Read Hmar INṬANNA 48 Bible Online

INṬANNA 48 - Hmar bible

INṬANNA 48

¹Chun, chuong hnunga chun, Josef kuomah, “Ngai ta, i pa a dam nawh ie,” an ti a: chuongchun, a naupasalhai pahni, Manasse le Ephraim chu a ṭhuoi a.

²Chun, Jakob chu “Ngai ta, i naupa Josef chu i kuomah a hung ie,” tia an hril chun, Israel chu ân sukhar a, khuma chun a ṭhung ta a.

³Chun, Jakobin Josef kuomah, “Pathien Iengkimthawthei chu Kanaan rama Luz-ah ka kuomah ân lâr a, mal a mi sâwm a, ka kuomah,

⁴‘Chi tamtak inthlatir ka ti che a, sukpung bawk ka ti che a, chi tum tum um khâwmah siem ka ti che; chun, hi ram hi i hnunga i thlahai kuoma chun kumkhaw ro dingin pêng ka tih,’ a mi ti a.

⁵Chun, i naupasalhai pahni, Aiguptaa i kuoma ka hung hmaa i neihai hi, ka ta an nih: Ephraim le Manasse hi, Reuben le Simeon ang bawkin ka ta nîng an tih.

⁶Anni hnunga nau i neihai chu i ta nîng an ta, an ro chana chun an uhai hming chu inṭâwmpui el an tih.

⁷Chun, keia thu chu, Paddanaram rama inthawka ka hung lai khan Rakil chu Kanaan ramah, lampui kârlakah, Ephrath chu a la hlat fe laiin, ka bulah a thi a: chutaka Ephrath lampuia chun ka phûm ta a (chu chu Bethlehem a nih)” a ti a.

⁸Israelin Josef naupahai a hmu chun, “Hieng hi tuhai am an ni a?” a ti a.

⁹Josef chun a pa kuomah, “Hieng hi ka naupasalhai, Pathienin hitaka a mi pêkhai chu an nih,” a ti a. Ama chun, “Lunginsiettakin ka kuoma hin hung ṭhuoi rawh, anni chu mal lo sâwm ka tih,” a ti a.

¹⁰Israel chu a upat leiin a mit ân thim taa, a hmu fie thei naw a nih. Chun, a hung ṭhuoi hnai a; chun, ama chun a lo fâwp a, a lo pawm a.

¹¹Israel chun Josef kuomah, “I hmêl hmu hi ka beisei ta naw a, nisienlakhawm, ngai ta, Pathienin i thlahai hmêl chen khawm a mîn hmutir tah a ni hi,” a ti a.

¹²Chun, Josef chun anni chu a pa mal kâra inthawk chun a kei suok a, ama chu hnuoi sikin chibai a bûk a.

¹³Josef chun an pahni chun a kei a, Ephraim chu a kut changtiengin Israel kut vawitieng pangah, Manasse chu a kut vawitiengin Israel kut changtieng pangah a hung ṭhuoi hnai a.

¹⁴Nisienlakhawm, Israel chun a ban inkal ṭâl a, a kut changtieng chun a ban a, a naupang lem Ephraim lusîpah, a kut vawitieng chu Manasse lusîpah ân nghat a, Manasse chu nau lutîr a ni si a.

¹⁵Chun, Josef chu mal a sâwm a, “A mi thlatu Abraham le Isak a hmaa an umna hlak Pathien, vawisûn chena ka dam sûng po poa mi châwmtu Pathien,

¹⁶suol po poa inthawka a mîn tlantu vântirko chun naupanghai hi malsâwm raw se; chun ka hming le a mi thlatu Abraham le Isak hming chu anni hmingah put raw se: chun, hnuoia hin mipui nasatak hung ni dingin hung pung raw hai se,” a ti a.

¹⁷Josef chu a pain a kut changtieng Ephraim lusîpa ân nghat a hmu chun a lungni ta naw a; chuongchun, a pa kut Ephraim lusîpa chu Manasse lusîpa tâwl dingin a dawm kâng a.

¹⁸Chun, Josefin a pa kuomah, “Pa, hieng ang ding hi a ni nawh, hi hi a nih nau lutîr chu, i kut changtieng hi a lusîpah innghat lem rawh,” a ti a.

¹⁹Nisienlakhawm, a pa chun a nuom naw a, “Ka hriet deh, ka naupa, ka hriet, ama khawm hnama hril khawpin um a ta, ama khawm ropui bawk a tih; amiruokchu, a sang hi ama nêkin ropui lem a ta, a thlahai khawm hi chi tum tum tamtak la hung nîng an tih,” a ta.

²⁰Chuongchun, chu ni chun anni chu mal a sâwm a: “Israelhai chun, ‘Ephraim le Manasse angin Pathienin inumtir raw se che,’ tiin, nangni hming sâlin mal la sâwmpêk hlak an tih,” tiin. Chuongchun, Ephraim chu Manasse hmaah ân umtir ta a.

²¹Chun, Israel bawk chun Josef kuomah, “Ngai ta, ka thi ding a ni ta a: nisienlakhawm, Pathien chu in kuomah um a ta, in thlatuhai rama chun ṭhuoi nâwk a ti cheu.

²²Chu naw khawm chu i unauhai chanvo nêk chun chan khatin[52] ka pêk chuong che, ka kâwlhnâm le ka thalngula Amor mihai kuta inthawka ka lâkpêk kha,” a ti a.