Read Hmar 2 SAMUEL 6 Bible Online

2 SAMUEL 6 - Hmar bible

2 SAMUEL 6

¹David chun Israel mihai laia thlang ṭhieu mi sîng thum ân khâwm nâwk a.

²Chun, David chu a tho a, Juda rama Baala khuoa inthawkin cherubhai chunga chuong sipaihai LALPA hming an inputtir Pathien bâwm chu zu la dingin a kuoma mi um po pohai le chun an inthawk ta a.

³Chun, Pathien bâwm chu tawlailîr tharah an sie a, tlânga um Abinadab ina inthawk chun an lâk suok a, Abinadab naupasalhai Uzza le Ahio chun tawlailîr thar chu an khal a.

⁴Chun, tlânga Abinadab ina inthawk chun, Pathien bâwm pum chun an lâk suok a; Ahio chu Pathien bâwm hma tieng chun a fe a.

⁵Chun, David le Israel mi po pohai chun LALPA hmaah thil inri thei chi hran hran fâr thinga siem le, ṭingṭanghai dâm, perkhuonghai dâm, khuongtêhai dâm, tawtawrâwt bi neihai dâm, dârbenthekhai dâm an sut a.

⁶Chun, Nakon hrizâwl an tlung chun Uzza chun Pathien bâwm chu a hei ban a, a chel a; sebâwng chu a pêm a pêm leiin.

⁷Chun, LALPA lung chu Uzza chunga chun a sen ta thut a, a thilthaw indik naw lei chun Pathienin chutaka chun a sukhlum ta a; Pathien bâwm kâwla chun a thi ta a.

⁸Chun, LALPA chu Uzza chunga a hung ṭuong ta lei chun David chu a lunginsen a, chu hmun chu Perez- uzza ân bûk a; chu chu tu chen hin a la ni ta zing a.

⁹Chu ni chun David chun LALPA chu a ṭi a, “Iengtin am LALPA bâwm hi ka kuom hung tlung thei a ta aw?” a ta.

¹⁰Chuongchun, David chun David khuoa chun LALPA bâwm chu a kuomah a lâk nuom ta naw a, David chun Git mi Obed-edom ina chun a sie ta lem a.

¹¹Chun, LALPA bâwm chu Git mi Obed-edom ina chun thla thum a um a, chuongchun, Obed-edom le a sûnghai po po chu LALPAIN mal a sâwm a.

¹²Chun, lal David chu, “Pathien bâwm leiin Obed-edom sûngkuo le a in le lo po po LALPAIN mal a sâwm a nih,” ti an hril a. Chuongchun, David chun Pathien bâwm chu Obed-edom ina inthawk chun David khuoa chun lâwmtakin a zu lâk ta a.

¹³Chun, LALPA bâwm zâwntuhai chu pên ruk an fe phingleh sebâwngchal le ran châwm thâuin an inthâwi a.

¹⁴Chun, David chu a theitâwpin LALPA hmaah a lâm a, David chun puonzai inhmi thiempu zakawsîng a hâk a.

¹⁵Chuongchun, David le Israel mi po pohai chun khêk dur dur pum le tawtawrâwt mût ruoi ruoi pumin LALPA bâwm chu an lâk ta a.

¹⁶Chun, LALPA bâwm chu David khuoa a lût lai chun Saula naunu Mikal chun tukvera inthawk hin a lo thlîr a; LALPA hmaa David lâm le inchâwm chu a zuk hmu a, a hmusit lungril ta a.

¹⁷Chuongchun, LALPA bâwm chu an lâk lût a, a siena dinga Davidin a zar, puon in sûnga a hmun dinga chun an sie ta a; chun, David chun pumrawhmang thilinhlân le inremna thilinhlân chu LALPA hmaa chun ân hlân a.

¹⁸Chun, Davidin pumrawhmang thilinhlân le inremna thil inhlânhai ân hlân zo chun, sipaihai LALPA hmingin mipuihai chu mal a sâwm a.

¹⁹Chun, mipui po po, Israel mi pumpuihai chu a nuhmei a pasalin mi tin el chu bei hlawm khat le sa tlin khat le grêp ra emṭâwl bâwr khat a sem seng a. Chuongchun, mi po po chu mâni in tieng an fe ta seng a.

²⁰Chuongchun, David chu a sûnghai malsâwm dingin a fe ta a. Chun, Saula naunu Mikal chu David tuok ding chun a hung suok a, “Vawisûna Israel lal chu a va ropui de! Mi hotak inzakna châng hre lo, ruoka um ang elin vawisûn khan a siehlaw nunghâkhai mithmuah ruokin a um kha teh!” a lo ti a.

²¹David chun Mikal kuoma chun, “I pa le a sûnghai po po aiah mi thlang a, LALPA mi Israelhai chunga lal dinga mi ruottu LALPA hmaah i sawnnaw, LALPA hmaa chu lâm âwm hrim ka nih.

²²Hieng nêk hmanin inzapui la um ka tih, kei le kei khawm lân sit pei bawk ka ta; amiruokchu, chuong siehlaw nunghâkhai i hrilhai chawimawi chun um ka tih,” a ta.

²³Chuongchun, Saula naunu Mikal chun a thi chenin nau a nei ta naw a.