Read Hmar INṬANNA 49 Bible Online

INṬANNA 49 - Hmar bible

INṬANNA 49

¹Chun, Jakobin a naupasalhai chu a ko a, a hril a; “Ni nuhnunghaia in chunga thil la tlung ding chu ka hril theina ding cheuin hung inkhâwm ro.

²Nangni Jakob naupasalhai, hung inkhâwm unla, ngai ro: In pa Israel thu hi ngai ro.

³Reuben, nang hi ka nau lutîr, Ka thilthawtheina, ka hrâtna ra hmasatak, Insângtakna le thuneitakna neitu i nih.

⁴Nisienlakhawm, tui anga det lo i ni a, Chunghnungtakna chu nei naw ti nih, I pa khumpui i kai leiin: Chun, chu chu i sukpawrche a, ka zâlnaah i kai kha.

⁵Simeon le Levi hi unau an nih: An kâwlhnâmhai chu thisen insuona hriemhrei an nih.

⁶Aw ka thlarau, nang chu an inrâwnnaa chun inrawl ve naw rawh: An lunginsenin mi an that a, An kâwmawnain bâwngchal tha an sat a.

⁷An lunginsenṭeuna chu ṭawngsephurin um raw se, a ṭium si a. An lung puom hlena chu ṭawngsephurin um raw se, a nunrâwng si a. Jakobrawihai lai chun anni chu thedar ka ta, Israelrawihai lai chun anni chu sukdar ka tih.

⁸Juda, nang chu i unauhaiin inpâk an ti che, I kut chu i râlhai rîngah innghat a ta, I pa naupasalhai chu i hmaah kûn an tih.

⁹Juda hi sakeibakneite a nih; Ka naupa, i sase chu i hang fesan ta a, A kûn a, sakeibakneichal angin a bawk a, Sakeibakneipui ang bawk siin, tuin am suktho ngam an ta?

¹⁰Lal hmawl chu Judaa inthawk hin bo naw ni a, Rorêltu hmawl chu a ke kâra inthawkin bo naw bawk a tih; A neitu takpa[53] a hung hmakhat chun; Hnam tinin ama thu awi an tih.

¹¹A sakawrte chu Grêp hruiah a thlung a, A sabengtungte chu grêp hrui ṭha miah a thlung bawk a. A silfên chu uoinah a sâwp a, A puon chu grêp thisenah.

¹²A mithai chu uoin suksenin um a ta, A hahai chu nenetui sukvârin.

¹³Zebulun hin tuisuoriet pangah umhmun khuor a ta, Lawngchâwlna vapang nîng a tih: A ramri chu Zidonah nîng a tih.

¹⁴Issakar hi sabengtung hrâttak, Berâm huong kâra bawk a nih:

¹⁵Châwlna chu ṭhain a hriet a, Ram chu inhawiin a hriet bawk a. Chuongchun, iengkhat put dingin a liengko chu a sukhnuoi a, Kuli sinthawin siehlawah a hung um ta a.

¹⁶Dan hin a mihai chu,ro rêlpêk a tih. Israel hnam pakhat ni vein.

¹⁷Dan hi lamliena rûl, Lampuia rûlriel, A chunga chuong a thala tla dêr khawpa Sakawr kea chuk hlaktu hi nîng a tih.

¹⁸Aw LALPA i sandamna chu ka nghâk zing.

¹⁹Gad hi râlin thâwng an ta, Nisienlakhawm, ama chun an kekhawng tieng thaw lem a tih.

²⁰Aser hi a fâk ṭhâng a ta, Lal tensietna suklang mi nîng a tih.

²¹Naphtali hi sazukpui insuo a ni a, Thu ṭhatakhai a hril hlak.

²²Josef hi kâu ra nuomtak a ni a, Tuikhur kâwla kâu ra nuomtak chu. A kâu nâwksâwnhai chun lung bang ân zâm khum a.

²³Thal kâphai chun ama chu nasatakin an sukrinum a, An kâp a, an suknawmna a:

²⁴Nisienlakhawm, ama thalngul chu ngartakin a um zing a, A kut thahai chu sukhrâtin a um a, Jakob Mihrât kut chun, (Chutaka inthawk chun berâm vêngtu, Israel lungpui chu a hung um a.)

²⁵I pa Pathien nangma ṭhangpuitu dinga, Iengkimthawthei, Chungtienga vân malsâwmnahai, Hnuoitienga bawk zing tui inthûktak malsâwmnahai, Nene le sul malsâwmnaa Nang malsâwmtu ding ngei sukhrâtin a um a.

²⁶I pa malsâwmpêkna hi, A mi thlatuhai malsâwmpêkna nêk hmanin, Chatuon tlâng tâwpkhâwk chenin a nasa ta lem a nih: Chuonghai chu Josef lua hin um a ta, A unauhaia inthawka suktuma umpa lusîpa chun um a tih.

²⁷Benjamin hi satene hnukinrawl a nih, Zîngkâr chun a sase chu fâng a ta, Zântieng chun a râllâk chu sem a tih,” tiin.

²⁸Chuong po po chu Israel hnam sâwm le hnam hni chu an nih; chun, hieng hi anni malsâwma an kuoma an pa thu hril chu a nih: an malsâwmna dawng ding ang peiin mal a sâwm seng a.

²⁹Chun, anni chu thuro a sie a, an kuomah, “Ka chipuihai kuomah ṭhuoiin ka um ve ding a ni tah. Hit mi Ephron loa pûka khan ka thlatuhai lai mi phûm ve ro,

³⁰chu pûk chu Kanaan rama Mamre zâwna[54] Makpelaa loa pûk, Abrahamin inphûmna hmun ro dinga Hit mi Ephron kuoma inthawka a lo puma a închâwk fâwm a nih, chutaka chun Abraham le a nuhmei Sara chu an phûm a:

³¹chutaka chun Isak le a nuhmei Rebeka chu an phûm a: chutaka bawk chun Leah ka phûm a,

³²lo le a sûnga pûk um chu Heth thlahaia inthawka inchâwk a nih,” a ti a.

³³Chun, Jakob chun a naupasalhai kuoma thuro a sie zo chun, a kehai chu khumah a hlângkai a, a thi ta a, a chipuihai kuoma chun ṭhuoiin a um ve ta a.