Read Hmar 2 SAMUEL 24 Bible Online

2 SAMUEL 24 - Hmar bible

2 SAMUEL 24

¹Chun, LALPA lunginsenna chu Israelhai chungah a ṭuong nawk ta thut a, “Fe la, Israel mihai le Juda mihai tiem vawng rawh,” tiin David chun an pawi tâwk dingin a chawktho a.

²Chun, lal chun a kuoma um sipai hotu Joab kuoma chun, “Israel hnam po po lai hin Dana inthawka Beer-Seba chenin invâk vêl la mi ieng zât am an ni ka hriet theina dingin tiem vawng ro,” a ta.

³Chun, Joab chun lal kuomah, “LALPA i Pathien chun mipuihai sukpungin, ieng zâta tam khawm, a lêt za khawm, lalpa ka pu a hin hmu hman raw se; nisienlakhawm, lalpa ka pu chun chu chu iengdinga hriet ân hâwk am a ni leh?” a ta.

⁴Nisienlakhawm, lal thu chun Joab le a sipai hotuhai chu a hne ta a. Chuongchun, Joab le a sipai hotuhai chu Israelhai tiem ding chun lal kuoma inthawk chu an suok ta a.

⁵Chun, Jordan râl an va kai a, chun, Gad ruom laitak changtieng panga khaw um Aroera chun Jazer chenin umhmun an khuor a;

⁶chun, Tahtim-hodsi le Gilead ram an tlung a; chun, Dan-jaan an tlung a, Zidon panin an fe pei a,

⁷chun, Tura kul dâm an va tlung a; chun, Hiv mihai le Kanaan mihai khuohai po po an tlung a, chun, Judai simtieng Beer-sebaah an fe a.

⁸Chuongchun, ram po po chu an fang suok hnung chun, thla kuo le ni sâwmhni zoah Jerusalemah an fe nâwk ta a.

⁹Chun, Joab chun mihriem zât chin chu lal a pêk a; chun, Israel rama chun kâwlhnâm chawi mi, mi huoisen nuoi riet an um a; chun, Juda mi chu nuoi nga an um a.

¹⁰Chun, mihriem an hang tiem zo chun David lungril chu a na ta hle el a. David chun LALPA kuomah, “Ka thilthawa hin nasatakin ka lo suol tah a nih; nisienlakhawm, tuhin aw LALPA, i siehlaw rîtlona hi sie hmang dingin ka ngên che, invêttakin ka lo thaw tah a nih,” a ta.

¹¹Chun, zîngkâra David a hang tho chun David zâwlnei, zâwlnei Gad kuomah LALPA thu a hung tlung a,

¹²“Fe la, David kuomah, ‘LALPAIN hieng ang hin a tih; thil kawng thum ka ruotpêk che a, i chunga ka thaw dingin pakhat thlang rawh,’ a ti a,” tiin.

¹³Chuongchun, Gad chu David kuomah a fe a, a kuomah, “I rama hin kum sari ṭâm hung tlâk am, i hmêlma hmaa an hnawt sûng che a, thla thum lo tlân hmang hri am, i rama ni thum hri hung inlêng? a mi tirtu ieng angin am ka dawn ding a na, inngaituo la, mi hril raw khai,” a ta.

¹⁴Chun, David chun Gad kuomah, “Ka lunginzîng hle el a, LALPA kutah tlulût phawt el lang; a zângaina chu a nasa hle si a; mihriem kuta chen chu mîn tlûklûttir naw hram rawh,” a ta.

¹⁵Chuongchun, LALPA chun Israel mihai lai chun zîngkâra inthawkin hun ruot ang chen chu hri ân lêngtir a, chuongchun, mipuihai laia mi chu Dana inthawka Beer-Seba chenah mi sîng sari an thi a.

¹⁶Chun, vântirkoin sukse dinga Jerusalem tienga a kut a hang inlet chun LALPAIN thil ṭha naw thaw a tum chu ân lêt a, mihai sukbohmangtu vântirko kuoma chun, “A hun ta ie, i kut inlet ta naw rawh,” a ta. Chun, LALPA vântirko chu Jebus mi Arauna hrizâwl bula chun a um a.

¹⁷Chun, Davidin mi sukhlumtu vântirko a hmu chun LALPA a biek a, “Ngai ta, ka lo suol ta a, indik nawtakin thil ka lo thaw tah a nih; nisienlakhawm, hieng berâmhai hin ieng thil am an thaw a? I kut chun keima le ka pa sûnghai mi tâwk lem raw se aw,” a ta.

¹⁸Chun, chu ni chun Gad chu David kuomah a fe a, a kuomah, “Hang fe la, Jebus mi Arauna hrizâwlah LALPA ta dingin maichâm hang siem rawh,” a ta.

¹⁹Chun, David chu LALPAIN thu a pêk anga, Gadin a hril ang chun a hang fe ta a.

²⁰Chun, Arauna chu a hei ngha a, ama tieng pana lal le a rawihai hung chu a hmu a, chuongchun, Arauna chu a suok a, a hmaia hnuoi sikin lal hmaa chun a bawkkhup a.

²¹Chun, Arauna chun, “Iengdinga ka pu lal chu a siehlaw kuoma hi hung am a ni a?” a ta. Chun, David chun, “Mipuihai laia inthawka hri hi ân kieng theina dingin LALPA ta dinga maichâm siemna dinga i hrizâwl hi inchaw dingin,” a ta.

²²Chun, Arauna chun David kuomah, “Lalpa ka pu chun âwm a ti chu la sienla, inhlân raw se, en ta, pumrawhmanga inhlân dingin bâwngchalhai chu an um a; chun, thing dingin hrizâwl hmangruohai le sebâwng thuomhnawhai chu a um bawk a.

²³Aw, lalpa, hieng po po hi Arauna chun lal a pêk vawng a nih,” a ta. Chun, Arauna chun lal kuomah, “LALPA i Pathien chun hung dawn raw se che,” a ta.

²⁴Chun, lal chun Arauna kuomah, “Ni lo e, a man neiin ân châwk ngeiin inchawpêk lem ka ti che, iengkhawm insêng lovin LALPA ka Pathien kuomah pumrawhmang thilinhlân inhlân naw tawp ka tih,” a ta. Chuongchun, David chun hrizâwl le sebâwngchalhai chu tangka shekel sâwmngain ân châwk ta a.

²⁵Chun, David chun chutaka chun LALPA ta dingin maichâm a siem a, pumrawhmang thilinhlânhai le inremna thilinhlânhai ân hlân a. Chuongchun, LALPA chu an ram chunga chun a lungâwi a, Israel rama inthawkin hri chu ân kieng ta a.