Read Hmar 2 SAMUEL 13 Bible Online

2 SAMUEL 13 - Hmar bible

2 SAMUEL 13

¹Chun, David naupa Absalom chun farnu hmêl ṭhatak a nei a, a hming chu Tamar a nih. Chun, David naupa Amnon chun ama chu a hmangai a.

²Chuongchun, Amnon chu a farnu Tamar lei chun a buoi ta hle el a, a damnaw ta a; ama hlak chu nunghâk inthieng a ni si a; a chunga thil ieng amani hang thaw chu Amnon ta ding chun khirtak a nih.

³Amiruokchu, Amnon chun ruol a nei a, a hming chu Jonadab a na, David unaupa Simea naupa a nih; Jonadab chu mi var vervêktak a nih.

⁴Chun, a kuomah, “Aw, nang lal naupa hi a ni têla iengtiziea chêr tiel tiel am i ni a? I mi hril nuom naw ding am a nih?” a ta. Chun, Amnonin a kuomah, “Ka unaupa Absalom farnu Tamar hi ka hmangai tlat el a nih,” a ta.

⁵Chun, Jonadab chun a kuomah, “I khumah zâl zing la, damnaw tehlêm thaw la, chun, i pain a hung en pha che a kuomah, ‘Ka hni che a nih, ka farnu Tamar kha ka kuomah hung sienla, bei fâk ding mi hung pe sienla; chun, ka hmu theiah, ka mithmu ngeiah fâk ding mi buotsaipêk raw se; a kuta inthawk ngeiin lo fâng ka tih,’ lo ti raw khai,” a ta.

⁶Chuongchun, Amnon chu a zâl a, a damnaw tehlêm ta a; chun, lalin a va en chun Amnon chun lal kuomah, “Ka hni che a nih, ka farnu Tamar kha hung sienla, ka mithmu ngeia hin beiphêk pahni mi siempêk sienla, ama kuta inthawk ngei chun lo fâng ka tih,” a ta.

⁷Chuongchun, David chun Tamar kuoma chun, “I ṭapa Amnon in tieng fe la, fâk ding va siempêk raw khai,” tiin a inah mi a tir a.

⁸Chuongchun, Tamar chu a ṭapa Amnon in tieng chun a fe a; ama chu a lo zâl zing a. Chun, beihlawm chu a lâk a, a hmet a, a mithmuah beiphêk chu a siem a, beiphêkhai chu a em ta a.

⁹Chun, a emna chu a lâk a, a hmaa chun a bun a; nisienlakhawm, a fâk nuom naw a. Chun, Amnon chun, “Mi po pohai hin mi suoksan vawng raw hai se,” a ta. Chuongchun, ama chu an suoksan ta vawng a.

¹⁰Chun, Amnon chun Tamar kuoma chun, “I kuta inthawk ngeia ka fâk theina dingin fâk ding chu pindana hin hung la ta raw le,” a ta. Chun, Tamar chun a beiphêk siemhai chu a lâk a, a ṭapa Amnon kuomah pindana chun a lâk lût a.

¹¹Infâktir dinga a kâwl hnaia a va fe chun a lo man a, a kuomah, “Ka farnu, hung ta zâl ei tih,” a ta.

¹²Ama chun a dawn a, “Ni lo ve, ka ṭapa, mi thawlui naw rawh, Israelhai lai hin hieng ang thil hi thaw ding a ni naw ie, hi thil suol invêtthlâktak hi thaw naw raw khai.

¹³Chun, keiin ka muolphona chu khâwlai am fepui ka ta? Chun, nang khawm Israelhai lai hin mi invêta ngai i ni el ding i sawnnaw. Chuleiin, lal be lem raw khai, i mi nei chu sêl chuong naw nih,” a ta.

¹⁴Nisienlakhawm, a râwl chu a ngai naw a, ama nêkin a hrât lem si a, a thawlui a, a zâlpui ta a.

¹⁵Chuongchun, Amnon chun theida namênlovin a theida nâwk ta thung a, a theidana chu ama a hmangai laia a hmangaina nêka nasa lemin a nih a theida chu. Chuongchun, Amnon chun a kuomah, “Tho la, fe hmang dai rawh,” a ta.

¹⁶Chun, ama chun a kuomah, “Chuong ang ding chu a ni nawh, hienga indiknawtaka i mi tirhmang hi ka chunga i thil thaw ta nêk hman khan a ṭha naw lem a nih,” a ta. Nisienlakhawm, ama chun a ngai chuong naw a.

¹⁷Chuongchun, a rawngbâwltu a siehlaw chu a ko a, “Hi nuhmei hi ka kuoma inthawkin insuoktir la, kawt kal tlat rawh,” a ti a.

¹⁸Zakawfuol ze tum tuma ṭiel a hâk a, chuong ang zakawfuol chu lal nunghâk inthienghai chun an hâk hlak a. Chuongchun, a siehlaw chun a ṭhuoi suok a, kawt a kal ta tlat a.

¹⁹Chun, Tamar chun a lua chun vut a phul a, zakawfuol ze tum tuma ṭiel a hâk chu a keithlêr a, a lusîpah a kut a sui a, inringtaka ṭap malam peiin a fe ta a.

²⁰Chun, a ṭapa Absalom chun a kuomah, “I ṭapa Amnon chu i kuomah a hung lût a ni maw? nisienlakhawm, to el rawh, ka farnu, ama chu i ṭapa a ni annâwm, engto nuom naw rawh,” a ta. Chuongchun, Tamar chu a ṭapa Absalom ina chun ngûitakin ân khum ta tlat el a.

²¹Nisienlakhawm, lal Davidin chuong thil po po a hung hriet chun a lunginsen hle el ta a.

²²Chun, Absalom chun Amnon kuoma chun a sie a ṭha, iengkhawm a hril nuom naw a; Absalom chun a farnu Tamar chu a lo suollui lei chun Amnon chu a theida hle a nih.

²³Chun, kum hni pumhlûm a bo hnung chun Ephraim kâwla Baal-hazora chun Absalom chun berâm hmul ân vâwtir a; Absalom chun lal naupahai po po chu a fiel a.

²⁴Chun, Absalom chu lal kuoma chun a fe a, “Ngai ta, i siehlaw chun berâm hmul ân vâwtir a, lal le a siehlawhai chu a siehlaw kuoma hin fe ve hai sienla,” a ta.

²⁵Chun, lal chun Absalom kuomah, “Ni lo e, ka naupa, kan rêng chun fe naw ning ung, sukkhaw taluo rawi kan ti che,” a ta. Ama chun a fiel a fiel a, amiruokchu, a fe nuom chuong naw a, mal ruok chu a sâwm a.

²⁶Chuongchun, Absalom chun, “Annawleh, ka hni che hi, ka unaupa Amnon bêk kan kuomah hung raw se,” a ta. Chun, lal chun a kuomah, “Iengdingin am fe bîk a ta?” a ta.

²⁷Nisienlakhawm, Absalom chun Amnon le lal naupahai chu an rênga a kuoma fe ve dingin a ngênpêk ṭâl a.

²⁸Chun, Absalom chun a siehlawhai chu, “Ngai ta, Amnon chu uoin dâwna a hlim laiin in kuomah, ‘Amnon kha that ro,’ ka ti cheu chun that unla, ṭi naw ro, thu ka pêk ta cheu annâwm; insukhuoi unla, insukpasal ṭha unla,” tiin thu a pêk a.

²⁹Chuongchun, Absalom siehlawhai chun Amnon chunga Absalom thupêk ang chun an thaw a. Chuongchun, lal naupahai po po chu an tho a, an sabengtung lien chi chungah an chuong seng a, an tlân hmang ta a.

³⁰Chun, lampui kâra an la um laiin, “Absalomin lal naupahai po po a that ta vawng el a, pakhat khawm hla a nei nawh,” tiin David kuoma chun chanchin a hung tlung a.

³¹Chuongchun, lal chu a tho a, a silfênhai a keithlêr a, hnuoiah a zâl ta a; chun, a siehlawhai po po chu an silfênhai keithlêrin a kâwla chun an ngîr a.

³²Chun, David unaupa Simea naupa Jonadab chun a dawn a, “Ka pu hin lal naupasal tlangvâlhai po po chu an that vawng ti ring naw raw se, Amnon chau a thi a nih; a farnu Tamar a thawlui chena khan Absalom chun hieng anga thaw hi a tum hrim a nih.

³³Chuleiin, ka pu lal chun lal naupahai po po an thi amanih ti ringin, lung inhângpui naw raw se, Amnon chau a thi a nih,” a ta.

³⁴Absalom ruok chu a tlânhmang ta a. Chun, a râl vêngtu tlangvâl chun a mit a hang inlên a, a hang en a; chun, ngai ta, a hnungtienga tlâng panga lampuia chun mi tamtak an hung a.

³⁵Chun, Jonadab chun lal kuomah, “Ngai ta, lal naupahai chu an hung ie, i siehlawin a hril ang chie kha a ni ngei el,” a ta.

³⁶Chun, a hril zo phingle chun, ngai ta, lal naupahai chu an hung tlung a, an râwl insuo meuin an ṭap a; chun, lal khawm chu a siehlawhai le chun an ṭap ta rak rak el a.

³⁷Absalom ruok chu a tlânhmang a; Gesur lal Ammihur naupa Talmai kuomah a fe a. Chun, David chun ni tin hin a naupa chu a sûn hlak.

³⁸Chuongchun, Absalom chu a tlânhmang a, Gesur rama chun a fe a, chutaka chun kum thum a va um a.

³⁹Lal David chun Absalom kuoma fe chu ân hâwk êm êm a. Amnon chungchâng thua chun a thlamuong ta a, ama chu a thi ta si a.