Read Hmar 2 LALHAI 10 Bible Online

2 LALHAI 10 - Hmar bible

2 LALHAI 10

¹Ahab chun Samaria chun naupasal sâwmsari a nei a. Chun, Jehu chun Samaria Jezreel khaw hotu, upahai kuoma le Ahab nauhai lo enkawl tleituhai kuoma chun lekha a thawn a.

²“Hi lekha hi in hmu phingleh, in pu nauhai chu in kuoma um an na; tawlailîrhai, sakawrhai, kulpui nei khuohai dâm, râlthuomhai khawm in nei a na;

³chuongchun, in pu nauhai laia a ṭha tak le a fel tak zawng suok unla, a pa lal ṭhungphaah inṭhungtir unla, in pu sûnghai do chu dopui ro,” tiin.

⁴Nisienlakhawm, anni chun an ṭi ta êm êm el a, “Ngai ta u, lal pahni khawm khan an hne ta naw a na, einin iengtin am hne thei hlak ei ta?” an ta.

⁵Chun, lal in sûnga hotu tak dâm, khawpui awptuhai dâm, upahai le naupanghai lo enkawltuhai chun Jehu kuoma chun, “I siehlawhai kan nih, thaw dinga i mi hril ang phawt chun thaw pei kan tih; tukhawm lalah siem naw ning ung ah, nangin ṭha i ti ang angin thaw el rawh,” tiin mi an tir a.

⁶Chun, an kuomah, “Keia tienga ṭhang in na, ka thu in awi ding chun in pu naupasalhai lu hang la unla, zîngah hieng tik phât hin Jezreelah ka kuomah hung ro,” tiin lekha a thawn nâwk a. Lal naupasalhai chu sâwmsari an na, khawpui mi lienhai, anni enkawl tleituhai kuoma chun an um a.

⁷Chun, lekha chu an hmu chun lal naupahai chu an man a, a sâwmsari chun an that a, an luhai chu bâwmrângah an sie a, Jezreel khuoah a kuomah an inphur ta a.

⁸Chun, thangko a hung a, “Lal naupasalhai lu chu an hung lâk tah,” tiin a hril a. Chun, ama chu, “Kul lûtna kawtkhâr bulah hmun hniah intieng khâwm unla, zinga chen um raw se,” a ta.

⁹Chun, a zînga chun a va suok a, a ngîr a, mi po po kuoma chun, “Mi fel in nih; ngai ta u, ka pu chu ka phier rûk a, ka lo sukhlum ta luo a; anleh, hienghai po po hi tu that am an ni a?

¹⁰LALPA chun Ahab sûnghai chungchâng thu a hril a, LALPA thu chu hnuoi chunga hin luong hmang el naw ni ti hre ro; LALPAIN a siehlaw Elija hmanga a hril kha a hung suktlung a ni ta hi,” a ta.

¹¹Chuongchun, Jehu chu Jezreel khuoa Ahab sûnghai la um po po le, a mi lienhai po po le, a ruolhai po po le, a thiempuhai chu pakhat khawm hlapêk hlek lovin a that fai vawng a.

¹²Chun, a tho a, a suok a, Samariah a fe ta a. Chun, lampuia berâmpuhai berâm hmul vâwna hmun a va tlung chun,

¹³Jehu chun Juda lal Ahazia unauhairawi a hmu a, “Tuhai am in ni a?” a ta. Anni chun, “Ahazia unauhai kan na, lal nauhai le; lalnu nauhai chibai kan zu bûk ding a nih,” tiin an dawn a.

¹⁴Chun, ama chun, “A hringin man tâwl ro,” a ta. Chuongchun, a hringin an man tâwl a, berâm hmul vâwna in khur bula chun an that a, mi sâwmli le pahni zet an nih, pakhat khawm an hla nawh.

¹⁵Chun, chutaka inthawka a suok hnung chun Rekab naupa Jehonadab, ama tuok dinga hung a va hmu a; chuongchun, chibai a bûk a, a kuomah, “I chunga lungril indik ka put ang hin lungril indik i put ve am chu?” a ta. Jehonadab chun, “Put e,” tiin a dawn a. “Anleh i kut mi hang pe ta,” a ta. Chuongchun, a kut chu a hang pêk a; chun, ama chun a kuomah a tawlailîr sûngah a kei lût ta a.

¹⁶Chun, ama chun, “Ka kuomah hung ve la, LALPA ta dinga ṭhahnem ka ngaizie hi hang hmu ve hrim ta khai,” a ta. Chuongchun, a tawlailîra chun ân chuongtir ve ta a.

¹⁷Chun, Samari a va tlung chun Ahab sûnghai Samaria la um sunhai chu a sukbohmang vawng hmakhat chun a that pei a, Elija kuoma a hril, LALPA thu ang ngei khan.

¹⁸Chun, Jehu chun mipuihai po po chu a ko khâwm a, an kuoma chun, “Ahab khan Baal rawng hi a bâwl met chau a na, Jehu ruok hin chu nasatakin a nih a bâwl ding chu.

¹⁹Chuongchun, Baal zâwlneihai po po le a betuhai po po le a thiempuhai po po ka kuoma hin hung ko khâwm ta u; tukhawm a kim naw um naw raw se, Baal kuoma hin inthâwina ropuitak inhlân ding ka nei a, tukhawm a kim naw taphawt chu hring dêr naw nih,” a ta. Nisienlakhawm, Jehu chun Baal betuhai chu sukhlum tumin, var vervêkin a thaw a nih.

²⁰Chun, Jehu chun, “Baal hmingin ruoiṭhena ropui siem ro,” a ta. Chuongchun, chu chu an inthawn vêl ta a.

²¹Chun, Jehu chun Israel ram po poah a thawn vêl a; chuongchun, Baal betuhai po po chu an hung a, ṭhang naw hrim hrim an um nawh. Chun, Baal ina chun an lût a; chun, Baal in chu kawtkhâra inthawka châwrtieng chenin an sip mup el a.

²²Chun, inthuomna puon enkawltu kuomah, “Baal betuhai po po hi inthuomna puon hung lapêk ro,” a ta. Chuongchun, inthuomna puonhai chu a hung lâkpêk a.

²³Chun, Jehu chu Rekab naupa Jehonadab le chun Baal inah an lût a, Baal betuhai kuoma chu, “Hitaka hin Baal betuhai ti lo, LALPA mihai lo um ve rawi an tih, zawng unla, en vêl ta u,” a ta.

²⁴Chun, inthâwinahai le pumrawhmang thilinhlân inhlân dingin an lût a. Jehu chun tuola chun mi sâwmriet a lo inngîr ta hrim a, “Hieng in kuta ka pêk ta cheu hi tukhawm an suok vai chun, ân suotu chun, a hringna aia chun ama hringna chu chân a tih,” a ta.

²⁵Chun, pumrawhmang thilinhlân chu ân hlân zo chun Jehu chun vêngtu sipai le an hotu kuoma chun, “Va lût unla, va that ro, tukhawm insuoktir naw ro,” a ta. Chun, kâwlhnâmin an sât rak el a; chun, vêngtu sipai le an hotuhai chun an pei suok a; chun, Baal in umna khuoa chun an fe a.

²⁶Chun, Baal ina milimhai chu an lâksuok a, an raw a.

²⁷Chun, Baal lungphun chu an sukchim a, Baal in chu an suksiet a, inhnâwmna inah an hmang ta a; tu chen hin an la hmang zing a nih.

²⁸Chuong ang chun Jehu chun Baal chu Israel rama chun a sukbohmang a nih.

²⁹Nisienlakhawm, Nebat naupa Jeroboam suolna-Israelhai thil insuksuoltira a thawhai chu Jehu chun a bân chuong naw a; chu chu Bethel khuo le Dan khuoa rângkachak bâwngte lim biek a nih.

³⁰Chun, LALPAIN Jehu kuomah, “Ka mittlungtaka thil i thaw lei le, ka lungril duthusâm angtaka Ahab sûnghai chunga i thaw leiin, i naupasalhai chu suon li chenin Israel lalṭhungphaah ṭhung an tih,” a ta.

³¹Nisienlakhawm, Jehu chun LALPA, Israelhai Pathien dân chu a lungril po poin a pawm naw a; Jeroboamin Israelhai thil insuk- suoltira a suksuol kha a bân chuong naw a.

³²Chuong lai chun LALPA chun Israelhai chu a thlauthlâk ṭan ta a; chuongchun, Hazael chun Israel ram po poa chun a hne pei a;

³³Jordana inthawka khawsak tieng, Gilead ram po po, Gadhai le, Reubenhai le, Manassehai dâm, Arnon ruoma Aroera inthawka Gilead le Basan ram tlung rakin.

³⁴Jehu chanchin danghai, a thilthaw po pohai, a thilthawtheizie po pohai chu Israel lalhai inlal lai thu ziekna buah a chuong a ni naw am a nih?

³⁵Chuongchun, Jehu chu a pi le puhai kuoma chun a in ta a, Samari khuoah an phûm ta a. Chun, a naupa Jehoahaz chu ama aiawin ân lal ta a.

³⁶Samari rama Israelhai chunga Jehu rorêl sûng chu kum sâwmhni le kum riet a nih.