Read Hmar INṬANNA 8 Bible Online

INṬANNA 8 - Hmar bible

INṬANNA 8

¹Chun, Pathienin Noa le lawnga a kuoma thilhring tinrêng le ran um po po chu a hriet zing a; chun Pathienin hnuoi chunga hin thli ân hrângtir a, chuongchun, tui chu a hung kang ṭan ta a,

²tui inthûktak hnarhai le vân tukverhai khawm chu a hung inkhâr ta a, vâna inthawka ruo hung sûr chu sukchâtin a um ta bawk a;

³chuongchun, tui chu hnuoi chunga inthawk chun a kang ta deu deu a, ni za le sâwmnga chu a bo hnung chun tui chu a tlâwm ta deu a.

⁴Chuongchun, lawng chu thla sarina, ni sâwm le ni sari nia chun Ararat tlânga chun a lo innghat ta a.

⁵Chun, tui chu thla sâwmna chenin a tlâwm deu deu pei a; thla sâwmna ni khat nia chun, tlâng sîphai chu a hung inlang ta a.

⁶Chun, ni sâwmli hnunga chun Noa chun lawng tukver a siem kha a hawng ta a:

⁷chun, vaâk pakhat ân vuong suoktir a; chu chu a suok a, hnuoia inthawka tui chu a kang zo hmakhat chu a vuong vêl a vuong vêl a.

⁸Chun, hnuoi chunga tui a tlâwm ta le tlâwm ta naw hrietna dingin vaṭhu ân vuong suoktir nâwk a;

⁹nisienlakhawm, vaṭhu chun fûkna ding hrim hrim a hmu naw a, a kuomah lawngah a kîr nâwk ta a, tui chu hnuoi chung po poa chun a la um si a; chuongchun, a kut a hang pur dawk a, a man a, lawng sûngah a kuomah a lâk lût nâwk ta a.

¹⁰Chun, ni sari dang a nghâk nâwk a, vaṭhu chu lawnga inthawk ân vuong suoktir nâwk a;

¹¹vaṭhu chu zântieng chun a kuomah a hung lût nâwk a; chun, ngai ta, oliv hna suktlawng hlim a hmûra chun a hung put a: chuongchun, Noa chun hnuoiah tui a tlâwm tah ti a hriet a.

¹²Chun, ni sari dang a nghâk nâwk a, vaṭhu chu ân vuong suoktir nâwk a; a kuomah a hung kîr nâwk ta naw a.

¹³Chun, a kum za ruk le a kum khatna, a thla khatna ni khat nia chun tui chu hnuoia inthawk chun a kang zo ta a: chuongchun, Noa chun lawng inkhumna chu a hâwk a, a en a; chun, ngai ta, hnuoi chung chu a lo inhil ta huou el a.

¹⁴A thla hnina ni sâwmhni le ni sari nia chun hnuoi chu a hung ṭâwl zo ta a.

¹⁵Chun, Pathienin Noa kuoma chun a hril a,

¹⁶“Lawnga inthawkin suok ro, nang le i nuhmei, i naupasalhai le an nuhmeihai leh.

¹⁷Tisa po po laia mi thil hringna nei tinrêng i umpuihai, vate dâm, ran dâm, thilhring hnuoia bawkinvâka lâwn tinrêng dâm le khan i kuomah ṭhuoi suok rawh, hnuoia hin te neiin chi tamtak thlaha an hung pung theina dingin,” tiin.

¹⁸Chuongchun, Noa chu a suok a, a naupasalhai le a nuhmei le a nauhai nuhmeihai khawm a kuomah an suok ve a;

¹⁹sa tinrêng dâm, thilhring tinrêng dâm, vate tinrêng dâm, hnuoi chunga chângthei taphawthai chu anni chi umdân ang sengin lawnga inthawk chun an suok ta a.

²⁰Chun, Noa chun LALPA ta dingin maichâm a siem a; chun, sa thieng tinrêng laia mi le, vate thieng tinrêng laia mi a lâk a, maichâma chun pumrawhmang thilinhlânhai ân hlân ta a.

²¹Chun, LALPAIN riminhnik chu a hriet a; chun, LALPA chun a lungrilin, “Hnuoi chu mihriem lei chun ṭawngsie inphur nâwk ta naw ning, mihriem lungril ngaituonahai chu an chîntea inthawkin a suol si a; tuta ka hrem ang hin thilsiem hringna nei tinrêng chu hrem nâwk ta ngai nâwng ka tih.

²²Hnuoi um sûng po bu tu le bu lâk, khaw dei le khaw lum, nipui le phalbi le, sûn le zân dâm hi bo naw nih,” a ta.