Read Hmar 1 LALHAI 18 Bible Online

1 LALHAI 18 - Hmar bible

1 LALHAI 18

¹Chun, ni tamtak hnunga chun, a kum thum kuma chun LALPA thu chu Elija kuomah a hung tlung a, “Va fe la, Ahab kuomah vân lang rawh; chuongchun, hnuoi chunga hin ruo hung insûrtir ka tih,” tiin.

²Chun, Elija chu Ahab kuoma inlangtir ding chun a fe ta a. Samari rama chun ṭâm chu a nasa hle el a.

³Chun, Ahab chun Obadia, a insûng tieng hotu chu a ko a, (Obadia chu LALPA ṭi mi tak a na,

⁴Jezebelin LALPA zâwlneihai a râwt rak lai khan Obadia chun zâwlnei za a ṭhuoi a, pûkah sâwmnga peiin a thuphmang a, bei le tuiin a châwm hlak a nih.)

⁵Chun, Ahab chun Obadia kuoma chun, “Tuihnâr po po le varuom umna po po va fang ta khai; sakawrhai le sabengtung lien chi hai hi ei sandam theina dingin hlobet dâm ei hmupêk thei el rawi mawh; chuong naw chun chu ranhai hi chân vawng rawi ei tih,” a ta.

⁶Chuongchun, ram fang suok ding chu an insem a, Ahab chu a khâtin lampui dangah a fe a; Obadia khawm chu a khâtin lampui dangah a fe a.

⁷Chun, chuonga Obadia a fe lai chun, ngai ta, Elija le chun an intuok a; ama chun a la hriet a; chuongchun, a bawkkhup a, “Nang i ni maw, ka pu Elija?” a ta.

⁸Ama chun a dawn a, “Nih e, fe ta la, ‘Ngai ta, Elija chu sawtaka sawn a um,’ tiin i lalpa va hril rawh,” a ta.

⁹Chun, ama chun, “Thil ieng am ka suksuol a, i siehlaw hi that dinga Ahab kuta pêk i nuom el am a ni a?

¹⁰LALPA i Pathien hringna sâlin ka hril a nih; ka pu hin nangma inzawngtir nawna hnam le ram hrim hrim a nei nawh i sawnnaw, ‘Hitaka hin a um nawh,’ an ti chun, an hmu naw che thuah ram le hnam chu ṭawng ân khâmtir pei a na.

¹¹Tuhin nangin, ‘Fe la, ngai ta, Elija sawtaka sawn a um ie, tiin i pu va hril rawh,’ i ti el a.

¹²Ka mâksan phing che hin LALPA thlarauin ka hriet nawnaah la hmang sîng a ti che a, chuongchun, Ahab chu ka va hril a, a hung hmu thei si naw che chun a mi that el ding i sawnnaw; nisienlakhawm, i siehlaw hin ka tleirawla inthawk tah LALPA chu ka ṭi hlak si a.

¹³Jezebelin LALPA zâwlneihai a râwt rak laia ka thil thaw, LALPA zâwlneihai laia mi za, sâwmnga pâwla pûka ka thuphmang a, bei le tuia ka châwmzie kha ka pu hi an hril naw che nîng a ti maw?

¹⁴Tuhin nangin, ‘Fe ta la, ngai ta, Elija chu sawtaka sawn a um ie, tiin i pu va hril rawh,’ i ti el a, mi that ngei a ti le,” a ta.

¹⁵Elija chun, “A hmaa ka ngîrna hlak sipaihai LALPA hringna sâlin ka hril a nih, vawisûn hin a kuomah kân lang ngei ding a nih,” a ta.

¹⁶Chuongchun, Obadia chu Ahab va be ding chun a fe ta a, a hril a; chun, Ahab chu Elija hmu tum chun a fe ta a.

¹⁷Chun, Ahab chun Elija chu a va hmu chun a kuomah, “Nang i ni maw, Israelhai suklungzîngtupa?” a ta.

¹⁸Ama chun a dawn a, “Israelhai hi ka suklungzîng nawh ie, nang le i pa sûnghaiin annâwm an suklungzîng lem chu. LALPA thupêkhai chu nghatsana, Baalhai i pawm lem tâka hin.

¹⁹Chuleiin, tuhin Israelhai po po le Baal zâwlnei za li le sâwmnga leh, Asera zâwlnei, Jezebel dawkâna thlaithlêng awt ve hlakhai za li kha ka kuomah Karmel tlângah vân ko khâwmtir rawh,” a ta.

²⁰Chuongchun, Ahab chun Israel mi po po lai chun mi a tir a, zâwlneihai chu Karmel tlânga chun a ko khâwm a.

²¹Chun, Elija chun mipuihai po po chu a va hnai a, “Lung âwpinkaiin ieng chen am in um ding a na? LALPA chu Pathien a ni chun, ama chu zui unla; chun, Baal chu a ni chun ama chu zui ro,” a ta. Mipuihai chun bau khat khawmin an dawn nawh.

²²Chuongchun, Elija chun mipuihai kuoma chun, “LALPA zâwlnei la um chu keima chau hi ka na, Baal zâwlneihai ruok chu mi za li le sâwmnga an nih.

²³Chuongchun, bâwngchal pahni mi hung pe hai sienla, anni chun bâwngchal pakhat chu an puol dingin thlang hai sienla, chan nawi hai sienla, thing chungah sie hai sienla, a hnuoia mei sêm lovin; chun, keiin bâwngchal pakhat chu buotsai vêng ka ta, thing chunga chun sieng ka ta, mei sêm bîk naw ning ah.

²⁴Chun, nangni chun in pathien hming chu lam unla, kei khawma LALPA hming lam ka ta, chuongchun, meia hung dawntu Pathien taphawt chu Pathien ni raw se,” a ta. Chun, mi po po chun an dawn a, “Ân dik a nih,” an ti tâwl a.

²⁵Chuongchun, Elija chun Baal zâwlneihai kuoma chun, “Nangnîn bâwngchal pakhat hi in puola dingin thlang unla, buotsai hmasa ro, nangni chu in tam deu hi; in pathien hming chu ko unla, amiruokchu, a hnuoiah mei chu sêm naw ro,” a ta.

²⁶Chun, bâwngchal an puol chu an lâk a, an buotsai ta a, “Aw Baal, mi hung dawn raw khai,” tiin zîngkâra inthawka sûn chenin Baal hming chu an ko a. Nisienlakhawm, riva iengkhawm a um dêr naw a, a dawntu hrim hrim hlak an um bawk nawh. Chun, an maichâm siem vêla chun an inchâwm an inchâwm el a.

²⁷Chun, sûnlai tak chun Elija chun anni chu tielin, “Khêk inring ta unla, pathien a ni si a, ân ngaituo hri amanih, annawleh a in hlau a, sukṭhang ding amani khawm nîng a tih,” a ta.

²⁸Chun, inringtak takin an khêk a, an thaw hlak angin chemtê le feihaiin an thi suok zawt zawt khawpin an inâtin an insun a.

²⁹Chun, nisa a hung inher chun zân tieng inthâwi hun chen ding hin an hril ruol duol duol zing a, nisienlakhawm, râwl riva hrim hrim a um naw a, dawntu ding hrim hrim amanih, a lo ngaisaktu hrim hrim amani khawm an um bawk naw a.

³⁰Chuongchun, Elija chun mipuihai po po kuoma chun, “Mi hung hnai ta u khai,” a ta; chun, mipuihai po po chun an va hnai a. Chun, LALPA maichâm sukchim ta hnung chu a siemṭha a.

³¹Chun, “I hming chu Israel nîng a tih,” ti lo dawngtu Jakob nauhai hnam zât lung sâwm le pahni Elija chun a lâk a.

³²Chuong lunghai chun LALPA hmingin maichâm a siem a; maichâm vêl chu bu chi tekhâwng hni inleng ding zet hin a cho khur a.

³³Chun, thing chu a hang sep fel a, bâwngchal chu a chan nâwi a, thing chunga chun a sie a. Chun, “Bêl pali tuiin suksip unla, pumrawhmang thil inhlân le thing hi hung buokkhum ro,” a ta.

³⁴Chun, “Hung buokkhum nâwk ro,” a ta. An hang buokkhum nâwk a. Chun, “A vawithumna dingin hung buokkhum nâwk ro,” a ta; chun, a vawithumna ding chun an thaw nâwk a.

³⁵Chun, tui chu maichâm vêla chun a luong ta dum dum a; chun, cho khur chu tuiin a suksip bawk a.

³⁶Chun, zântienga inthâwi hun lai chun zâwlnei Elija chun a va pan hnai a, “Aw LALPA, Abraham hai, Isaak hai, Israel hai Pathien, nang hi Israel rama Pathien i ni le, kei hi i siehlaw ka na, hieng po po hi nangma thua thaw ka ni ti vawisûn hin hre tâwl raw hai se.

³⁷Mi lo ngaipêk la, hieng mipuihai hin nang LALPA hi Pathien i na, an lungrilhai în lettir nâwk tah a ni ti an hriet theina dingin aw LALPA, mi lo ngaipêk rawh,” a ta.

³⁸Chuongchun, LALPA mei chu a hung tla a, pumrawhmang thilinhlân dâm, thing dâm, pilvut dâm, lung dâm chu a kâng hmang a, cho khur a tui khawm chu a hîp kang ta vawng a.

³⁹Chun, mipuihai po poin chu chu an hei hmu chun an bawkkhup a, “LALPA hi a lo nih, Pathien chu, LALPA hi a lo nih, Pathien chu,” an ta.

⁴⁰Chun, Elija chun an kuomah, “Baal zâwlneihai hi man unla, pakhat khawm insuo naw ro,” a ta. Chun, an man a, Elija chun Kison vadunga chun a ṭhuoi thlâk a, chutaka chun a that tâwl a.

⁴¹Chuongchun, Elija chun Ahab kuoma chun, “Hang fe la, fain hang dâwn ta rawh, ruopui sûr ding ri a um a nih ie,” a ta.

⁴²Chuongchun, Ahab chu fa le dâwn dingin a hang fe ta a. Chun, Elija chu Karmel tlâng sîp tieng chun a hang fe a; hnuoi tieng a kûn a, a kap kâra chun a hmai a rawl a.

⁴³A siehlaw kuoma chun, “Hang fe la, tuisuoriet tieng hang thlîr ta khai,” a ta. Chun, a hang fe a, a hang thlîr a, “Iengkhawm a um nawh,” a ta. Ama chun, “Fe nâwk rawh, vawi sari chen,” a ta.

⁴⁴Chun, a vawi sarinaa chun, “Ngai ta, tuipuia inthawkin mihriem kut ruol chau hi sûm a lâwn kai nel nel el,” a ta. Ama chun, “Hang fe la, Ahab kuomah, ‘I tawlailîr buotsai la, fe thla ta rawh, ruoin dang rawi a ti che,’ ti rawh,” a ta.

⁴⁵Chun, sâwt nawtêa chun vân chu thli le sûmin a hung dum ta khup el a, ruopui vânâwn a hung sûr ta a. Chun, Ahab chu tawlailîra chuongin Jezreel khuoah a fe ta a.

⁴⁶Chun, LALPA kut chu Elija chunga chun a um a; chuongchun, a dier a kei a, Ahab hmaa chun Jezreel khaw lûtna chenin a tlân ta a.