Read Hmar 1 LALHAI 17 Bible Online

1 LALHAI 17 - Hmar bible

1 LALHAI 17

¹Tisbe khuo, Gilead rama Tisbe khuoa mi Elija chun Ahab kuoma chun, “LALPA, a hmaa ka ngîrna hlak, Israelhai Pathien hringna sâlin ka hril a nih; kum ieng zât amani sûng chu ka thu naw chun ruo le dâidaw tla hrim hrim naw nih,” a ta.

²Chun, LALPA thu chu a kuomah a hung tlung a.

³“Hitaka inthawk hi suok la, khawsak tieng panin fe la, Jordan bula um Kerith vadunga chun hang inbihmang rawh.

⁴Chun, chu vadung tui chu tlân i ta, chutaka châwm ding chein vaâkhai thu ka pêk tah a nih,” tiin.

⁵Chuongchun, a fe a, LALPA thu ang chun a thaw ta a; Jordan kâwla um Kerith vadunga chun a hang um ta a.

⁶Chun, vaâkhai chun zîngkâr hin bei le sâ an hung putpêk hlak a; zântieng chun bei le sâ an hung putpêk nâwk hlak a, chun, vadung tui chu a tlân a.

⁷Chun, a nakie deu chun hieng hi a hung na, chu rama chun ruo hrim hrim a sûr naw leiin vadung chu a hung kang ta a.

⁸Chun, LALPA thu chu a kuomah a hung tlung a;

⁹Tho la, Zidon rama Zarephath khuoah fe la, chutaka chun um rawh; ngai ta, a châwm ding chein hmeithai pakhat thu ka pêk tah,tiin.

¹⁰Chuongchun, a tho a, Zarephath khuoa chun a fe ta a; chun, chu khaw kul kawtkhâr chu a va tlung chun, ngai ta, hmeithai pakhat thing inkhâwm hi a lo um a; ama chu a hang ko a, bêlin tui tlâwmte mi hung lapêk ta, hang dâwn ka tih,a ta.

¹¹Chun, la dinga a fe lai chu a hei ko a, bei khawm tlâwmte mi hung chawipêk ta, a ta.

¹²Ama chun, LALPA i Pathien hringna sâlin ka hril a nih, bei chu chu ka nei naw a, bêla beiphit veikhat bak le, bûrah sahriek tlâwmte chau ka nei a; chun, ngai ta, ka fe a, kei le ka naupa ta dinga siemna dingin thingrieu pahni amani chau kân khâwm a na; chuongchun, chu chu fâng kan ta, kan thi el ding a nih,a ta.

¹³Chun, Elija chun a kuomah, “Ṭi naw rawh, i hril ang chun va thaw phawt la, amiruokchu, chu chun bei chite bêk mi hung siempêk phawt la, chu chu mi hung chawipêk la, chu zoa chun i ta ding le i naupa ta ding chu i la siem ding annâwm.

¹⁴LALPA Israelhai Pathien chun hieng ang hin a ti a nih, ‘LALPAIN hnuoi chunga hin ruo a hung insûrtir hmakhat chun bei phit bêl chu ruok chuong naw ni a, sahriek bûr khawm kang naw nih,’ tiin,” a ta.

¹⁵Chuongchun, Elija hril ang chun a va thaw a, chun, ama le a sûnghai le Elija le chun ni iengzât lai sûng amanih an ring a.

¹⁶Elija hmanga a hril LALPA thu ang khan, beiphit bêl chu a ruok chuong naw a, sahriek bûr khawm chu a kang bawk nawh.

¹⁷Chun, chuong thil hnunga chun in neitunu, hmeithai naupa chu a na ta a; a na chu a na hle el a; a thuok a tâwp ta a.

¹⁸Chun, ama chun Elija kuomah, “Aw nang Pathien mi, nang le kei hi ieng am ei ni leh? Ka suolna inhrietsuoktir ding le ka naupa mi thatpêk dinga hung i ni hi tie!” a ta.

¹⁹Chun, ama chun a kuomah, “I naupa chu mi hung pe ta,” a ta. Chuongchun, a pawm lai chu a lâkpêk a, a umna pindana chun a hang pawm a, ama khuma chun ân zâltir a.

²⁰Chun, LALPA chu a ko a, “Aw LALPA ka Pathien, ka umna hmeithainu chunga hin a naupa hi sukhlumpêkin thil ṭha naw khawm i hung intlungtir a ni maw?” a ta.

²¹Chuongchun, naupang chunga chun vawi thum a bawk a, LALPA chu a ko a, “Aw LALPA ka Pathien, lunginsiettakin hi naupang hringna hi amaa hin hung inumtir nâwk rawh,” a ta.

²²Chun, LALPAIN Elija thu chu a lo ngaipêk a, chuongchun, naupang hringna chu amaa chun a hung um nâwk a, a hung har nâwk ta a.

²³Elija chun naupang chu a ṭhuoi a, pindana inthawk chun in sûngah a fe thlâkpui a, a nu a pêk ta a; Elija chun, “En ta, i naupa hi a dam nâwk tah,” a ta.

²⁴Nuhmei chun Elija kuoma chun, “Tu zet hin chu Pathien mi i na, i baua LALPA thu hi thutak a nih ti ka hung hriet tah,” a ta.