Read Hmar 2 LALHAI 1 Bible Online

2 LALHAI 1 - Hmar bible

2 LALHAI 1

¹Ahab thi hnung chun Moab ram chu Israel ram chunga chun a hel ta a.

²Chun, Ahazia chu Samaria khuoa um a in pindan chunghnung inhuonna dai âwngkâra chun a tla a, a damnaw ta a; chun, tirtâwnhai a tir a, “Fe unla, Ekronhai pathien Baal-zebub chu hi natnaa inthawk hin ka dam nâwk ding am va râwn ta u,” tiin.

³Nisienlakhawm, Tisbe mi Elija kuoma chun LALPA vântirkoin, “Tho la, Samari lal tirtâwnhai chu intuokpui dingin fe rawh; chun, an kuoma chun, Israel rama hin Pathien a um ta naw leiin amanih Ekronhai pathien Baal-zebub chu râwn dinga in fe chu?

⁴Tuhin, LALPA chun hieng hin a ti a nih, ‘Khum, i kainaa inthawk khan hung ṭum nâwk ta ngai dêr naw ti ni a, i thi ngei ngei ding a nih, a tih,’ tiin hril rawh,” a ta. Chun, Elija chu a fe ta a.

⁵Chun, mitirhai chu a kuomah an hung kîr nâwk a, an kuomah, “Iengtiziea hung kîr nâwk am in ni a?” a lo ti a.

⁶Anni chun a kuomah, “Mi pakhat keini mîn tuokpui dingin a hung a, kan kuomah, ‘Fe unla, kîr nâwk unla, lal a tirtu cheu kuoma chun hieng hin va hril ro, LALPA chun hieng hin a hril a nih, Israel rama hin Pathien a um ta naw leiin am a ni Ekronhai pathien Baal-zebub chu thu indawn dinga mi i tir chu? Chuleichun, khum i kainaa inthawk khan ṭum nâwk ta naw ti ni a, i thi ngei ngei ding a nih,’ tiin, va hril ro, a mi lo ti a,” an ta.

⁷Chun, an kuoma chun, “Nangni intuokpui dinga hung a, hieng thuhai hung hriltu cheu chu mi ieng ang hrim am a ni leh?” a ta.

⁸Anni chun, “Ama chu sahmul puon sila, a kâwng chu kâwngkhia inhrên a nih,” tiin an dawn a. Chun, ama chun, “Tisbe mi Elija kha a ni chu,” a ta.

⁹Chun, lal chun sipai sâwmnga pâwl hotu pakhat, a rawihai sâwmnga le chun a tir ta a, chun, a kuoma chun a hang fe a, ngai ta, tlâng sîpa chun ama chu a lo ṭhung a. Chun, a kuomah, “Aw nang Pathien mi, lal chun, ‘Hung thla raw se,’ a ti che,” a ta.

¹⁰Chun, Elija chun a dawn a, sipai sâwmnga pâwl hotu kuoma chun, “Pathien mi ka ni chun, vâna inthawkin mei hung thla sienla, nang le i rawihai sâwmnga kha kânghâwp vawng raw se,” a ta. Chun, vâna inthawk chun mei a hung thla a, ama le a rawihai sâwmnga chu a kânghâwp vawng ta a.

¹¹Chun, a kuoma chun sipai sâwmnga pâwl hotu dang le sâwmnga a tir nâwk a. Ama chu a hang fe a, a kuomah, “Aw nang Pathien mi, lal chun, ‘Hung thla raw se,’ a ti che,” a ta.

¹²Chun, Elija chun a dawn a, an kuomah, “Pathien mi ka ni tak zet chun, vâna inthawkin mei hung thla sienla, nang le i rawihai sâwmnga kha kânghâwp vawng raw se,” a ta. Chun vâna inthawk chun Pathien mei a hung thla a, ama le a rawihai sâwmnga chu a kânghâwp vawng ta a.

¹³Chun, sipai sâwmnga pâwl hotu le a rawihai sâwmnga ma a tir nâwk a. Chun, sâwmnga pâwl hotu pathumna chu a hang fe a, a hung a, Elija hmaa dingṭhaṭhuonin, a ngên a, a kuomah, “Aw Pathien mi, ka ngên che hi, keia hringna le hi i siehlaw sâwmngahai hringna hi i mithmua chun hlutak ni raw se;

¹⁴ngai ta, vâna inthawkin mei a hung thla a, kha sâwmnga pâwl hotu pahnihai kha, an rawihai sâwmngahai leh a kânghâwp vawng ta a; amiruokchu, tuhin ka hringna chu i mithmua chun hlutak ni raw se,” a ti a.

¹⁵Chun, LALPA vântirko chun Elija kuomah, “Ama kha zui thla la, ama kha ṭi naw rawh,”a ta. Chun, a tho a, ama chu a zui thlâk a, lal kuoma chun a fe ta a.

¹⁶Chun, a kuomah, “LALPA chun hieng hin a ti a nih, ‘Ekronhai pathien Baal-zebub chu thu indawn dinga tirtâwnhai i lo tir hi, Israel rama hin Pathien rawn ding hrim an um naw lei a ni maw? chuleiin, khum i kainaa inthawk khan ṭum nâwk ta naw ti ni a, i thi ngei ngei ding a nih,’ tiin,” a ta.

¹⁷Chuongchun, Elijân LALPA thu a hril ang ngei chun ama chu a thi ta a. Chun, naupasal a nei naw leiin Juda lal Jehosaphat naupa Jehoram inlal kum hninaa chun Jehoram chun a aia chun ro a rêl ta a.

¹⁸Chun, Ahazia thilthaw danghai a thaw tahai chu Israel lalhai inlal lai chanchin ziekna bua chun a chuong a ni naw am a nih?