Read Hmar 1 LALHAI 16 Bible Online

1 LALHAI 16 - Hmar bible

1 LALHAI 16

¹Chun, Baasa chungchâng thuah Hanani naupa Jehu kuomah LALPA thu a hung tlung a,

²“Pilvuta inthawkin ka dawm sâng che a, ka mi Israelhai chunga hin hotuah ka siem che a, chun, nangin Jeroboam lampui hraw chu i hraw a, an suolnahaia an mi suklungsenna dingin ka mi Israelhai chu thil în suksuoltir a;

³ngai ta, Baasa le a sûnghai hi ka sukbo hlau ding a nih; chuongchun, Nebat naupa Jeroboam sûnghai ang elin i sûnghai hi siem ka tih.

⁴Baasa sûngkuohai laia khawpuia thi taphawthai chu uiin fâng an ta, chun, a sûngkuo laia mi rama thi taphawthai chu chunglêng vatehaiin fâng an tih,” tiin.

⁵Baasa chanchin danghai, a thilthaw dâm, a thilthawtheizie dâm chu Israel lalhai inlal lai thu ziekna buah a chuong a ni naw am a nih?

⁶Chun, Baasa chu a puhai kuoma chun a in ta a, Tirza khuoah an phûm a; a naupa Ela chu ama aiawin ân lal ta a.

⁷Chun, Baasa le a sûngkuohai chungchâng thua chun a kutsuoka LALPA suklungsenna dinga Jeroboam sûnghai hawina neia LALPA mithmua thil ṭha nawtak a thaw lei le, ama chu a that leiin Hanani naupa zâwlnei Jehu hmanga a hril LALPA thu chu a hung tlung ta a.

⁸Juda lal Asa inlal kum sâwmhni le kum ruknaah Baasa naupa Ela chu Tirza khuoa Israelhai chungah ân lal ṭan a, kum hni sûng ân lal a.

⁹Chun, a siehlaw Zimri, a tawlailîr zâtve chunga hotuin ama chu a phier rûk a, chuong lai chun Tirza khuoa chun, Tirza khuoa a insûng tieng hotu Arza inah a lo dâwn inrui a;

¹⁰chun, Juda lal Asa inlal kum sâwmhni le kum sari kum chun Zimri chu a va lût a, a thaw a, a that a, ama aiawin ân lal ta a.

¹¹Chun, ama chu a hang inlal ṭan a, a lalṭhungphaa a hang ṭhung phingle chun, Baasa sûnghai po po chu a that vawng a, a laibunghai le a ruolhai laia mi naupasal taphawt chu pakhat khawm a hla nawh.

¹²Chuongchun, zâwlnei Jehu hmanga Baasa chungchâng thu a lo hril ta ang khan, Zimri chun Baasa sûnghai po po chu a sukchimit vawng ta a;

¹³Lalpa Israelhai Pathien chu an khawhlonaa suklungsenna dinga Israelhai thil insuksuoltira an thaw Baasa suolna po po le, a naupa Ela suolna lei chun.

¹⁴Ela chanchin danghai le a thilthawhai po po chu Israel lalhai inlal lai thu ziekna buah a chuong a ni naw am a nih?

¹⁵Juda lal Asa inlal kum sâwmhni le kum sari kum chun Zimri chu Tirza khuoa chun ni sari ân lal a. Philistin mihai chan, Gibbethon khuo chu mihai chun an inhuol a.

¹⁶Chun, ân huoltuhai chun, Zimri chun lal a phier rûk a, lal a that tah ti mi hril an lo hriet a; chuongchun, Israelhai po po chun sipai hotu Omri chu, chu ni chun an riekhmuna Israelhai lal dingin an siem ta a.

¹⁷Omri chu Israelhai po po leh Gibbethon khuoa inthawk chun an hang fe a, Tirza khuo chu an hang inhuol ta a.

¹⁸Chun, Zimri chun khuo chu an lâk tah ti a hriet chun, lal ina kula chun a tlânlût a, lal ina chun ân râwkhum a, a thi ta a.

¹⁹LALPA mithmua thil ṭha nawtakhai thawa a suolnahai lei le Jeroboam lampui hraw chu hraw ve a, Israelhai thil insuksuoltira a suolna leiin.

²⁰Zimri chanchin danghai le a phier rûkna thuhai chu Israel lalhai inlal lai thu ziekna buah a chuong a ni naw am a nih?

²¹Chuongchun, Israel mipuihai chu pâwl hniah an hung inṭhe ta a, mipui zâtve chun Ginath naupa Tibni chu lala siem tumin an zui a; chun, a zâtve dangin Omri chu an zui bawk a.

²²Nisienlakhawm, Omri zuituhai chun Ginath naupa Tibni zuituhai chu an hne ta a, chuongchun, Tibni chu a thi a, Omri chu ân lal ta a.

²³Juda lal Asa inlal kum sâwmthum le kum khatnaah Omri chu Israelhai chungah ân lal ṭan a, kum sâwm le kum hni sûng ân lal a; Tirza khuoa chun kum ruk ân lal a.

²⁴Semer ta Samari tlâng chu tangka talent hniin ân châwk a; chun, tlânga chun khuo a siem a; a khaw siem hminga chun chu tlâng neitu Semer hming chawiin Samari ân puttir a.

²⁵Omri chun LALPA mithmua thil ṭha nawtakhai chu a thaw hlak a; a hmaa mihai po po nêkin a suksuol nasa bîk lem a.

²⁶Nebat naupa Jeroboam thawdân po po kha a lâk a, an khawhlona leia LALPA Israelhai Pathien suklungsenna dinga Israelhai thil ân suksuoltirna ang khan a suol ve si a.

²⁷Omri thilthaw chanchin danghai le a thilthawtheizie a suklanghai thu chu Israel lalhai inlal lai thu ziekna buah a chuong a ni naw am a nih?

²⁸Chuongchun, Omri chu a puhai kuoma chun a in ta a, Samari khuoa chun an phûm a; a naupa Ahab chu ama aiawin ân lal ta a.

²⁹Juda lal Asa inlal kum sâwm-thum le kum rietnaah Omri naupa Ahab chu Israel chungah ân lal ṭan a; chun, Omri naupa Ahab chu Samari khuoa chun Israelhai chungah kum sâwmhni le kum hni ân lal a.

³⁰Chun, Omri naupa Ahab chun a hmaa mi po pohai nêkin LALPA hmaa chun thil ṭha nawtak a thaw hlak a.

³¹Chun, Nebat naupa Jeroboam suolna ang thaw ve dâm chu ienga khawm ngailo ni âwmtakin, Zidon mihai lal Ethbaal naunu Jezebel nuhmeiah a nei a; Baal rawng dâm bâwlsanin a biek ve ta el a.

³²Samari khuoa Baal in a bâwla chun Baal ta dingin maichâm a siem ta a.

³³Chun, Ahab chun Asera a siem a; a hmaa Israel lalhai po po nêkin Ahab chun LALPA Israelhai Pathien suklungsenna dingin thil a thaw nasa bîk a nih.

³⁴Ama ân lal lai chun Bethel mi Hielin Jeriko khuo a siem a, a naulutîr Abiram chu chânin a lungphûm chu a phûm a; chun, a nau mitlum Segub chu chânin a kul kawtkhârhai chu ân ngîr a, LALPAIN Nun naupa Josua hmanga a lo hril ta ang khan.