Read Hmar 1 LALHAI 15 Bible Online

1 LALHAI 15 - Hmar bible

1 LALHAI 15

¹Tûn Nebat naupa lal Jeroboam chu kum sâwm le kum riet ân lal kum chun Judahai chungah Abijam chu ân lal ṭan a.

²Jerusalem khuoah kum thum ân lal a, a nu hming chu Maaka, Abisalom naunu a nih.

³A hmaa a pain thil suol a thawhai po po kha a thaw ve a; a pu David lungril angin a lungril chu LALPA a Pathien tienga chun a ṭha famkim ve naw a.

⁴Nisienlakhawm, David leiin LALPA Pathien chun ama hnunga a naupa la tungdingna ding le Jerusalem khuo inngîr det dingin Jerusalem khuoa chun khâwnvar a pêk a.

⁵Hit mi Uria chungchâng ti nawa chun Davidin LALPA mithmua thilṭha a thaw hlak lei le a dam sûng poa thaw dinga thu a pêk taphawt chu a sêl ngai dêr naw leiin.

⁶Rehoboam chu a dam sûng po chu Jeroboam leh an indo zing zing hlak a.

⁷Abijam chanchin le a thilthaw danghai po po chu Juda lalhai inlal lai thu ziekna buah a chuong a ni naw am a nih?

⁸Abijam le Jeroboam chu an indo hlak a. Chun, Abijam chu a puhai kuoma chun a in ta a, David khawpuia chun an phûm ta a; ama aiawin a naupa Asa chu ân lal ta a.

⁹Israel lal Jeroboam chu kum sâwmhni ân lal kum chun Asa chu Judahai chungah ân lal ṭan a.

¹⁰Chun, kum sâwmli le kum khat chu Jerusalemah ân lal a, a pi hming chu Maaka, Abisalom naunu a nih.

¹¹Asa chun a pu David ang bawkin LALPA mithmua thilṭha a thaw hlak a.

¹²Chun, pasal inzawrhai chu a rama inthawkin a hnawt suok a, a puhaiin milim an lo siemhai po po chu a sukbo vawng a.

¹³A pi Maaka khawm chu milim tirdakumtak Asera a siempêk leiin, a lalnu nina chu a bân a; chun, Asa chun a milim siem chu a sât thlûk a, Kidron vadungah a raw a.

¹⁴Bâwlhmunhai ruok chu a sukbo naw a, nisienlakhawm, Asa lungril chu a dam sûng po chun LALPA tieng chun a ṭha famkim a nih.

¹⁵Chun, a pain thil a lo inhlân tasahai le ama ngeiin a lo inhlân tah, tangkaruohai, rângkachak dâm, bûr le bêlhai chu LALPA inah a lâk lût a.

¹⁶Chun, Asa le Israel lal Baasa chu an inlal sûng po chu an indo zing hlak a.

¹⁷Israel lal Baasa chun Judahai chu a hang rûn a, Juda lal Asa kuoma lût ding le suok ding dangna dingin Rama khuo a siem a.

¹⁸Chuongchun, Asa chun LALPA ina le lal ina ro la um tangkaruo le rângkachak po po chu a lâk a, a siehlawhai a pêk a; chun, lal Asa chun Damaska khuoa um Suria lal Hezion nau Tabrimon naupa Benhadad kuoma chun,

¹⁹“Nang le keia kâra le ka pa le i pa kârah thuthlung a um a, ngai ta, lâwmman dingin tangkaruo le rângkachak ka hung thawn che; thaw ta, Israel lal Baasa hin a min kiensanna dingin a kuoma i thuthlung kha ṭhiek el ta,” tiin a thawn a.

²⁰Chun, Benhadad chun lal Asa thu chu a lo pawm a, chuongchun, Israel khuohai chu thaw dingin a sipai hotuhai a tir a. Ijon khuo dâm, Dan khuo dâm, Abel-beth-maaka khuo dâm, Kinneroth biel po po chu, Naphtali ram po po le chun a lâk ta a.

²¹Chun, Baasa chun chu thu chu a lo hriet phingleh Rama khaw siem chu a ma a, Tirza khuoa chun a um ta a.

²²Chuongchun, lal Asa chun Judai ram po poa chun thu ân phur vêl ta a; tukhawm a âwl bîk hrim hrim an um nawh, chuongchun, Baasain Rama khaw siemna dinga thing le lung a hmanghai chu an thak a; chuonghai chu hmangin lal Asa chun Mizpa khuo le Benjamin rama Geba khuo a siem a.

²³Asa chanchin dang po pohai, a thilthawtheizie po pohai, a thilthaw po pohai, a khaw siemhai chu Juda lalhai inlal lai thu ziekna buah a chuong a ni naw am a nih? Amiruokchu, a tar hnung chun a kea chun hri ieng amani a hung invawi ta a.

²⁴Chun, Asa chu a puhai kuomah a in ta a, a pu David khawpuiah a puhai lai chun an phûm ta a; a naupa Jehosaphat chu ama aiawin ân lal ta a.

²⁵Chun, Jeroboam naupa Nadab chu Juda lal Asa inlal kum hninaa chun Israelhai chungah ân lal ṭan a; Israelhai chunga chun kum hni ân lal a.

²⁶LALPA mithmuin thil ṭha nawtak a thaw hlak a; a pa lampui hraw chu a hraw ve a, Israelhai thil insuksuoltira a suksuolna kha a thaw ve a.

²⁷Chun, Issakar sûnghai laia mi Ahija naupa Baasa chun ama chu a phier rûk a, Philistin mihai chan, Gibbethon khuoah Baasa chun a that ta a, Nadab le Israelhai po po chun Gibbethon khuo chu an inhuol lai tak a nih.

²⁸Juda lal Asa inlal a kum thumnaah a nih Baasa chun a that a, a aiah ân lal chu.

²⁹Chun, lal a hung ni phing chun a sukchimit dêr hmakhat chun Jeroboam sûnghai po po chu a that a, a dam taphawt chu pakhat khawm Jeroboam chu a hlapêk naw a; LALPAIN Shilo khuoa mi a siehlaw Ahija hmanga a lo hril ta ang khan,

³⁰chu chu Israelhai thil insuksuoltira a thaw, Jeroboam suolnahai lei le LALPA Israelhai Pathien chu a suklungsen lei a nih.

³¹Nadab chanchin danghai le a thilthaw po pohai chu Israel lalhai inlal lai thu ziekna buah a chuong a ni naw am a nih?

³²Chun, Asa le Israel lal Baasa chu an inlal sûng po chu an indo zing hlak a.

³³Juda lal Asa inlal kum thumnaa chun Ahija naupa Baasa chu Tirza khuoah Israelhai po po chungah ân lal ṭan a, kum sâwmhni le kum li ân lal a.

³⁴LALPA mithmuin thil ṭhanawtak a thaw hlak a, Jeroboam lampui hraw chu a hraw ve a, Israelhai thil insuksuoltirnaa a suksuolna kha a thaw ve a.