Read Hmar 1 LALHAI 19 Bible Online

1 LALHAI 19 - Hmar bible

1 LALHAI 19

¹Ahab chun Elija thilthaw po po, kâwl hnâma zâwlneihai po po a that thuhai leh Jezebel chu a hril a.

²Chuongchun, Jezebel chun Elija kuomah, “khâng mihai laia mi pakhat hringna anga zîngah hieng tik phât hin i hringna ka siempêk ve naw che chun pathienhai chun an law law mi law el hai sienla, chu nêka nasa lem khawm a,” tiin mi a tir a.

³Chuongchun, a ṭi a, a tho a, a tlânse ta a, Judai rama Beer-seba khuo a va tlung a, chutaka chun a siehlaw chu a mâksan a.

⁴Ama ruok chu thlalêrah ni khat lama hlaah a fe a, Juniper thing hnuoia hin a ṭhung a, thi a hni ta a, “A hun tah ie, aw LALPA, tuhin ka hringna hi la el ta, ka puhai nêkin ka ṭha chuong bîk si naw a,” a ta.

⁵Chuongchun, Juniper thing hnuoia chun a zâl a, a in ta a; chun, ngai ta, vântirko hin a hung them a, a kuomah, “Tho la, fa rawh,” a ta.

⁶Chun, a hei en vêl a, ngai ta, a luthluona chun beiphêk lungsaa em hmin diem le tuiûm hi a lo um a. Chuongchun, a fâk a, a dâwn a, a zâl nâwk ta a.

⁷Chun, LALPA vântirko chu a hung nâwk a, a hung them a, “Tho la, fa rawh, i fena ding i ta dingin lam hla a nih,” a ta.

⁸Chun, a tho a, a fâkin a dâwn a, chuongchun, chu bu lei chun Pathien tlâng Horeb chenin ni sâwmli le zân sâwmli a fe a.

⁹Chun, chutaka pûk pakhat a va tlung a, chutaka chun a um ta a; chun, ngai ta, LALPA thu a kuomah a hung tlung a, a kuomah, “Hitaka hin ieng am i thaw a, Elija?” a ta.

¹⁰Ama chun, “LALPA sipaihai Pathien ta ding hin ṭhahnem ka ngai êm êm hlak a, Israel thlahai hlak chun i thuthlung an nghatsan a, i maichâmhai an sukchim a, i zâwlneihai kâwlhnâmin an sâthlum si a; a la um chu kei bak hi ka na, ka hringna mi lâkpêk an tum a nih,” a ta.

¹¹Ama chun, “Va suok la, tlânga sawn LALPA hmaah va ngîr rawh,” a ta. Chun, ngai ta, LALPA chu a hung a, thlipui hrâttakin tlâng dâm chu LALPA hmaa chun a hung mût kak a, lungpuihai chu a kawi remrum a, nisienlakhawm, thlia chun LALPA chu a um nawh; chun, thli hrâng zo chun simkhawleihnuoi a hung inhnîng a; nisienlakhawm, simkhawleihnuoi inhnînga chun LALPA chu a um nawh;

¹²Chun, simkhawleihnuoi in- hnîng zo chun mei a hung suok a, nisienlakhawm, meia chun LALPA chu a um nawh;

¹³chun, mei zoa chun râwl innêmtak el hi a hung suok a, chun, Elija chun chu chu a hriet chun a puonin a hmai ân khum a, a va suok a, pûk baua chun a va ngîr a. Chun, ngai ta, râwl chun a kuomah, “Hitaka hin ieng am i thaw a, Elija?” a hung ti a.

¹⁴Chun, ama chun, “LALPA sipaihai Pathien ta ding hin ṭhahnem ka ngai êm êm hlak a, Israel mihai hlak chun i thuthlung an nghatsan a, i maichâmhai an sukchim a, i zâwlneihai kâwlhnâmin an sât hlum si a; a la um chu keima bak hi ka na, ka hringna mi lâkpêk an tum a nih,” a ta.

¹⁵Chun, LALPAIN a kuomah, “Fe nâwk ta la, thlalêr tieng Damaska khuoah fe rawh; i va tlung chun Suria lal dingin Hazael hriek nâl i ta;

¹⁶chun, Israel lal dingin Nimsi naupa Jehu chu hriek nâl bawk i tih; chun, nanga aiawa zâwlnei ni dingin Abelmehola khuoa mi Saphat naupa Elisa hriek nâl bawk i tih.

¹⁷Chun, Hazael kâwlhnâm pumpel taphawt chu Jehu chun that a ta, Jehu kâwlhnâm pumpel taphawt chu Elisa chun that a tih.

¹⁸Nisienlakhawm, Israel rama hin Baal hmaa la dingṭhaṭhuon ngailo le, la fâwp ngailo mi sâng sari ka ta dingin ka hum ding a nih,” a ta.

¹⁹Chuongchun, chutaka inthawk chun a suok ta a, Saphat naupa Elisa chu a va hmusuok a, ama chun hnuoi a lo inlet a, a hmaa chun sebâwng tuok sâwm le tuok hni a um a, a sâwm le pahnina chu ama chun a lo khal a; chun, Elija chun a va pan a, a puon chu a vân bâttir a.

²⁰Chun, sebâwnghai chu a mâksan a, Elija chu a hnawt ta a, “Ka nu le ka pa la va fâwp hri phawt ka ti aw, chuongchun, hung zui ka ti che,” a ta. Ama chun a kuomah, “Va fe nâwk phawt ta la, ieng am ka thawpêk che a?” a ta.

²¹Chun, ama a va zui chu a kîr a, sebâwng tuok khat a khal chu a that a, a sa chu sebâwng thuomhnawhai chun a suong a, mihai kuomah a sem a, an fâk ta a. Chuongchun, a tho a, Elija chu a zui a, a rawng a bâwlpêk ta a.