Read Hmar 2 LALHAI 12 Bible Online

2 LALHAI 12 - Hmar bible

2 LALHAI 12

¹Jehu kum sari ân lal kum chun Jehoas chu ân lal ṭan a; Jerusalem khuoah kum sâwmli ân lal a; a nu hming chu Zibia, Beer-seba khuoa mi a nih.

²Chun, thiempu Jehoiadain Jehoas chu ân chûktir sûng po chu LALPA mithmua thil ṭha a thaw hlak a.

³Amiruokchu, bâwlhmunhai chu sukbohmang a ni chuong nawh; bâwlhmunahai chun mihai chu an inthâwiin riminhnik an la raw zing tho a.

⁴Chun, Jehoas chun thiempuhai kuomah, “LALPA ina lâklût, thil ser intlanna sum po po tiem sa tahai laia fe taphawthai ta dinga tuk, an hringna intlanna sum dâm, tukhawma LALPA ina lâk lût an phal sum po pohai chu,

⁵thiempuhaiin an hmêlhriethaia inthawkin lo la seng hai sienla, chuongchu, in sie siemṭhat ṭûlna lai hai siemṭhatnain hmang raw hai se,” a ta.

⁶Nisienlakhawm, lal Jehoas chu kum sâwmhni le kum thum ân lal hnung khawmin thiempuhai chun in sie chu an la siem naw rawp a.

⁷Chuongchun, lal Jehoas chun thiempu Jehoiada le thiempu danghai chu a ko a, an kuomah, “Iengdinga in sietna laihai hi in siem naw am? Tuhin chu in hmêlhriethai laia inthawkin tangka chu la ta naw unla, in se siemna dingin pe suok lem ta ro,” a ta.

⁸Chun, thiempuhai chun mihai kuoma inthawka tangka lâk ta lo le, in sietna lai siemtu ni lo chu an remti a.

⁹Amiruokchu, thiempu Jehoiada chun bâwm a lâk a, a sîn a verpawp a, LALPA ina lût changtieng panga, maichâm bula chun ân ṭhut a, chutaka chun LALPA ina tangka hung lâklût po po chu kawtkhâr vêngtu thiempuhai chun an lo sie pei a.

¹⁰Chun, bâwma chun tangka a tam ta hle ti an hriet po leh lal lekhaziektu le thiempu laltak chu an hang fe a, an fûn a, LALPA ina tangka um zât chu an tiem a.

¹¹Chun, an tangka tiem chu sinthawhai, LALPA in bâwltuhai chunga hotuhai chu an pêk a; anni chun LALPA in bâwltu, themthiemhai le in bâwltuhai hlawa dâm, lung suttuhai le, lung cho suoktuhai hlawa dâm;

¹²LALPA in sietna lai siemna ding thinghai le lung sutnaa dâm, in siemna dinga a pawimawnaa pohai chun an hmang hlak a.

¹³Amiruokchu, LALPA in sûnga an tangka hung lâk chun LALPA in ta dinga tangkaruo nohai, khâwnvar puon chepnahai, maihûnhai, tawtawrâwthai, rângkachak bûr le bêlhai, tangkaruo bûr le bêlhai an siem naw a;

¹⁴sinthawtuhai an pêk hlak a; LALPA in siemna dingin an hmang lem a nih.

¹⁵Chun, sinthawtuhai an pêk dinga tangka an inkawltirhai khawm kha an enzuipui chuong naw a, anni chun ringumtakin an thaw hlak si a.

¹⁶Bawsietna inthâwina thilinhlân tangka le, suol inthâwina thilinhlân tangkahai chu LALPA ina chun a lâklût nawh; thiempuhai chanpuol a nih.

¹⁷Chun, Suria lal Hazael chun Gath khuo a hang rûn a, a hang lâk a; chun, Hazael chu Jerusalema fe pei a tum a.

¹⁸Chun, Juda lal Jehoas chun Juda lal a puhai Jehosaphat hai dâm, Jehoram hai dâm, Ahazia hai dâm, lo inhlân tah thil serhai po po le, ama thil serhai le LALPA ina mi le lal ina ro siekhâwmnaa mi rângkachak um po pohai chu a lâk vawng a; Suria lal Hazael chu a thawn a; chuongchun, Jerusalem chu a nghatsan nâwk ta a.

¹⁹Chuongchun, Joas chanchin danghai, a thilthawhai po po chu Juda lalhai inlal lai thu ziekna buah a chuong a ni naw am a nih?

²⁰Chun, a mihai chu an tho a, ama an phier rûk a, Joas chu Silla pan thlâkna lampuiah Millo inah an thaw a, an sukhlum a.

²¹Ama mi Shimeath naupa Zozakar le Somer naupa Jehozabad chun an that a nih; chuongchun, a pi le puhai lai David khawpuia chun an phûm a; chun, a naupa Amazia chu a aiawin ân lal ta a.