Read Hmar 1 LALHAI 11 Bible Online

1 LALHAI 11 - Hmar bible

1 LALHAI 11

¹Solomon chun Pharao naunu chau naw khawm hnam dang nuhmei tamtak Moab mi dâm, Ammon mi dâm, Edom mi dâm, Zidon mi dâm, Hit mi nuhmeihai dâm chu a hmangai a;

²chuong hnamhai chungchâng thu chu LALPAIN Israel mihai kuomah, “Anni chu pâwl naw unla, anni khawma pâwl naw raw hai se cheu; an pathienhai tieng in lungril an kei kâwi ngei âwm si a,” tiin a lo hril ta hrim a; chuonghai chu Solomon chun hmangainain a chel tlat a.

³Chuongchun, nuhmei za sari, lal naunu a nei a, thaikêm za thum leh; chun, a nuhmeihai chun a lungril an ṭhuoi kâwipêk ta a.

⁴Chun, Solomon chu a hung upat hnung chun, a nuhmeihai chun pathien dang kuom tienga chun a lungril an ṭhuoi kâwipêk ta a, chuongchun, a pa David lungril angin LALPA a Pathien tienga chun a lungril chu a hung ṭha famkim ta naw a.

⁵Solomon chun Zidon mihai pathiennu Astoreth le Ammon mihai pathien tirdakumtak Milkom chu a lo zui ve ta a.

⁶Chun, Solomon chun LALPA mithmua chun thil suol a lo thaw ta a; a pa David ang khan LALPA chu a zui tlat ve ta naw a.

⁷Chuongchun, Solomon chun Jerusalem bula tlângah Moab mihai pathien tirdakumtak Kemos ta dingin le, Ammon mihai pathien tirdakumtak Molek ta dingin bâwlhmun a lo siem ta a.

⁸Chuong ang bawk chun hnam dang a nuhmeihai po po an pathien kuoma inthâwia riminhnik raw hlakhai ta ding khawma a siempêk a.

⁹Chuongchun, LALPA chu Solomon chunga chun a lunginsen ta a, LALPA Israelhai Pathien a kuoma vawihni lai inlâr chu a lungrila phatsanin,

¹⁰pathien danghai a zui ding a ni nawh ti a LALPAIN thu a pêk chu a zâwm naw leiin.

¹¹Chuleiin, LALPAIN Solomon kuoma chun, “Hieng ang hin i hung um ta a, ka thuthlung le ka thuruot pawm dinga thu ka pêk che hi i pawm ta si naw a, ram hi lâkpêk ngei ngei ka ti che a, i siehlaw kuomah pêng ka tih.

¹²Amiruokchu, i pa David zârah i dam sûng êm chun thaw naw ningah; nisienlakhawm, i naupa chu ka lâkpêk ding a nih.

¹³Ram po po ruok chu lâkpêk vawng naw ning a, nisienlakhawm, ka siehlaw David lei le ka ithlang Jerusalem lei hin hnam khat chu i naupa kuomah pêng ka tih,” a ta.

¹⁴Chun, LALPAIN Edom mi Hadad chu Solomon hmêlma dingin a hung inngîrsuok ta a, ama chu Edom rama lal thla a nih.

¹⁵Chun, David Edom rama a um laia an mi thathai phûm dinga sipai hotu Joab a hang fe a, Edom mi, naupasal taphawt chu a hang that vawng hnung khan,

¹⁶Joab le Israel mihai po po chu thla ruk zet Edom rama pasal po po an sukhlum vawng hmakhat chun an um a nih:

¹⁷Hadad chu a pa siehlawhai laia Edom mi ṭhenkhathai leh Aigupta rama tlân dingin an fe a, Hadad chu naupang chitê a la nih.

¹⁸Midian rama inthawk chun an suok a, Paranah an fe a, chun, Parana inthawk chun mihai an ṭhuoi a, Aigupta ram, Aigupta ram lal Pharao kuom an zu tlung a; ama chun inhai a lo pêk a, fâk dinghai a lo ngaituopêk a, ram dâm a lo pêk bawk a.

¹⁹Hadad chun Pharao mit a tlung hle el a, chuongchun, a nuhmei ngei zuorpuinu, lalnu Tahpenes zuorpui chu nuhmeiah ân neitir a.

²⁰Chun, Tahpenes zuorpuinu chun, naupasal Genubath a neipêk a, Tahpenes chun Pharao ina chun a nêne nêk bânna a siempêk a; chun, Genubath chu Pharao nauhai laia chun a um ta a.

²¹Chun, Hadad chun Aigupta rama inthawka David chu a puhai kuomah a in ve tah ti le, sipai hotu Joab khawm a thi tah ti a lo hrietin, Hadad chun Pharao kuomah, “Ka rama ka fe theina dingin mîn suoktir ta la,” a ta.

²²Chuongchun, Pharao chun a kuomah, “Ka kuoma i um hin tlâksam ieng am i nei leh, ngai ta, chuonga in ram tienga fe nâwk i tum el chu?” a ta. Chun, ama chun, “Ieng dang rak khawm a ni chuong nawh; nisienlakhawm, mîn fetir hrim hrim el raw khai,” a ta.

²³Chun, Pathienin a hmêlma dingin Eliada naupa Rezon, a pu Hadadezer, Zoba lal kuoma inthawka tlânhmang ta kha a hung inngîrsuok nâwk ta a.

²⁴Davidin Zoba khuoa mihai a that khan, ama chun a kuomah mihai a kei khâwm a, sipai hotuah a hung ṭhang ta a; chun, Damaska khuoah an fe a, chutaka chun an um a, Damaska khuoa chun lalin a um ta a.

²⁵Hadad sukrinumna belsain Solomon dam sûng po chu Israelhai hmêlma an ni rawp hrim a; Israelhai chu a theida hle el a, Suria ram sûnga chun ro a rêl a.

²⁶Chun, Nebat naupa Jeroboam, Zereda khuoa Ephraim mi, Solomon siehlaw khawm chun (a nu hming chu Zerua a na, hmeithai a nih) lal chunga chun a kut ân let ve a.

²⁷Lal chunga a kut a hung inletna san chu hieng ang hi a nih; Solomon chun Millo chu a siem a, a pa David khuo chu a sietna laihai chu a siem ṭha a.

²⁸Chu Jeroboam chu mi hrât huoisen a na, chuongchun, Solomon chun chu tlangvâl chu mi taimatak nia a hriet leiin Josef sûnghai po po chunga sinthaw hotuah a siem a.

²⁹Chun, chuong lai chun hieng ang hi a hung na, Jeroboam chu Jerusalem khuoa a fe suok chu Silo zâwlnei Ahija chun lampuia chun a lo hmu a; Ahija chun puon thar hi a sil a, an pahni chau chun phûla chun an um hmunkhat a.

³⁰Chun, Ahija chun a puon thar sil chu a lâk a, her sâwmpahniah a keithlêr a.

³¹Jeroboam kuoma chun, “Her sâwm hi la raw khai, LALPA Israelhai Pathien chun hieng ang hin a ti a nih, ‘Ngai ta, ram hi Solomon hi lâkpêk ka ta, hmun sâwm chu ka pêk ding che a nih.

³²Amiruokchu, ka siehlaw David lei le, Israel hnam po po laia ka thlang khawpui Jerusalem lei hin hnam khat chu nei a tih,

³³ama chun a mi mâksan a, Zidon mi pathiennu Astoreth hai, Moabhai pathien Kemos hai, Ammonhai thlahai pathien Milkom hai dâm a biek lei le ka mithmua thilṭha thaw ding le ka thuruothai le ka rorêlhai hi pawm dinga a pa David anga ka lampuihai a hraw naw leiin.

³⁴Ram pumpui chu lâkpêk naw ning a, amiruokchu, ka thupêkhai le ka thuruothai pawmtu ka thlang, ka siehlaw David leiin a dam sûng chu lalah lân umtir hrîng ka tih,

³⁵nisienlakhawm, ram hi a naupa chu lâkpêk ka ta, nang hi ka pêk ding che a nih, hnam sâwmhai chu.

³⁶Chun, ka siehlaw Davidin ka hming inumtirna dinga ka thlang khawpui Jerusalema hin ka hmaa khâwnvar a nei zing theina dingin hnam khat chu a naupa chu pêng ka tih.

³⁷Nang hi ruot ka ti che a, i nuom ang angin ro rêl i ta; Israelhai lalin um i tih.

³⁸Chun, thu ka pêk ang taphawt che i pawm a, ka lampuihai i hraw a, ka siehlaw David anga ka thuruothai le ka thupêkhai zâwm dinga ka mithmua thilṭha i thaw chun i kuomah um pei ka ta, David kân ngîrpêk ang khan sûngkuo nghettak inngîrpêk ka ti che a, Israelhai hi pêng ka ti che.

³⁹Chuleiin, David thla chu ka sukrinum ding a nih, amiruokchu, kumkhuo chun chu ni naw nih,’ tiin” a ti a.

⁴⁰Chuongchun, Solomon chun Jeroboam chu that a tum ta a, nisienlakhawm, Jeroboam chu a tho a, Aigupta ramah, Aigupta ram lal Sisak kuomah a tlân ta a, Solomon thi hmakhat chun Aigupta rama chun a um ta a.

⁴¹Solomon chanchin danghai le a thilthaw po pohai le a varna dâm chu Solomon thilthawhai ziekna buah a chuong a ni naw am a nih?

⁴²Solomon chun Israelhai po po chunga Jerusalem khuoa ro a rêl sûng chu kum sâwmli a nih.

⁴³Chuongchun, Solomon chu a puhai kuoma chun a in ta a, a pa David khawpuia chun an phûm ta a; chun, a naupa Rehoboam chu ama aiaw chun ân lal ta a.