Read Hmar 2 LALHAI 16 Bible Online

2 LALHAI 16 - Hmar bible

2 LALHAI 16

¹Remalia naupa Peka kum sâwm le kum sari ân lal kum chun Juda lal Jotham naupa Ahaz chu ân lal ṭan a.

²Ahaz chu ân lal ṭantirin kum sâwmhni mi a nih; chun, Jerusalemah kum sâwm le kum ruk ân lal a. A pu David angin LALPA a Pathien mithmuah thil ṭhatak a thaw ve naw a.

³Israel lalhai lampui hraw chu a hraw ve a, anih, LALPAIN Israel mipuihai hmaa a hnawtsuok hnamhaiin thil tirdakumtak an thaw hlak angin a naupa chu meiah ân lûttir a.

⁴Chun, bâwlhmunahai, tlângahai, thing hring hmun tin hnuoia dâm ân thâwi a, riminhnik a raw a.

⁵Chuongchun, Suria lal Rezin le Israel lal Remalia naupa Peka chu Jerusalem thaw dingin an hang fe a; Ahaz chu an hang inhuol a, nisienlakhawm, an hne thei naw a.

⁶Chuong lai chun Suria lal Rezin chun Elath khuo chu Suria rama dingin a lâk nâwk a, Judahai chu Elath khuoa inthawk chun a hnawtsuok a; chun, Suria mihai chun Elath khuo chu an va hluo a, tu chen hin an la um zing a nih.

⁷Chuongchun, Ahaz chun Assuria lal Tiglath-pileser kuomah, “I siehlaw le i naupa ka nih annâwm, a mi thaw dinga hung inthawk, Suria lal kuta inthawk le Israel lal kuta inthawk hin mi hang sansuok ta khai,” tiin mi a tir a.

⁸Chun, Ahaz chun LALPA ina tangka le rângkachak um taphawt chu lal ina ro siekhâwmnaa mi leh a lâk a, Assuria lal kuomah lâwmman dingin a thawn a.

⁹Chun, Assuria lal chun a thuhril chu a lo zâwm a; chuongchun, Assuria lal chun Damaska khuo chu a hang thaw a, a lâk a, a mihai chu Kir ramah salah a ṭhuoi a, Rezin chu a that a.

¹⁰Chun, lal Ahaz chu Assuria lal Tiglath-pileser be dingin Damaska khuoah a fe a, Damaska khuoa maichâm chu a va hmu a; chuongchun, lal Ahaz chun chu maichâm lim le an siem dân ang chiea enkhi dingin thiempu Urija kuomah ân phur a.

¹¹Chun, thiempu Urija chun maichâm a hang siem a; lal Ahazin Damaska khuoa inthawka a thawn ang chie chun thiempu Urija chun Damaska khuoa inthawka lal Ahaz hung hma chun a lo siem hman diem a.

¹²Chun, Damaska khuoa inthawka lal a hung tlung chun lal chun maichâm chu a hei hmu a; chun, lal chun maichâm chu a pan hnai a, a hang lâwn a.

¹³Chun, maichâma chun a pumrawhmang thilinhlânhai rawin a beiphit thilinhlânhai chu ân hlân a; a dâwn ding thilinhlân chu a buok a, ân remna thilinhlân thisen chu a the bawk a.

¹⁴Chun, LALPA hmaa dâr mai- châm, a maichâm le LALPA in inkâra mi, in hmazâwna mi chu a lâk sawn a, a maichâm hmâr tieng panga chun a sie ta a.

¹⁵Chun, lal Ahaz chun, “maichâm lientaka hin zingtienga pumrawhmang thilinhlânhai, zântienga beiphit thilinhlân dâm, lal pumrawhmang thilinhlân dâm, a beiphit thilinhlân dâm, a ram mipui po po pumrawhmang thilinhlân dâm, an beiphit thilinhlân dâm, an dâwn ding thilinhlân dâm le hin inhlânin raw la; chun, a chunga chun pumrawhmang thilinhlân thisen po po le, inthâwina thisen po po chu the rawh, dâr maichâm ruok chu ka biekna ding ning a ta,” tiin thiempu Urija chu thu a pêk a.

¹⁶Chuongchun, thiempu Urija chun lal Ahaz thupêk ang po po chun a thaw ta a.

¹⁷Chun, lal Ahaz chun inṭhutna khurhai chu a suksiet a, insâwpna bêl chu a sie sawn a; ân ṭhutna dâr bâwngchalhaia inthawk dâm chun tuizêng chu a lâk thlâk a, lungrem chungah ân ṭhut a.

¹⁸Chun, châwl nia dinga chung neia lampui ina an siem le tuoltienga lal lûtna chu Assuria lal lei chun LALPA in dingin a thlâkthleng ta hlau a.

¹⁹Chuongchun, Ahaz thilthaw chanchin danghai chu Juda lalhai inlal lai thu ziekna buah a chuong a ni naw am a nih?

²⁰Chun, Ahaz chu a pi le puhai kuomah a in a; a pi le puhai lai David khawpuia chun an phûm ta a; chun, a naupa Hezekia chu ama aiawin ân lal ta a.