Read Hmar 2 SAMUEL 22 Bible Online

2 SAMUEL 22 - Hmar bible

2 SAMUEL 22

¹Chun, David chun a hmêlmahai po po kuta inthawk le Saula kuta inthawk LALPAIN a sansuok ni chun hi hla thu hi LALPA kuomah a hril a;

²chuongchun, ama chun: “LALPA chu ka lungpui le ka kulpui le a mi sanhimtu a na, ka ta ngei a nih;

³Ka lungpui, Pathien ama chu ring ka ta, Ka phaw le ka sandamna ki, ka kulbîng insâng le kân humhimna a nih; Ka sandamtu, nangin inpâwngnêknaa inthawkin i mi sandam hlak.

⁴Inpâktlâk LALPA chu ko ka ta, Chuongchun, a mi dotuhaia inthawka sandamin um ka tih.

⁵Thina hung insawk chun a mîn huol vêl a, Pathien ngaisak nawna tuilien chun a mi suklau a.

⁶Seol hruihruolhai chun a mi khuop vêl a, Thina chânghai chun a mi âwk bawk a.

⁷Ka lunginzîngin LALPA chu ka ko a, Anih, ka Pathien chu ka ko hlak. Chun, ama chun a biekina inthawk chun ka râwl chu a hriet a, Chun, ka khêkri chu a naa chun a lût ta a.

⁸Chu phingle chun hnuoi hi ân hnîng a, ân thin ta a, A lunginsen leiin vân innghatna chenin ân hnîngin ân thin ta a.

⁹A hnâra inthawk chun meikhu ân tung ta ngut ngut a, A baua suok mei chun a kâng ta dur dur a; Chu chun meihawl khawm chu a sukchawk ta dur dur a.

¹⁰Ama chun vânhai khawm a sukkûn a, a ṭum ta a, A ke hnuoiahai chun inthim sâmup hi a hung um a.

¹¹Cherub chungah a chuong a, a vuong ta a, Anih, thli thlaahai chun an hmu a.

¹²Inthim chu ama inhuol vêlna bûktêah a siem a, Tuihai, vâna sûm sâmuphai chu fâwkkhâwmin,

¹³A hmaa varna lei chun, Meilinghai chu a chawk a.

¹⁴LALPA chu vâna khin a hung inri dur dur a, Achunghnungtak chun a râwl ân suo a.

¹⁵Chun, thalhai chu a kâp suok a, anni chu a sukdar a, Kâwl dâm ân leptir a, a sukbuoi ta a.

¹⁶Chu phingleh LALPA kâwkna leia, A hnâra inthuok suokin a mût rak lei chun, Leihnuoi innghatnahai chu suklangin a um ta a.

¹⁷Ama chun chung tienga inthawkin a hung ban a, a mi chel a, Tui tamtaka inthawk chun a mi hnûk dawk a.

¹⁸A mi dotu hrâttaka inthawk chun a mi sanhim a, A mi theidatuhaia inthawk leh, keia ta ding chun an hrât taluo si a.

¹⁹Anni chun ka vângsiet ni chun an mi hung thaw a, Nisienlakhawm, LALPA chu kân nghatna tak a nih.

²⁰Ama chun hmun inthâwltakah a mi ṭhuoi suok a, Ka chunga a lâwm leiin a mi lo sanhim tah a nih.

²¹LALPA chun ka felzie ang peiin ka chungah a thaw a, Ka kuthai ân thieng ang ngeiin a mi thung a nih.

²²LALPA lampuihai chu ka hraw a, Ka Pathien kuoma inthawk chun suoltakin ka fe hmang ngai si naw a.

²³A rorêlna po po ka hmaah a um hlak a, A thuruothai hlak chu ka nghatsan ngai si naw a.

²⁴A hmaa chun sawisêlbo ka lo ni a, Ka rîtlonaa inthawkin kân siekieng hlak.

²⁵Chuleiin, LALPA chun ka felzie ang peiin a mi lo thung ta a; A mithmua kân thiengzie ang peiin.

²⁶Mi lunginsiet theihai kuoma chun lunginsiet theitakin insuklang i ta, Mi ṭha famkimhai kuoma chun ṭha famkimin insuklang i tih.

²⁷Mi inthieng kuoma chun inthiengin insuklang i ta, Chun, mi kâwmaw kuoma chun kâwmaw angin insuklang i tih.

²⁸Rinum tuor mihai chu sandam i ta, Mi chapohai ruok chu i suktlâwm theina dingin an chungah i mit a fu zing a.

²⁹Aw LALPA, khâwnvar i ni si a; LALPA chun kân thimna hi sukvar a tih.

³⁰Nangma ṭhangpuiin râl ka hne a, Ka Pathien ṭhangpui bawkin kul kân châwmhlên a nih.

³¹Pathien chu a lampui a ṭha famkim a, LALPA thutiem chu ândikzie sukchieng a ni tah. Ama ringtuhai po po ta dingin ama chu phaw a nih.

³²LALPA naw chu tu am Pathien an um? Ei Pathien naw chu tu am lungpui an um a?

³³Pathien chu ka kulpui nghettak a na, Mi ṭha famkim chu a lampuiah a ṭhuoi hlak.

³⁴Ka kehai chu sazukpui ke angin a siem a, Ka hmun insângahai a mîn umtir hlak.

³⁵Ka kuthai hi râl kâp dingin ân chûktir hlak a, Chuongchun, ka bânhai hin dâr thalngul a kuoi zo hiel a.

³⁶Nangin i sandamna phaw chu i mi pêk bawk a; I înngaitlâwmna chun i mi siem lien tah.

³⁷Ka hnuoia ka kalchawina chu i suklien a, Chuongchun, ka kehai hi ân tleu naw a.

³⁸Ka hmêlmahai chu ka hnawt phâk a,ka sukbohmang a, Sukbohmang dêra an um hmakhat chun ka kîr nawh.

³⁹An tho nâwk thei nawna dingin ka sukbohmang dêr a, ka sât fik a; Anih, ka ke hnuoiah an tlu ta a.

⁴⁰Nangin inthawnaa ding chun ka taiah hrâtnain i mi hrên si a, A mi hung thawtuhai chu ka hnuoiah i tukdawl ta a.

⁴¹A mi theidatuhai chu ka sukbohmang theina dingin, Nangin a mi dotuhai chu mi hnunginnghatin în umtir ta bawk a.

⁴²An ngha vêl a, nisienlakhawm, sandamtu ding tukhawm an um naw a; LALPA ngei chu an hang en a, nisienlakhawm, a dawn si nawh.

⁴³Chu phingle chun hnuoia pilvut ang elin ka vuok phit a, Khawlai chirhak ang elin ka sukhmât a, ka sukdar ta a.

⁴⁴Nangin ka mihai innêkbuoinaa inthawk khawmin i mi sanhim ta a, Hnam tin luah i mi siem a. Ka hriet ngai naw hnam chun ka rawng an bâwl a.

⁴⁵Hnam danghai chu ka kuomah an inpêk a, Ka chanchin an hriet phingleh ka thu an zâwm a.

⁴⁶Hnam danghai chu an lungril a beidawng zo a, An kulbînghaia inthawk dâm chun inthin pumin hung suok an tih.

⁴⁷LALPA chu a hring zing a, ka lungpui chu inpâkin um raw se; A mi sandamna lungpui, Pathien chu chawimawiin um raw se.

⁴⁸Phuba mi lapêktu le, Hnam tin ka hnuoia tukdawltu Pathien ngei chu.

⁴⁹A mi dotuhaia inthawka a mi la suoktu, Anih, nangin a mi thawtuhai chungtieng chun i mi dawm kâng a; Mi nunsiea inthawk chun i mi sanhim hlak.

⁵⁰Chuleiin, aw LALPA, hnam tinhai lai chun lâwmthu hril ka ti che a, I hming inpâkin hla sak bawk ka tih.

⁵¹Ama chun sandamna ropuitak a lal a pêk hlak a; A hrieknâl chungah, David le a thlahai chung ngeia chun, Kumkhuoin a zainêmzie inlangtir a tih,” a ti a.