Read Hmar 2 LALHAI 13 Bible Online

2 LALHAI 13 - Hmar bible

2 LALHAI 13

¹Juda lal Ahazia naupa Joas kum sâwm hni le kum thum ân lal kum chun Jehu naupa Jehoahaz chu Israelhai chungah Samari khuoa chun ân lal ṭan a, kum sâwm le kum sari ân lal a.

²LALPA mithmuah thil ṭha nawtak a thaw hlak a, Israelhai thil insuksuoltira a thaw Nebat naupa Jeroboam suolnahai kha a chîng ve a, a mâksan nâwk ta hrim hrim naw a.

³Chun, LALPA lung chu Israelhai chunga chun a chawk a, chuongchun, Suria lal Hazael kuta le, Hazael naupa Benhadad kuta chun a pêk ta pei a.

⁴Chun, Jehoahaz chun LALPA kuomah a ngên a ngên a; chun, LALPAIN a thu chu a lo ngaipêk a, Israelhai nêksâwra an um a, Suria lalin anni a nêksâwrzie chu a hmu zing si a.

⁵LALPA chun Israelhai chu sandamtu a pêk a; chuongchun, Suria mihai hnuoia an um chu an suok a, Israel thlahai chu kha hma ang bawk khan anni in tieng an um nâwk ta ṭawk ṭawk a.

⁶Amiruokchu, Israelhai thil insuksuoltira a thaw Jeroboam sûnghai suolna kha an mâksan naw a; an la chîng ta zing lem a; chun, Samari khuoa chun Asera khawm chu a la um zing nghe nghe a.

⁷Jehoahaz chu a mihai laia sakawr chung chuong mi sâwmnga le tawlailîr sâwm le, sipai sîng khat ti naw chu nei a phalpêk si naw a, Suria lal chun a sukbohmang vawng a, pilvut childip ang elin a siem a nih.

⁸Chuongchun, Jehoahaz chanchin danghai, a thilthaw po pohai, a thilthawtheizie dâm chu Israel lalhai inlal lai thu ziekna bua chun a chuong a ni naw am a nih?

⁹Chun, Jehoahaz chu a pi le puhai kuomah a in ta a; chun, Samari khuoa chun an phûm a; chun, a naupa Joas chu a aiawin ân lal ta a.

¹⁰Juda lal Joas kum sâwmthum le kum sari ân lal kum chun Jehoahaz naupa Jehoas chu Israelhai chungah Samari khuoah ân lal ṭan a; kum sâwm le kum ruk ân lal a.

¹¹Chun, LALPA mithmuah thil ṭha nawtak a thaw hlak a; Israel hai thil insuksuoltira a thaw Nebat naupa Jeroboam suolnahai po po kha a mâksan bîk naw a, a la chîng zing ta lem a.

¹²Chuongchun, Joas chanchin danghai, a thilthaw po pohai dâm, Juda lal Amazia a thaw laia a thilthawtheizie dâm chu Israel lalhai inlal lai thu ziekna bua chun a chuong a ni naw am a nih?

¹³Chun, Joas chu a pi le puhai kuomah a in ta a; chun Jeroboam chu a lal ṭhungphaah a ṭhung a, chun Joas chu Samari khuoah Israel lalhai lai an phûm ta a.

¹⁴Chun, Elisa chu a thipui ding natnain a hung na ta a, chuongchun, Israel lal Joas chu a kuomah a zu fe a, a ṭa a, “Pa, Pa, Israelhai tawlailîr le sakawr chung chuong mihai ,” a ta;

¹⁵Chun, Elisa chun a kuomah “Thalngul le thalhai hung la ta,” a ta; chun, thalngul le thalhai a hung lâk a.

¹⁶Chun, Israel lal kuoma chun, “Thalngul kha hang chel ta,” a ti a, chuongchun, a hang chel a. Chun, Elisa chun lal kut chunga chun a kut ân nghat a.

¹⁷Chun, ama chun, “Saktieng tukver hang hawng ta,” a ta, chun, a hang hawng a. Chun, Elisa chun, “Kâp rawh,” a ta, chun, a hang kâp a, chun, ama chun, “LALPA hnena thal, Suriahai hnena thal a ni kha; Aphek khuoa chun Suria mihai chu bohmang dêr khawpin i hne ding annâwm,” a ta.

¹⁸Chun, “Thalhai kha hung la ta,” a ti nâwk a; chuongchun, a hei lâk a. Chun, Israel lal kuoma chun, “Hnuoi kha hei sun ta,” a ta; chuongchun, vawi thum a hei sun a, a ma ta el a.

¹⁹Chuongchun, Pathien mi chu a chunga chun a lunginsen ta a, “Vawi nga, vawi ruk lai i sun ding i sawnnaw; chuongchun, Suria mihai chu bohmang dêr khawpin i hne ding a nih. Amiruokchu, Suria mihai chu vawi thum chau i hne ding a ni ta hi,” a ta.

²⁰Chun, Elisa chu a thi a, an phûm ta a. Chun, kum a hung invawi po hin, Moab mihai chun an ram hi an hung rûn hlak a.

²¹Chun, mi pakhat an phûm ding lai takin, ngai ta, rûntu pâwl pakhat an hei hmu a; chuongchun, ama chu Elisa thlâna chun an thlâk el ta a; chun, a ruong chun Elisa ruhai chu a zu tâwk phingleh, a hung hring nâwk a, a hung ngîr el ta a.

²²Chun, Suria lal Hazael chun Jehoahaz hun sûng chun Israelhai chu a nêksâwr zing a.

²³Nisienlakhawm, LALPAIN Abraham kuoma dâm, Isaak kuoma dâm, Jakob kuoma dâm khan thu a thlung leiin anni chu a lunginsiet a, a lainat a, a ngaisak a, anni chu a sukbohmang nuom naw a, a kuoma inthawk chun a la pei thlâk nuom ta naw rawp a.

²⁴Chun, Suria lal Hazael chu a thi a, a naupa Benhadad chu ama aiaw chun ân lal ta a.

²⁵Chun, Jehoahaz naupa Jehoas chun Hazael naupa Benhadadin a pa Jehoahaz a rûn a, khuo a lâkpêkhai kha a lâkpêk nâwk a, Joas chun vawi thum a hne a, Israel ram khuohai chu a lâk nâwk a.