Read Hmar 1 LALHAI 6 Bible Online

1 LALHAI 6 - Hmar bible

1 LALHAI 6

¹Israel thlahai Aigupta rama an suok chena inthawk kum za li le kum sâwmrietna kum, Israelhai chunga Solomon inlal kum lina, Ziv thla, thla hninaa chun LALPA in bâwl chu a ṭan a.

²Chun, Solomonin LALPA ta dinga a in bâwl chu a dung tieng tawng sâwmruk a na, a khang tieng chu tawng sâwmhni a na, ân sâng tieng chu tawng sâwmthum a nih.

³Chun, chu ina Hmun inthieng hmaa tuolpûk chu a in khang tieng chen tawng sâwmhnia sei a na, a hma tienga mi khang tieng chu tawng sâwm a nih.

⁴Chun, ina chun tukverhai a sûnga inthawka a puotienga chîn zuihai chu a siem a.

⁵Chun, in bang vêlin, biekna in bang vêla khawm, biekna hmun inthieng bang vêla khawm chun, chu in bang sik chun in sâwng nei a bâwl a; chun, a vêl el chun pindanhai a siem a;

⁶a sâwng hnuoi hnung tak chu a khang tieng tawng nga a na, a laia mi chu a khang tieng tawng ruk a na, a pathumna chu a khang tieng tawng sari a nih; kalkhanghai chu in banga chun rawl ngai loin, a puotienga chun a vêlin a bang hrûla chun ân nghatna a siem a.

⁷Chun, in chu an bâwl lai chun, lung a chona hmuna sut sa vawnga bâwl a na, chuongchun, an bâwl sûng po chu tubau ri dâm, hreipui ri dâm, thîr hriemhrei ri hrim hrim chu ina chun hriet a ni naw a.

⁸Pindan lailungtakhai kawtkhâr chu, chu in changtieng panga chun a um a, a laia chun kailâwn inhera hin an lâwn kai a; chun, a lailunga inthawk chun a pathumnaah.

⁹Chuongchun, in chu a hang bâwl a, a zo ta a, in chu sidar tlungpûm le a phêkin ân khum a.

¹⁰Chun, a in sâwng neihai chu in sik vawngin tawng nga senga insângin a bâwl a; chuonghai chu in le chun sidar thinga zawm a nih.

¹¹Chun, LALPA thu chu Solomon kuomah a hung tlung a,

¹²“Hi in bâwl lai mêk chungchâng thu hi ka thuruothai i pawm a, ka rorêlhai i zâwm a, ka thupêk po pohai zâwm dinga i pawm phawt chun, i pa David kuoma ka lo hril tah ka thu kha i chungah sukdet ka tih.

¹³Chun, Israel mihai laia hin chêng ka ta, ka mi Israelhai hi thlathlam naw ning ah,” tiin.

¹⁴Chuongchun, Solomon chun in chu a bâwl a, a zo ta a.

¹⁵In sûng tienga bang ding chun sidar thingphêk a hmang a, a ṭuonga inthawka a inchung thuo bang chen chun thingphêk a bel vawng a, a ṭuonga chun fâr thing phêk a pha sa a.

¹⁶Chun, in chawrtieng pang tawng sâwmhni chu a ṭuonga inthawka a bang chenin sidar thingphêkhaiin a siem vawng a, a biekna hmun, Hmun Inthieng tak ta ding khawm chun a sûngtienga chun a hmang a.

¹⁷Chun, biekna hmun hma tieng biek in sûng chu a dung tawng sâwmli a na.

¹⁸Chun, insûng tienga chun a kumûm le a pâr, pâr lima ker mawi sidar thing a um a, a rêng chun sidar thing vawng a nih; lung hrim hrim ân lang naw a.

¹⁹Chun, LALPA thuthlung bâwm siena dingin a sûngah hmun inthiengtak a buotsai a.

²⁰Chun, chu hmun inthiengtak chu a dung tieng tawng sâwmhni, a khang tieng tawng sâwmhni, ân sâng tieng tawng sâwmhni a nih; chu chu rângkachak hlirhlakin ân luon a; chun, sidar maichâm chu ân luon bawk a.

²¹Chuongchun, Solomon chun chu in sûng tieng chu rângkachak inthiengin ân luon vawng a; chun, hmun inthiengtak hma tieng chu rângkachak khaidiethaiin a daidan a; chu chu rângkachakin ân luon a.

²²Chun, in chu a rênga a zo chenin a pumin rângkachak inthiengin ân luon pei a; hmun inthienga maichâm pumpui khawm chu rângkachak inthiengin ân luon a.

²³Chun, hmun inthienga chun tawng sâwmhni ve vea insângin cherub pahni Oliv thingin a siem a.

²⁴Cherub thla pakhat chu tawng nga a na, cherub thla khingtieng chu tawng nga bawk a nih; thla pakhat hmawra inthawka thla khingtieng hmawr inkâr chu tawng sâwm a nih.

²⁵Cherub pakhat insângtieng chu tawng sâwm a na, cherubhai chu intie chie le pieng dân inang ve ve a nih.

²⁶Cherub pakhat insâng tieng chu tawng sâwm a na, cherub pakhat khawm chu, chu chen bawk chu a nih.

²⁷Chun, cherubhai chu insûng ril lema chun a sie a; chun, cherubhai thla chu ân zar a, pakhat thla chun bang khingtieng a va tâwk a, cherub pakhat thla khawm chun bang khingtieng chu a tâwk bawk a; chu in lailungtaka chun an thla le an thla chu ân tâwk a.

²⁸Chun, cherubhai chu rângkachak inthiengin ân luon a.

²⁹In bang po po chu a vêlin cherubhai intûm thing le pâr par ta sa limhai leh, ker mawiin sûngtieng le a puotienga chun a siem a.

³⁰A in ṭuong chu sûngtieng le a puotienga chun rângkachak inthiengin ân luon a.

³¹Chun, hmun inthiengtak lûtna dinga chun Oliv thingin kawtkhâr a siem a, kawtkhâr lu chung le kawtkhâr bienghai chu a bang hmun ngaa ṭhea hmun khat tie a nih.

³²Chuongchun, Oliv thingin kawtkhâr pahni a siem a, chutaka chun cherubhai, intûm thing le pâr par tasahai lim dâm ker mawiin a siem a, chuong chu rângkachakin ân luon a; chun, cherubhai le intûm thinghai chu rângkachak a nâl a.

³³Chun, biekin lûtna dingin bang hmun lia ṭhea hmun khat ruolin Oliv kawtkhâr ban a siem bawk a,

³⁴fâr thing kawtkhâr pahni leh; kawtkhâr pakhata phêk hni chu thlep thei a na, kawtkhâr pakhata phêk hnihai khawm chu thlep thei ma a nih.

³⁵Chuonghaia chun cherubhai, intûm thinghai pâr par tasahai lim chu a ker a, chuong ker mawihai chu nâmtakin rângkachakin ân luon a.

³⁶Biekin huon sûng tuollai sûngril lem chu lung sut sâwng thum le sidar thingphêk thuo khatin a siem a.

³⁷A kum lina Ziv thlaa chun LALPA in lungphûm chu rem a na,

³⁸chun, kum sâwm le kum khatna Bul thla, thla rietnaah in chu remruot ang chiein, a iengkim chu zo vawng a na. Chuongchun, kum sari sûng a bâwl a nih.