Read Hmar 2 SAMUEL 8 Bible Online

2 SAMUEL 8 - Hmar bible

2 SAMUEL 8

¹Chun, chu hnunga chun David chun Philistin mihai chu a thaw a, a hne ta a; chuongchun, David chun Philistin mihai thuneina khawpui chu a lâkpêk ta a.

²Chun, Moab mihai a thaw nâwk a, a hnuoiah ân zâltir a, inkhina hruiin ân khi a; tlar hni chu sukhlum dingin ân khi a, tlar khat chu a tluona hring dingin ân khi a. Chuongchun, Moab mihai chu David siehlawhai an hung ni ta a, thilpêkhai dâm an hung pêk hlak a.

³David chun Euphrates vadunga a ram la dinga a fe malamin Zoba leh Rehob naupa Hadadezer chu a thaw a.

⁴Chuongchun, David chun a sakawr chung chuong mi sâng khat le za sari le sipai sîng hni a manpêk a; chun, David chun tawlailîr kei mi sakawrhai po po chu an thahrui a satpêk a, tawlailîr za hnûktu ding ruok chu a hla a.

⁵Chun, Damaskaa Suria mihai Zoba lal Hadadezer san dinga fehai chu David chun Suria mihai laia mi chu sîng hni le sâng hni a that a.

⁶Chuongchun, David chun Suria rama Damaskaa chun sipaihai a sie a; chuongchun, Suria mihai chu David siehlawhai an hung ni ta a, thilpêkhai an hung pêk hlak a. Chun, LALPAIN David chu a fena tieng taphawta chun ân hnetir pei a.

⁷Chun, David chun Hadadezer rawihai rângkachak phawhai chu a lâkpêk a, Jerusalem tieng a phur a.

⁸Chun, Hadadezer khuo Betaa inthawk dâm, Berothaia inthawk dâmin dâr tamtak a lâk a.

⁹Chun, Hamath lal Toi chun Hadadezer sipaihai po po David chun a hne ti a lo hriet a.

¹⁰Hadadezer chu a thaw a, a hne leiin chibai bûk dingin le lâwmpui dingin Toi chun a naupa Joram chu David kuomah a tir a, Hadadezer chun Toi hi a lo do hlak hrim a na. Chun, Joram chun tangkaraw bêlhai dâm, rângkachak bêlhai dâm, dâr bêlhai dâm a hung chawi a;

¹¹chuong chu ram a hne ta po poa mi tangkaruo le rângkachak ân hlânhai le chun lal David chun LALPA ân hlân bawk a.

¹²Suria mihai ta dâm, Moab mihai ta dâm, Ammon mihai ta dâm, Philistin mihai ta dâm, Amalek mihai ta dâm, Zoba lal Rehob naupa Hadadezera inthawka a râllâkhai dâm an nih.

¹³Chun, David chu Chi Ruoma, Suria mi sîng khat le sâng riet a thaw hung tieng chun a hming ân thang ta a.

¹⁴Chun, Edoma chun râl vêng sipai a sie a, Edom ram hmun tinah sipai a sie nghuon el a; chuongchun, Edom mihai po po chu David siehlawhai an hung ni ta a; chuongchun, LALPAIN David chu a fena tieng taphawtah ân hnetir ta pei a.

¹⁵Chuongchun, David chun Israel mi po pohai chungah ro a rêl a; chun, David chun a mihai po po chunga chun feltakin ro a rêl a.

¹⁶Chun, Zeruia naupa Joab chu sipai hotu tak a na; chun, Ahilud naupa Jehosaphat chu chanchin ziektu a nih;

¹⁷chun, Ahitub naupa Zadok le Abiathar naupa Ahimelek chu thiempu an nih; chun, Seraia chu ziektu a nih;

¹⁸chun, Jehoiada naupa Benaia chu Kereth mi le Peleth mihai hotu a nih; chun, David naupasalhai chu thiempu an nih.