Read Hmar 1 LALHAI 9 Bible Online

1 LALHAI 9 - Hmar bible

1 LALHAI 9

¹Chun, Solomon chun LALPA in le lal in a bâwl a, Solomon chun a tum po po hrâttaka a thaw zo vawng hnung chun,

²Gibeon khuoa a kuoma ân lâr ang khan LALPA chu Solomon kuomah a hung inlâr nâwk a.

³Chun, LALPA chun a kuomah, “I ṭawngṭaina le i hnina ka hmaa i hung intlunhai kha ka lo ngai a, hi in i bâwl hi kumkhuoa ka hming inumtirna dingin ka sukthieng tah; ka mit le ka lungril chu chutaka chun kumkhuoin um tâng a tih.

⁴Chun, nang khawm hi thu ka pêk ang taphawt chea thaw dinga i pa David um anga lungril ṭhatak put le lungril indiktak puta ka mithmua i uma, ka thuruothai le ka rorêlhai i pawm zing chun.

⁵Israelhai chunga hin i ram lalṭhungpha chu kumkhuoa dingin suknghet ka tih, i pa David kuoma, ‘Israelhai lalṭhungphaa ṭhung ding tlasam naw ti nih,’ tia ka lo tiem ta ang khan.

⁶Amiruokchu, nangniin amanih, in thlahaiin amanih in mi zui chu in mi kîrsan a, ka thupêkhai le ka thuruothai kân hriettirhai cheu hi in pawm naw a, pathien danghai rawng dâm in va bâwl a, in va biek chun,

⁷Israelhai hi ram ka pêka inthawk hin sukbohmang ka ta; chun, hi in ka hming dinga ka sukthieng ta sa hi ka mithmu phâk nawah sawnhmang dai ka tih; chuongchun, Israelhai hi hnam tinrênghai laia chun tielna le a se tieng hrilkhinaa hmang la nîng an ta;

⁸chun, hi in hi insâng hle sienkhawm, a fe khêl taphawthai chun maktiin lân hui an ta, ‘Iengdinga LALPAIN hi ram le hi in hi hieng ang lâwma a thaw am a na?’ la tîng an tih.

⁹Chun, mihaiin, ‘LALPA an Pathien, an puhai Aigupta rama inthawka ṭhuoi suoktu kha an mâksan a, pathien danghai an chel a, an biek a, an rawnghai an bâwl ta lei a nih; chuleiin, LALPAIN hieng sietna po po hi an chungah a hung intlungtir tah a ni hi,’ tiin la dawn an tih,” a ta.

¹⁰Chun, Solomon chun in pahni, LALPA in le lal in a bâwl sûng, kum sâwmhni an vawi hnungin

¹¹(Tura lal Hiram chun Solomon chu sidar thinghai, fâr thinghai, rângkachakhai a mamaw taphawt a tum vawng a na,) lal Solomon chun Hiram chu Galili rama khaw sâwmhni a pêk a.

¹²Chun, Hiram chu Turaa inthawk chun Solomonin khuo a pêkhai chu en dingin a suok a, a ditzâwng a ni naw hle a.

¹³Chun, ama chun, “Ka unaupa, hieng i khaw mi pêkhai hi ieng khuo am an ni tâwl leh?” a ta. Chuongchun, tu chen hin Kabul ram an ti tah a nih.

¹⁴Chun, Hiram chun lal chu rângkachak talent za le sâwmhni a thawn a.

¹⁵Lal Solomonin sinthawa ruoi lui pâwl a siemna san chu hi hi a nih; LALPA in le ama in bâwltu ding le, Millo dâm, Jerusalem kul dâm, Hazor khuo dâm, Megiddo khuo dâm, Gezer khuo dâm siemtu dingin a nih.

¹⁶Aigupta lal Pharao chu a hang fe a, Gezer khuo a hang lâk a, a raw a, chu khuoa um Kanaan mihai chu a that a, a naunu Solomon nuhmei chu thuom thilpêka a lo pêk tah a nih.

¹⁷Chun, Solomon chun Gezer khuo dâm, Beth-horon khuo thlang hnung lem dâm,

¹⁸Baalath khuo dâm, Israel rama thlalêr rama Tamar khuo dâm,

¹⁹Solomonin thil siekhâwmna a nei khuo po po dâm, a tawlailîr siena khuo dâm, a sakawr chung chuong mihai siena khuohai dâm, Jerusalem khuoa dâm, Lebanona dâm, a rorêlna ram sûng po poa Solomonin ân hawitirna dinga siem a tumhai po po chu a lo siem tah a na.

²⁰Chun, Israel thlahai ni ve lo, Amor mihai, Hit mihai, Periz mihai, Jebus mihai a la um sunhai po po kha,

²¹an thlahai chuong ramhaia la um, Israelhaiin an sukbohmang vawng thei nawhai laia chun Solomonin siehlaw, sinthawa sawr lui pâwl a siem a, tu chen hin a la nih.

²²Israel mihai ruok chu Solomon chun chuong ang siehlawa chun a siem ve naw a, indo mihai, a lusahai, a mi lienhai, a sipai hotuhai, a tawlailîr le a sakawr chung chuong mi hotuhai an ni lem a.

²³Chuonghai chu Solomona sinthaw chunga hotu bîk, za nga le sâwmnga, sinthaw vêngtuhai chu an nih.

²⁴Pharao naunu ruok chu David khawpuia inthawk chu ama in, Solomonin a bâwlpêka chun a hang fe ta a; chuongchun, Millo chu a bâwl ta a.

²⁵Chun, Solomon chun LALPA ta dinga maichâm a siema chun kum tin vawi thum pumrawhmang thilinhlân le, inremna thil inhlân ân hlân hlak a, LALPA hmaah maichâma chun riminhnikhai a raw sa bawk hlak a. Chuongchun, in chu a zo fel ta a.

²⁶Chun, lal Solomon chun Edom rama Tuipui Sen panga Eloth bula um Ezion-geber hmuna chun lawng ruol a siem a.

²⁷Chun, Hiram chun a siehlaw lawng mihai, tuipuia châng ṭhang, lawnga Solomon siehlawhai fepui dingin a tir a.

²⁸Chuonghai chu Ophira chun an va fe a, chutaka mi chu rângkachak talent za li le sâwmhni an hung phur a, lal Solomon kuoma chun an hung intlun a.