, mi lunginsiet la, Pharao siehlaw ni el kan tih,” an ti a.

²⁶Chuongchun, Josef chun Pharaoin hmun ngaa ṭhea hmun khat a hmu pei ding thu hi, Aigupta ram ta dingin tu chen hin dânah a siem tah a: thiempuhai ram bak chu a nih Pharao ta ni lo chu.

²⁷Chuongchun, Israelhai chun Aigupta rama Gosen rama chun umhmun an khuor ta a; chutaka chun an insukmuk a, chi tamtak an thla a, nasatakin an pung ta a.

²⁸Chun, Jakob chu Aigupta rama chun kum sâwmpasari a um a; chuongchun, Jakob dam sûng kum chu kum za le sâwmli pasari a nih.

²⁹Chun, Israel thi hun ding chu a hung hnai ta a; chuongchun, a naupa Josef chu a ko a, a kuomah, “I mi lunginsiet thei chun, lunginsiettakin i kut kha ka êlpui hnuoiah rawl la, ka chungah thuzâwmtak le indiktaka thaw dingin intiem rawh. Aiguptaa hin mi phûm lul naw rawh.

³⁰A mi thlatuhai kuoma ka in pha chun nangin Aiguptaa inthawk hin mi zâwn dawkin, anni phûmna hmunah i mi phûm lem ding a nih,” a ti a. Ama chun, “I hril ang hin hung thâwng ka tih,” a ti a.

³¹Chun, ama chun, “Ka kuomah inkhâm raw le,” a ti a; chuongchun, a kuomah ân khâm ta a. Chun, Israel chu khum lu sikin a kûn ta a.