Read Hmar 1 LALHAI 5 Bible Online

1 LALHAI 5 - Hmar bible

1 LALHAI 5

¹Chun, Tura lal Hiram chun Solomon kuoma chun a siehlawhai a tir a, a pa aia lal dingin hriek an nâl ti a lo hriet si a; Hiram chu David ngainatu a ni rawp hlak hrim a.

²Chun, Solomon chun Hiram kuoma chun,

³“Ka pa David khan LALPAIN a hmêlmahai a ke hnuoia a sie hmakhat khan chu a vêl kil tin kil tanga indonahai lei khan, LALPA a Pathien hming dingin in a bâwl thei nawh ti i hriet a.

⁴Tu ruok hin chu LALPA ka Pathien chun kil tinah muongna a mîn neitir ta a, hmêlmahai khawm an um ta naw bawk a.

⁵Chun, LALPA chun ka pa David kuoma, ‘I naupa i aia i lalṭhungpha kân hluotir ding chun ka hming dingin in chu la bâwl a tih,’ tia a lo hril ta ang khan, LALPA ka Pathien hming dinga in bâwl ka tum a.

⁶Chuongchun, Lebanon tlânga mi sidar thinghai mi phûrpêk dingin thu pe la, ka siehlawhai khawm i siehlawhai lai hung ṭhang vêng an ta; chun, i siehlawhai hlaw ding chu i hril ang taphawtin pe pei ka ti che; Zidon mihai anga thing phûr thiem keini lai tukhawm an um nawh ti i hriet si a,” tiin mi a tir a.

⁷Chun, Hiramin Solomon thu a lo hriet chun a lâwm ta êm êm el a, “Hieng mi tamtak chunga rorêl dinga naupa vartak David kuoma petu LALPA chu vawisûn hin inpâkin um raw se,” a ta.

⁸Chun, Hiram chun Solomon kuomah, “I thu mi hung incha chu ka lo hriet a, sidar thing thu le fâr thing chu i mamaw ang peiin lo thâwng ka tih.

⁹Ka siehlawhaiin Lebanon tlânga inthawkin tuisuoriet chenin hung la thlâng an ta; chun, i hmun mi ruotpêk dinga tuisuorieta tawl dingin intêltir ka ta; chun, chu hmuna chun insuttir ka ta, nangin lo lâng i ta; chun, nang khawma ka sûngkuohai fâk ding tumin ka mamaw chu i lo phuhrûk ve thung ding annâwm,” tiin mi a tir a.

¹⁰Chuongchun, Hiram chun sidar thing le fâr thing chu Solomon chu a mamaw ang ang chun a pêk a.

¹¹Chun, Solomon chun Hiram chu a sûngkuohai fâk dingin bu tekhâwng sîng hni le hriek sâwr tekhâwng sâwmhni a pêk a, chu chu Solomonin kum tina Hiram a pêk ang dân chu a nih.

¹²Chun, LALPAIN a tiem ang ngeiin Solomon chu varna a pêk a, chun, Hiram le Solomon inkâra chun inremna a um a, an pahni chun thu an thlung ve ve ta a.

¹³Chun, lal Solomon chun Israel mihai po po laia chun mi sinthawa ruoi lui pâwl a siem a; ruoi lui pâwl chu mi sîng thum an nih.

¹⁴Lebanona chun thla khata inthlâk peiin sîng khat a tir hlak a, thla khat Lebanona chun an hang um a, thla hni chu anni in tieng, Adoniram chu sinthawa sawr luihai hotu a nih.

¹⁵Chun, Solomon chun thil phur mi sîng sari le, lung sut mi sîng riet tlânghaia chun a nei a;

¹⁶Chuonghai chu tiem lovin Solomon chun a sin chunga hotubîk, sinthaw vêngtu sâng thum le za thum a nei bawk a.

¹⁷Chun, lal thupêk angin lungphûm chu lung sutsaa rem dingin lung lientak tak el, lung man tamtak takhai an hung lâk a.

¹⁸Chun, in bâwltuhai Solomon mihai le Hiram mihai le Gebal mihai chun lunghai chu an sut a, in bâwlna ding chun thing le lunghai chu an buotsai a.