Read Hmar INṬANNA 50 Bible Online

INṬANNA 50 - Hmar bible

INṬANNA 50

¹Chun, Josef chun a pa hmai a sik a, a ṭa a, a fâwp a fâwp a.

²Chun, Josefin a siehlaw damdawi thiemhai chu a pa ruong chu hmawntheilova siem dingin thu a pêk a: chuongchun, damdawi thiemhai chun Israel ruong chu hmawntheilovin an siem a.

³A ruong siemna dingin ni sâwmli an aw a, hmawntheilova siemna chun ni chuong zât chu a aw hlak hrim a nih; chun, ni sâwmsari sûng zet Aigupta mihai chun ama sûnin an ṭap a.

⁴Chun, ama an sûn zo hnung chun Josefin Pharao sûnghai chu a biek a, “In mi lunginsiet thei chun, lunginsiettakin Pharao hrieta chun,

⁵‘Ka pain, ngai ta, ka thi ding a ni ta a, Kanaan rama ka thlân ka chosaah, chutaka ngei chun mi hung phûm rawh,’ tiin a mîn khâmtir a. Chuleiin, tuhin lunginsiettakin, ka pa hi mi hang inphûmtir la, chu zo chun hung nâwk el ka tih,'tia mi lo hrilpêk dingin ka ngên cheu a nih,” a ti a.

⁶Chun, Pharao chun, “Ân khâmtir ang che chun i pa chu hang phûm raw chu,” a ti a.

⁷Chuongchun, Josef chu a pa phûm dingin a hang fe ta a. Pharao siehlaw po po, a sûnghai laia upahai leh, Aigupta ram upahai po po le,

⁸Josef sûnghai po po leh, a unauhai leh, a pa sunghai chu ama leh an fe ve a. An nauhai rawi le, an berâm ruolhai le, an bâwng ruolhai bak chu Gosen rama chun an mâksan a.

⁹Anni ruol chun tawlailîrhai le, sakawr chung chuong mihai an hang fe ve a; pâwl ruol lientak an nih.

¹⁰Chun, Jordan râla Atad hrizâwl chu an tlung a, chutaka chun nasatakin an ṭa a, ni sari a pa sûnna a siem a.

¹¹Chu rama mi Kanaan mihai chun Atad hrizâwla an mithi sûn chu an hmu chun, “Hi Aigupta mihai mithi sûnna nasatak a ni hi,” an ti a; chuleiin, chu hmun hminga chun Abel-mizraim[55] an inbûk ta a, chu chu Jordan râla um a nih.

¹²Chun, a naupasalhai chun a thupêk ang peiin an thawpêk a,

¹³a naupasalhai chun Kanaan ramah an zâwn lût a, Abrahamin inphûmna hmun ro dinga, Hit mi Ephrona inthawka a lo puma a închâwk, Mamre zâwna Makpela loa pûka khan an phûm ta a.

¹⁴Josef chu a pa phûm zo chun ama le a unauhai le, a pa phûm dinga ama ruola hang fehai po po le chun Aiguptaah an kîr nâwk ta a.

¹⁵Josef unauhai chun an pa thi chu an ngaituoin, “Josef hin mi theidâng a ta, a chunga thil ei suksuol po po phuba kha ei chunga hin la hung la kim nek el a ti aw,” an ti a.

¹⁶Chuongchun, Josef kuoma hril dingin thu an incha a, “I pa chun a thi hma khan,

¹⁷‘Hieng ang hin Josef kuomah, Lunginsiettakin i unauhai bawsietna le an suolna chu ngaidam rawh, i chungah thil chu an suksuol dea chu, tiin hril ro,’ tiin thu a mi pêk a: tuhin, lunginsiettakin i pa Pathien siehlawhai bawsietnahai chu ngaidam rawh,” an ti a. Chuonga a kuoma an hang hril chun Josef chu a ṭap ta a.

¹⁸A unauhai khawm chu an va fe a, a hmaa chun an bawkkhup tâwl a, “Ngai ta, i siehlawhai kan ni hi,” an ti a.

¹⁹Josef chun an kuomah, “Ṭi naw ro, Pathien aiaw am ka nih?

²⁰Nangni chun ka chungah thil suol thaw in lungril a; nisienlakhawm, Pathien chun, vawisûna an um ang ngei hin, mi tamtak dama sanhimna dingin thil ṭhaa inchangtir a lo lungril lem a ni si a.

²¹Chuleiin, ṭi naw ro, nangni le in nau-le-tehai chu châwm pei ka tih,” a ti a. Chuongchun, a thlamuon a, bau ṭhatakin a biek tâwl a.

²²Chun, Josef chu ama le a pa sûnghai leh Aigupta rama chun a um a: Josef chu kum za le sâwm a dam a.

²³Josef chun Ephraim nau a tuhai khûp thum chen a hmu a, Manasse naupa Makir nauhai khawm Josef mal chungah an pieng a.

²⁴Chun, Josefin a unauhai kuomah, “Ka thi ding a ni ta a, nisienlakhawm, Pathienin hung kan ngei ngei a ti cheu a, hi rama inthawk hi hung ṭhuoi suok cheuin, Abraham, Isak le Jakob hai kuoma inkhâma pêk a tiem ramah ṭhuoi a ti cheu,” a ti a.

²⁵Chun, Josef chun Israel mihai chu ân khâmtir a, “Pathienin hung kan ngei ngei a ti cheu a, ka ruhai hi hitaka inthawkin khitieng in zâwn ngei ding a nih,” a ti a.

²⁶Chuongchun, Josef chu kum za le sâwm mi a niin a thi a; a ruong chu hmawntheilovin an siem a, Aiguptaah kuongin an sie ta a.