Read Hmar 2 LALHAI 17 Bible Online

2 LALHAI 17 - Hmar bible

2 LALHAI 17

¹Juda lal Ahaz kum sâwm le kum hni ân lal kum chun Ela naupa Hosea chu Israelhai chungah Samari khuoa chun ân lal ṭan a; kum kuo ân lal a.

²Chun, LALPA mithmuah thil ṭha nawtak a thaw hlak a, amiruokchu, a hmaa Israel lalhai ang êm chun chu a thaw naw a.

³Assuria lal Salmaneserin a hang rûn a; chuongchun, Hosea chu a siehlawah a um ta a, sie dâm a pêk hlak a.

⁴Chun, Assuria lal chun Hosea in a phier rûk thu a lo hriet a, Aigupta lal So kuomah mi a tir bawk a, kum tina a pêk hlak ang khan Assuria lal chu sie chu a pêk ta bawk si naw a; chuleiin, Assuria lal chun intângna inah khuop pumin a khum ta a.

⁵Chuongchun, Assuria lal chun ram po po chu a hrût suok vawng a, Samari khuoa chun a hang fe a, kum thum sûng ân huol a.

⁶Hosea kum kuo ân lal kum chun Assuria lal chun Samari khuo chu a lâk a, Israel mihai chu Assuria rama chun a ṭhuoi a, Hala rama dâm, Gozan rama Habor vadunga dâm, Media mihai khuoa dâm ân umtir a.

⁷Chuong anga an umna san chu Israel mipuihai chun Aigupta lal Pharao kuta inthawkin, Aigupta rama inthawka ṭhuoi suoktu LALPA an Pathien chungah thil an suksuol a, pathien danghai an pawisa lem a,

⁸LALPAIN Israel mipuihai hmaa a lo hnawt suok tah hnamhai thuruot le Israel lalhai thuruot anga an lo pawm tâk lei a nih.

⁹Chun, Israel thlahai chun LALPA an Pathien chunga chun thil ṭha nawtak inrûkin an thaw hlak a, an khuo po poah râl vêngtuhai in insânga inthawka kul nei khuo chenin bâwlhmunhai an siem a.

¹⁰Tlâng insâng tina le thing hring tin hnuoia hin lungphunhai phunin Asera dâm an siem a,

¹¹chuong bâwlhmunhai po poa chun LALPAIN an hmaa a hnawt hmang tahai thaw dân ang khan riminhnikhai an raw hlak a; LALPA suklungsenna dingin thil suoltak an thaw bawk hlak a.

¹²LALPAIN an kuoma, “Hieng ang hi thaw naw ro,” a ti milimhai rawng an bâwl bawk hlak a.

¹³LALPA chun, “Dân zâwm ding in pi le puhai ka pêk le ka siehlaw zâwlneihai hmanga kân hriettir ang pei cheu chun, in umdân suol hi nghatsan unla, ka thupêkhai le ka thuruothai chu pawm ro,” tiin Israelhai le Judahai chu zâwlnei tin le hmutheitu tinhai chu hmangin ân hriettir hlak a.

¹⁴Chuong sa khawm chun an pawm nuom naw a, an pi le pu, LALPA an Pathien ring nuom nawhaiin an lûlul an insuo angin an lûlul an insuo ve a.

¹⁵Chun, a thuruothai, an pi le puhai kuoma a thuthlunghai, an kuoma thu inhriettirhai chu an pawisa nuom naw a; thil teplo mei mei an pawm a, teplo mei mei an hung ni ta a; an chungchâng thua LALPAIN, “Anni ang chun thaw naw ro,” a lo ti tah, an kâwl vêla hnamhai thaw dân chu an lâk ve a.

¹⁶Chun, LALPA an Pathien thupêk po pohai chu an nghatsan a, bâwngtê lim sung pahni an siem a; chun, Asera an siem a, vâna um po po khi an biek a, Baal rawng an bâwl hlak.

¹⁷Chun, an naupasalhai le an naunuhmeihai chu meiah an inlûttir a, aisân le dawi dâm an chîng a,LALPA suklungsenna dingin a mithmua thil ṭha nawtak thaw dingin an inzawr a.

¹⁸Chuleiin, LALPA chu Israelhai chunga chun a lung a sen ta êm êm a, a mithmu phâk nawah a sawn hmang dai ta a; Juda hnam chau naw chu um an um ta naw a.

¹⁹Judahai khawm chun LALPA an Pathien thupêkhai chu an zâwm naw a, Israelhaiin an pawm thuruothai ang chun an um lem a.

²⁰Chun, LALPAIN Israel thlahai hrim hrim chu a dit ta naw a, anni chu a sukrimsi a, a mit hmu phâk nawa a sawn hmang hma po chun rawktuhai kuta chun a pêk ta a.

²¹Israelhai chu David sûnghai an nina chu a peipêk ta a, chuongchun, Nebat naupa Jeroboam kha lal dingin an siem a, chun, Jeroboam chun Israelhaiin LALPA an zui chu a lo kuoipêt a, thil suol nasatak ân thawtir a.

²²Chun, Israel thlahai chun Jeroboam thil suksuolna ang po po chu an thaw ve a, an mâksan ngai hrim hrim naw a,

²³chuonghai chu LALPAIN a zâwlneihai po po hmanga a lo hril ta anga anni chu a mithmu phâk nawa a sawn hmang hmakhat khan chu. Chuongchun, Israelhai chu an rama inthawkin Assuria ramah an ṭhuoi ta a, tu chen hin chutaka chun an la um ta zing a nih.

²⁴Chun, Assuria lalin Babulon khuoa mihai, Kutha khuoa mihai, Ava khuoa mihai, Hamath khuoa mihai, Sepharvaim khuoa mihai ân cha suok a; Samari ram khuoahai chun Israel mihai hmun ân hluotir a, chuongchun, Samari ram chu an hluo a, a khuoahai chun an um ta a.

²⁵Chuongchun, chutaka an hang um hlim chun LALPA an ṭi naw a; chuongchun, LALPAIN anni lai chun sakeibakneihai a tir a, mi ṭhenkhathai an se a.

²⁶Chuongchun, Assuria lal kuoma chun, “I hung sawn hnamhai hin, Samari ram khuo în hluotirhai hin hieng lai ram Pathien biek dân hi an hriet ve naw a; chuleiin, anni lai sakeibakneihai a tir ta a; chun, ngai ta, hieng lai ram Pathien biek dân an hriet naw leiin a se hlak a nih,” tiin an hril a.

²⁷Chuongchun, Assuria lal chun, “Khataka sala in ṭhuoihai laia mi thiempu pakhat ṭhuoi unla, hung um ve sienla, chu ram Pathien biek dân chu inchûktir raw se,” tiin thu a pêk a.

²⁸Chuongchun, Samari rama inthawka an ṭhuoihai laia thiempu pakhat chu Bethel khuoah a va um a, LALPA an ṭi dân ding ân chûktir a.

²⁹Nisienlakhawm, hnam tin chun mâni pathien seng an siem a, Samari mihaiin bâwlhmun an lo siemahai chun hnam tinin mâni umna khuo sengah an sie a,

³⁰Babulon mihai chun Sukkothbenoth an siem a, chun Kut mihai chun Nergal an siem a, Hamath mihai chun Asima an siem a;

³¹Ava mihai chun Nibhaz le Tartak an siem a; chun, Sepharvaim mihai chun Sepharvaimhai pathien Adrammelek le Anammelek hmingin an nauhai an raw hlak a.

³²Chuongchun, LALPA chu an ṭi a, anni laia mi bâwlhmun thiempuhai an insiem a, bâwlhmun inahai chun mi an thâwi hlak a.

³³LALPA chu an ṭi a, ana chu, an ṭhuoi suokna rama mihai hnam thaw dân angin anni pathien rawng chu an bâwl hlak a.

³⁴Kha hmaa an thaw dân angin tu chen khawm hin an la thaw zing a nih; LALPA chu an ṭi naw a, LALPAIN Jakob thla Israelhai tia ân bûkhai kuoma a pêk thuruothai, rorêlhai, dânhai le thupêkhai khawm an zâwm bawk nawh.

³⁵ LALPA chun anni le thu thlungin thu a pêk a, “Pathien danghai chu ṭi naw unla, anni chu chibai bûk naw unla, an kuomah inthâwi naw ro;

³⁶ LALPA thilthawtheina nasatak le bân phar meua Aigupta rama inthawka ṭhuoi suoktu cheu ama chu in ṭi lem ding a nih ama chu chibai in bûk ding a na, a kuomah in inthâwi ding a nih;

³⁷chuongchun, thuruot dâm, rorêl dâm, dân dâm, thupêk dâm a lo inziekpêk ta cheu kha kumkhuoin in pawm zing ding a na; pathien danghai chu in ṭi ding a ni nawh,

³⁸chun, in kuoma thu ka thlung hi in theinghil bawk ding a ni naw a, pathien danghai chu in ṭi ding a ni bawk nawh;

³⁹LALPA in Pathien ruok chu in ṭi ding a nih; chuongchun, in hmêlmahai po po kuta inthawk chun sansuok ka ti cheu,” tiin.

⁴⁰Iengtin khawmin an pawm nuom chuong naw a, kha hmaa an thaw dân angin an la thaw zing a.

⁴¹Chuongchun, chuong hnamhai chun LALPA chu ṭi chu an ṭi a, an milim siem fâwmhai rawng khawm an bâwl bawk a; chuong ang bawkin an thlahai le an thlahai thla chen khawmin tu chen hin an pi le puhai thaw dânin an la thaw zing a nih.