Read Hmar INṬANNA 9 Bible Online

INṬANNA 9 - Hmar bible

INṬANNA 9

¹Chun, Pathienin Noa le a naupasalhai chu mal a sâwm a, an kuomah, “Chi tamtak inthlain hung pung unla, hnuoi hi hluo sip ro.

²Nangni ṭîna le pawisakna hnuoia sa tinrêng le chunglêng vate tinrêngin nei an ta; chuonghai le hnuoia bawkinvâka lâwn po po le, tuipuia nga po pohai chu, in kuta pêk an ni vawng tah.

³Thilhring chângthei tinrênghai chu in ta dingin fâk ding nîng an ta; thlai hring ka pêk ang cheu khan iengkim ka pêk vawng cheu.

⁴Amiruokchu, sa a hringna (a thisen) pumin in fâk ding a ni nawh.

⁵Chun, in thisen, in hringna phuba chu la ngei ngei ka tih; sa tinrêng chunga chun lâng ka tih, mihriem kuoma inthawk khawmin, mi tin an unauhaia inthawk chun, mihriem hringna phuba chu la seng ka tih.

⁶Tukhawm mihriem thisen insuotu chu mihriem vêkin ama thisen chu an insuo ve ding a nih: Pathienin ama angpuiin mihriem a siem si a.

⁷Chun, nangni chu chi tamtak inthlain hung pung ro; hnuoia hin nau tamtak nei unla, a chunga hin hung pung ro,” a ta.

⁸Chun, Pathienin Noa le a kuoma um a naupasalhai kuoma chun,

⁹“Ngai ta u, keima ngeiin in kuoma le in hnunga in thlahai kuoma khawm ka thuthlung chu ka sukdet a nih;

¹⁰in kuoma thilhring tinrêng um, in umpui vate dâm, ran dâm, ramsa tinrêng kuoma dâm khawm; lawnga inthawka hung suok po po, hnuoia sa tinrêng kuoma chen khawm.

¹¹In kuomah ka thuthlung chu ka sukdet a; tisa po po tuilêta sukbohmangin um ta naw ni hai a, hnuoi sukse dingin tui lêt nâwk ta naw bawk a tih,” tiin a hril a.

¹²Chun, Pathien bawkin, “Hi hi kei le nangni le in kuoma thilsiem hringna nei tinrêng umhai kâra, suon tâwp lova um peihai ta dingin, ka thuthlung inchikna chu a nih.

¹³Sûmah ka sumrisâng kân zâmtir a, chu chu kei le hnuoi inkâra thuthlung inchikna ding nîng a tih.

¹⁴Chun, hieng hi nîng a ta, hnuoi chunga sûm kân zâmtirin sumrisâng chu sûma chun inlang a ta,

¹⁵kei le nangni le tisa po po laia thilsiem hringna nei tinrêng inkâra ka thuthlung hi hre zing ka tih. Chuongchun, tui chu tisa po po sukbohmang dingin hung lêt nâwk ta naw nih.

¹⁶Chun, sumrisâng chu sûmah inzâm hlak a ta; chuongchun, Pathien le hnuoi chunga tisa um po po laia thilsiem hringna nei tinrêng inkârah kumkhaw thuthlung um chu ka hriet zing theina dingin en hlak ka tih,” a ta.

¹⁷Chun, Pathien bawkin, Noa kuoma chun, “Chu chu kei le hnuoi chunga tisa um po po inkâra thuthlung sukdetna inchikna a nih,” a ti bawk a.

¹⁸Chun, Noa naupasal lawnga inthawka suokhai chu Sem, Ham, le Japheth an nih: Ham chu Kanaan pa a nih.

¹⁹Chuonghai pathum chu Noa naupasalhai an na: chuonghaia inthawka suokhai chun hnuoi po po hi an dâp zo tah a nih.

²⁰Noa chu hnuoi inlettu hmasatak a ni a, Grêp huon a siem a,

²¹uoin chu a dâwn a, ân rui a: chuongchun, a puon inah puon bovin a zâl a.

²²Chun, Ham, Kanaan pa chun a pa saruokna chu a hmu a, tuola a unauhai pahni chu a hril a.

²³Chuongchun, Sem le Japheth chun puon an lâk a, liengkoa inzâwnin hnungtâwlin an fe a, an pa saruokna chu an inkhum ta a; naw dang tieng an ngha a, an pa saruokna chu an hmu naw a.

²⁴Noa chu a uoin inrui chu a hung har a, a naupasal naupang takin a chunga a thawzie chu a hung hriet ta a.

²⁵Chuongchun, “Kanaan chu ṭawngsephurin um raw se; A unauhai siehlawhai siehlaw nîng a tih,” a ta.

²⁶“LALPA, Sem Pathien chu inpâkin um raw se. Kanaan chu Sem siehlawin um raw se

²⁷Pathienin Japheth chu suklien sienla, Sem puon inhaiah um raw se; Kanaan chu a siehlawin um raw se,” a ti bawk a.

²⁸Chun, Noa chu tuilêt hnung chun kum za thum sâwmnga a dam a.

²⁹Noa dam sûng po po chu kum za kuo le sâwmnga a na; chun a thi ta a.