Read Hmar INṬANNA 7 Bible Online

INṬANNA 7 - Hmar bible

INṬANNA 7

¹Chun, LALPAIN Noa kuoma chun, “Nang le i sûnghai po po chu lawngah lût ro; nang chu tulai ṭhangthar lai hin ka mithmuin mi feltak i nih ti ka hriet che a nih.

²Sa thieng tinrêng laia mi, a chal le a pui seng, tuok sari pei le, sa thiengnaw laia mi, a chal le a pui seng tuok khat peiin ṭhuoi i tih.

³Chunglêng vate laia mi khawm, a pui le a chal seng, tuok sari peiin, hnuoi chung po poa chi thla dinga hring dingin i ṭhuoi ding a nih.

⁴Ni sari a la bâk a, chu hnunga chun hnuoi chunga hin ni sâwmli le zân sâwmli sûng ruo insûrtir ka ta; ka thilhring siem tinrêng hi hnuoi chunga inthawkin sukbohmang ka tih,” a ta.

⁵Chuongchun, Noa chun LALPAIN a kuoma thu a pêk ang pei chun a thaw ta a.

⁶Chun, hnuoia tui a hung lêt lai chun Noa chu kum za ruk mi a nih.

⁷Chun, tui a hung lêt ding a ni lei chun Noa chu lawnga chun a lût a, a naupasalhai le a nuhmei le a nauhai nuhmeihai khawm an lût ve a.

⁸Sa thieng laia mi le, sa thiengnaw laia mi le, vate laia mi le, hnuoia bawkinvâka lâwn tinrêng laia mi khawm,

⁹a pui le a chal a tuok peiin Pathienin Noa kuoma thu a pêk ang khan, Noa kuomah lawngah an lût ta a.

¹⁰Chun, ni sari hnunga chun hnuoia hin tui chu a hung lêt ta a.

¹¹Noa chu kum za ruk a ni kum, a thla hnina ni sâwm le ni sari niah, chu ni ngei chun tui inthûk lientak hnâr po po chu a hung pût ta vawng a, vân tukverhai khawm a hung inhawng ta bawk a.

¹²Chun, ni sâwmli le zân sâwmli sûng chu hnuoia hin ruopui nasatak a sûr ta a.

¹³Chu ni ngei chun Noa le a naupasalhai Sem, Ham, Japheth le Noa nuhmei chu lawnga chun an lût ta a, a naupasalhai nuhmei pathum khawm an kuomah an lût ve a;

¹⁴anni chu an lût a, ramsa tinrêng mâni chi um dân ang sengin, ran po po mâni chi um dân ang sengin, thilhring hnuoia bawkinvâka lâwn chi tinrêng mâni chi um dân ang sengin, vate tinrêng mâni chi um dân ang sengin, vate thla nei tinrêng chu an lût seng bawk a.

¹⁵Chuongchun, tisa po po hringna thuok nei taphawt chu a tuok peiin Noa kuomah lawnga chun an lût ta a.

¹⁶Chun, a lûthai chu Pathienin a kuoma thu a pêk angin, tisa nei laia mi tinrêng chu a pui le a chal a tuok peiin an lût a; chun, LALPAIN ama chu a khâr khum ta a.

¹⁷Chun, tui chu hnuoia hin ni sâwmli sûng po a lêt a, tui chu a hung pung a, lawng chu a hung lên kâng a, hnuoi chunga chun a chîm lâng pei ta a.

¹⁸Tui chu a hung um ta puou a, hnuoi chunga hin a hung pung rak el ta a, lawng chu tui chunga chun ân lâng pei a.

¹⁹Chun, hnuoi chunga tui chu a hung insâng tiel tiel a, vân hnuoia tlâng insânghai po po chu a chîm zo ta a.

²⁰Tawng sâwmpanga zeta insângin tui chu a hung um ta puou el a, tlânghai chu a tlum hmang ta dai a.

²¹Chuongchun, hnuoia taksa chângthei po po, vate dâm, ran dâm, sa dâm, thilhring hnuoi chunga bawkinvâka lâwn tinrêng dâm, mihriem po po leh an thi zo vawng ta a;

²²an hnâra hringna thlarau thuok umna po po, khawmuola um taphawthai chu an thi ta vawng a.

²³Chuongchun, hnuoi chunga thil hringna nei tinrêng, mihriem dâm, ran dâm, thilhring bawkinvâk chi dâm, chunglêng vate dâm, hnuoia inthawka sukbohmangin an um ta a: Noa le a kuoma lawnga umhai chau chu hlain an um ta a.

²⁴Chun, tui chu ni za le sâwmnga sûng po chu hnuoia hin a um ta puou el a.