Read Hmar 1 LALHAI 2 Bible Online

1 LALHAI 2 - Hmar bible

1 LALHAI 2

¹David thi hun chu a hung hnai ta a, a naupa Solomon chu thu a pêk a,

²“Leihnuoi po po dân angin ka fe ve ding a ni ta a, chuongchun, hrâttakin um la, patlingtakin um rawh,

³i thilthaw taphawta le i nghatna tieng poa i tluongtlung theina dingin Mosie Dân ziek anga, LALPA i Pathienin a lampuihai hraw ding le, a thuruot dâm, a thupêk dâm, a rorêlhai dâm le, a thuinhriettir pawm dinga a pêkhai hi zâwm rawh;

⁴LALPAIN ka chungchâng thua, ‘I thlahaiin an lungril tak le, an lungvar taka ka mithmua thutaka um dinga an umdân an fîmkhur chun Israelhai lalṭhungphaa ṭhung ding tlasam naw ti ni,’ tia a hril kha a sukdet ding a nih.

⁵Chun, Zeruia naupa Joab mi thawzie, Israelhai sipai hotu pahni Nera naupa Abner le Jether naupa Amasa hai a thawzie ngei kha i hriet a. Khânga a that a, inrem laia indo lai thisen insuoin ân suo a, a kâwnga a kâwngkhi le a kekawk buna indona thisen a sukkaizie hai kha.

⁶Chuongchun, i rem hriet dân angin thaw la, a lua kêlsam ṭo hi thlânah lungmuongtakin inliemtir naw rawh.

⁷Gilead mi Barzillai nauhai chunga ruok chun lunginsietna inlangtir la, i dawkâna thlaithlêng awttuah inṭhangtir ve rawh; i unau Absalom leia ka tlân hmang lai khan ka kuomah an hung si a.

⁸Chun, Bahurim khuoa mi Benjamin thla, Gera naupa Simei hi i kuomah a um a, ama chun Mahanaim hmuna ka fe lai khan ṭawngsie ṭha nawtak a mîn phur a; amiruokchu, Jordana khan mi tuok dingin a hung thla a, chutaka chun ‘Kâwlhnâmin that naw ning che,’ tiin LALPA hming sâlin ṭawng ka lo inkhâm ta a.

⁹Chuongchun, thiemchang chun chu insuo naw rawh, mi var i ni si a, a chunga ieng anga thaw ding am a na ti hre el i tih; a lua kêlsam ṭo chu thisen leh thlânah în liemtir ding a nih,” a ta.

¹⁰Chun, David chu a puhai kuoma chun a in innghil ve ta a, David khawpuia chun an phûm a.

¹¹Israelhai chunga David inlal sûng chu kum sâwmli a na, Hebron khuoah kum sari ân lal a, Jerusalem khuoah kum sâwmthum le kum thum ân lal .

¹²Chun, Solomon chu a pa David lalṭhungphaa chun a ṭhung a, chuongchun, a ram chu nasataka suknghetin a hung um ta a.

¹³Chun, Haggith naupa Adonija chu Bathseba Solomon nu kuomah a fe a, ama chun, “Ṭha tieng thua hung am i nih?” a lo ti a.

¹⁴Chun, ama chun, “Ṭha tieng thuah nih e,” a ta. Chun, “I kuomah ieng am a nih hril ding ka nei a,” a ti nâwk a. Ama chun, “Hril ta la,” a ta.

¹⁵Chun, ama chun, “Ram hi ka ta a ni tah ti le, Israelhai po po khawm hin keima hi lal dingin an mi thlîr zing a nih ti i hriet a, amiruokchu, ram chu ka unaupa ta dingin a hung inlet ta lem a; LALPA lo ruot dânah a ta a ni hrim a nih.

¹⁶Tuhin thil pakhat hni ding che ka nei a, mi remti nawpêk naw hrâm rawh,” a ta. Chun, ama chun a kuomah, “Hril ta la,” a ta.

¹⁷Chun, ama chun, “Ka hni che a nih, lal Solomon kuoma chun hril la, (i thu chu a sêl âwm si naw a) Sunam mi Abisag hi nuhmeiah mîn neitir raw se,” a ta.

¹⁸Chun, Bathseba chun, “Aw le, lal chu lo bepêk ka ti che,” a ta.

¹⁹Chuongchun, Bathseba chu Adonija va bepêk dingin lal Solomon kuoma chun a fe ta a. Chun, lal chu ama lo lâwm dingin a tho a, a hmaa chun a kûn a, a lalṭhungphaa chun a ṭhung a, chun, lal nu ta ding chun ṭhungpha ân sietir a; a changtienga chun a ṭhung ta a.

²⁰Chuongchun, “Thil pakhat chiterek ka hni ding che a nih, mi remti nawpêk naw hrâm rawh,” a ta. Chun, lal chun a kuomah, “Hni ta la, nu, remti nawpêk naw tawp ka ti che,” a ta.

²¹Chun, ama chun, “Sunam mi Abisag hi i unaupa Adonija nuhmeiah inneitir rawh,” a ta.

²²Chun, lal Solomon chun a dawn a, a nu kuoma chun, “Iengtiziea Sunam mi Abisag hi Adonija ta dinga hni am i ni leh? Ram khawm hi hnipêk law law ta la; ama chu ka u a ni annâwm, ama ta ding le thiempu Abiathar ta ding le Zeruia naupa Joab ta ding khawma hni raw chu,” a ta.

²³Chuongchun, lal Solomon chun, “LALPA hming sâlin, Adonija thil hni hin ama chunga thina thuhril a ni naw tâkleh, Pathienin a law law mi law el sienla, chu nêka nasa khawm a.

²⁴Chuongchun, LALPA a thutiem anga mi sukdet a, ka pa lal David lalṭhungphaa mîn ṭhungtir a, sungkuo mi lo inngîrpêktu hringna sâlin ka hril hi, Adonija hi vawisûn le le hin sukhlum nghâl ding a nih,” a ti a; ṭawng ân khâm ta a.

²⁵Chuongchun, lal Solomon chun Jehoiada naupa Benaia chu a tir a, ama chu a va thaw a, a thi ta a.

²⁶Chun, thiempu Abiathar kuoma chun lal chun, “Anathoth khuoa nanga in le loah fe dai rawh, thi tlâk chu i ni ngei a, amiruokchu, ka pa David hmaa LALPA Pathien bâwm i lo zâwn hlak lei le, ka pa rinum tuornahai po poa chun i lo tuor ve ta hlak leiin tuhin chu chu la sukhlum hri naw ning che,” a ta.

²⁷Chuongchun, Solomon chun Abiathar chu LALPA thiempu a nina chu a bân ta a; LALPAIN Silo khuoa Eli sûnghai chungchâng thu a hril kha ân tlungtir theina dingin.

²⁸Chun, chu thu chu Joab chun a lo hriet a, Joab chu Absalom tieng khan a ṭhang naw a chu, Adonija tienga ṭhang a ni si a. Chuongchun, Joab chu LALPA Puon inah a tlân a, maichâm kihai chu a va chel ta a.

²⁹Chun, “LALPA puon inah Joab a tlân a, ngai ta, maichâm bulah a um,” tiin lal Solomon chu an hril a. Chuongchun, lal Solomon chun Jehoiada naupa Benaia chu, “Hang thaw rawh,” tiin a tir a.

³⁰Benaia chu, LALPA puon ina chun a hang fe a, a kuoma chun, “Lalin, ‘Hung thla raw se’, a tih” a ta. Ama chun, “Ni lo e, hitaka hin thi el lem ka tih,” a ta. Benaia chun, “Joab chun hieng ang hin a lo ti a, hieng ang hin a mi lo dawn a nih,” tiin lal kuomah thu ân tlun nâwk a.

³¹Chun, lal chun a kuomah, “A hril ang chun hang thaw la, phûm rawh, a san um dêr lova Joabin thisen ân suoa inthawka kha kei le ka pa sûnghai chu i sukfihlîm theina dingin.

³²Chuongchun, ama nêka mi ṭha lem le mi fel lem pahni Nera naupa Abner, Israelhai sipai hotu le, Jether naupa Amasa, Judahai sipai hotu kha ka pa David hriet lova a thaw a, kâwlhnâma a that leiin LALPAIN a thisen chu ama lu chung ngeiah hung inlêttir a tih.

³³Chuongchun, an thisen chu Joab lu chung le a thlahai lu chungah kumkhuoin lêt a ta, David chunga dâm, a thlahai chunga dâm, a sûnghai chunga dâm, a lalṭhungpha chunga dâm ruok chun LALPA kuoma inthawka lungmuongna kumkhuoin um zing lem a tih,” a ta.

³⁴Chuongchun, Jehoiada naupa Benaia chu a hang fe a, a hang thaw a, a that ta a; chun, thlalêra ama ina chun an phûm ta a.

³⁵Chun, lalin Jehoiada naupa Benaia chu sipaihai chungah a ai ân awtir a, chun, thiempu Zadok chu lalin Abiathar ai ân awtir a.

³⁶Chun, lalin Simei chu ân kotir a, a kuomah, “Jerusalema hin in bâwl la, chutaka chun um la, chutaka inthawk chun khâwlai dang khawm suok naw rawh.

³⁷I suok ni, Kidron vadung i kân ni le le chun i thi ngei ding a nih ti hre raw khai, chun, i thisen chu nangma lu chunga ngei um a tih,” a ta.

³⁸Simei chun lal kuomah,“An dik ie, lal ka puin a hril ang chun i siehlaw hin thaw pei a tih,” a ta. Chun, Simei chu Jerusalema chun sâwt rei chu a um a.

³⁹Chun, kum thum ân vawi hnung chun Simei siehlawhai pahni chu Gath khaw lal Maaka naupa Akis kuomah an zâm a. Chun, “Ngai ta, i siehlawhai chu Gath khuoah an um,” tiin Simei chu an hril a.

⁴⁰Simei chu a tho a, a sabengtung chu a buotsai a, siehlawhai zawng dingin Gath khuoa Akis kuoma chun a fe ta a; chun, Simei chun Gath khuoa inthawk chun a siehlawhai chu a va ṭhuoi ta a.

⁴¹Chun, Simei chu Gath khuoah a va fe a, Jerusalemah a hung nâwk tah, ti Solomon chu an hril a.

⁴²Chun, lal chun Simei chu ân kotir a, a kuomah, “ ‘I suok ni, ram danga i suok ni le lein i thi ngei ding a nih,’ ti khan LALPA hming sâlin ṭawng kân khâmtir chein, kân hriettir che a ni naw am a nih? chun, nang khawma ka kuomah, ‘I thu hril ka hriet hi a ṭha ie,’ i ti kha.

⁴³Iengdinga LALPA ṭawng inkhâm le thu ka pêk che kha hlen lo am i ni a?” a ta.

⁴⁴Chun, lal ma chun Simei kuomah, “I lungril sûng rîtlozie, ka pa David chunga i thawziehai kha i hriet vawng a, chuongchun, LALPAIN i rîtlona hi nangma lu chunga ngei hung inlêttir a tih.

⁴⁵Lal Solomon ruok chu malsâwmin um a ta, David lalṭhungpha chu LALPA hmaah kumkhuoa sukdet ning a tih,” a ta.

⁴⁶Chuongchun, lal chun Jehoiada naupa Benaia chu thu a pêk a, ama chu a va thaw a, a that ta a. Chuongchun, ram chu Solomon kuta suknghetin a um ta a.