Read Hmar 2 LALHAI 18 Bible Online

2 LALHAI 18 - Hmar bible

2 LALHAI 18

¹Chun, Ela naupa Israel lal Hosea kum thum ân lal kum chun Juda lal Ahaz naupa Hezekia chu ân lal ṭan a.

²Ân lal ṭantir chun kum sâwmhni le kum nga mi a nih; chun, Jerusalemah kum sâwmhni le kum kuo ân lal a; a nu hming chu Abi, Zekaria naunu a nih.

³Chun, a pu David thilthaw ang po thaw vein, LALPA mithmua thil ṭhatak a thaw hlak a.

⁴Bâwlhmunhai a sukbo a, lungphunhai a sukchim a, Asera dâm a phûr a; chun, Mosie dâr rûl siemhai chu a suknâwi vawng a; chuong lai hun chen chun Israel mipuihai chun a kuomah riminhnik an la raw rawp hlak a nih; chu chu Nehustan an ti hlak a.

⁵Ama chun LALPA Israelhai Pathien chu a ring a; chuongchun, ama hnunga Juda lalhai po pohai laiah ama ang tukhawm an um naw a, ama hmaa khawm an um bawk nawh.

⁶LALPA chu a chel tlat a; ama a zui chu a ma nuom naw a, a thupêk LALPAIN Mosie a pêkhai chu a zâwm a.

⁷Chuongchun, LALPA chu a kuomah a um a; a suok invâkna taphawta chun a tluongtlung pei a; Assuria lal chunga chun a hel a, a rawng a bâwl ta naw a.

⁸Philistin mihai chu Gaza khuo chenin a ram chin po po leh, râl vêngtuhai in insânga inthawka kul nei khuo chenin a hne vawng a.

⁹Chun, lal Hezekia kum li ân lal kum, Israel lal Ela naupa Hosea kum sari ân lal kum chun Assuria lal Salmaneser chun Samari khuo a hang thaw a, a hang inhuol a.

¹⁰Chun, kum thum ân vawi kum chun a lâk ta a; Hezekia kum ruk ân lal kum, Israel lal Hosea kum kuo an lal kumin a nih Samari khuo chu a lâk chu.

¹¹Chun, Assuria lal chun Israelhai chu Assuria ramah a ṭhuoi a, Hala rama dâm, Gozan rama Habor vadunga dâm, Media mihai khuoa dâm ân umtir ta a;

¹²LALPA an Pathien thu chu an pawm nuom naw a, a thuthlung chu an bawsiet lem a, LALPAIN a siehlaw Mosie thu a pêkhai po pohai ngei kha an pawm nuom naw a, an thaw nuom naw leiin.

¹³Chun, lal Hezekia kum sâwm le kum li ân lal kumin Assuria ram lal Sennakerib chu Judai rama khuo kulpui nei po pohai chu thaw dingin a hang fe a; a lâk ta a.

¹⁴Chun, Juda lal Hezekia chun Lakis khuoa Assuria lal kuoma chun, “Thil ka lo suksuol tah a nih, mîn kiensan nâwk el rawh,” tiin thu a thawn a.

¹⁵Chun, Assuria lal chun Juda lal Hezekia chu tangka talent za thum le rângkachak talent sâwmthum a tuk a. Chuongchun, Hezekia chun LALPA ina tangka um po po le lal ina ro siekhâwmnaa mi po po chu a pêk vawng a.

¹⁶Chu ṭum ngei chun Hezekia chun, LALPA biek in kawtkhâra mi le, Juda lal Hezekian bana rângkachak ân luonhai chu a lâk thlâk vawng a, Assuria lal chu a pêk a nih.

¹⁷Chun, Assuria lal chun Tartan dâm, Rabsaris hai dâm, Rabsake hai dâm sipai tamtak leh Lakis khuoa inthawkin Jerusalem khuoa lal Hezekia kuoma chun a tir a. Chun, Jerusalem khuo chu an hang tlung a. An hang tlung chun puon sâwptu phûl lampuia dîl sakhnung lem, tuilâkna kâwla chun an ngîr a.

¹⁸Chun, lal chu an hang ko chun, insûng tieng hotu Hilkia naupa Eliakim hai, lekhaziektu Sebna hai, chanchin ziektu Asaph naupa Joa hai an kuomah an va suok a.

¹⁹Chun, Rabsake chun an kuomah, “Hezekia kuoma chun hang hril ro khai, ‘lal ropuitak Assuria lal chun hieng ang hin a tih, I ring în nghatna hi ieng am a na?

²⁰Indonaa ding chun remruot thiem le hrâtna kan nei a nih i ti a; nisienlakhawm, chu chu ṭawngbau el a nih. Tu am i ring a, ka chunga hel i ni leh?

²¹Ngai ta, hi luong hmawl pawr Aigupta hi i ring a ni âwm a; chu chu miin a ringsan chun a kutah sun a tih, Aigupta lal Pharao chu ama ringtuhai po po chunga chun chuong ang chu a ni hlak a nih.

²²Annawleh ka kuomah, LALPA kan Pathien chu a nih ka ring chu, in ti chun, ama chu Hezekia chun Judahai le Jerusalem mihai kuoma Jerusalem khuoa hi maichâm hmaa hin in biek ding a nih, tiin bâwlhmunhai leh a maichâmhai a lâk hmangpêk kha a ni naw am a nih?’ tiin.

²³Chuongchun, ka pu, Assuria lal le chun thu intiem ro, chuongchun, sakawr sâng hni pêng ka ti che, a chunga chuongtu dinghai i hmu thei ding phawt chun.

²⁴Iengtin am tawlailîr le sakawr chung chuong mihai thua Aiguptahai chunga i ringna innghatin, ka pu mihai laia chîntak hotu pakhat khawm hi i dangkîr zo hrim ding am a nih?

²⁵Chun, hi ram hi LALPA thu ni lova sukse dinga hung am ka nih? LALPAIN ka kuomah, ‘Chu ram chu hang thaw la, sukse rawh, a ti a nih,’ tiin,” a ta.

²⁶Chun, Hilkia naupa Eliakim le Sebna le Joa hai chun Rabsake kuomah, “Lunginsiettakin, i siehlawhai hi Suria ṭawngin mi be ta lem rawh; chu chu kan hriet thei si a; kul chunga mihai na hrieta hin Juda ṭawngin mi be ta naw rawh,” an ta.

²⁷Nisienlakhawm, Rabsake chun an kuomah, “Ka pu chun in pu kuom le nangni kuom chaua hieng thu hi hril dingin a mi tir am a nih? Kul chunga ṭhunghai, nangni le anni mâni êk la fa ding le mâni zun la dâwn dinghai kuoma hin a mi tir a ni bawk naw am a nih?” a ta.

²⁸Chun, Rabsake chu a ngîr a, Juda ṭawngin râwl inringtakin a khêk a, “Lal ropuitak Assuria lal thu hi lo ngai ro.

²⁹Lal chun hieng ang hin a ti a nih, ‘Hezekia hlêmin um naw ro; ama chun ka kuta inthawkin a sansuok thei âwm si naw cheu a;

³⁰Hezekia chun, LALPAIN mi sanhim ngei a ta; chun, hi khawpui hi Assuria lal kuta chun pêk ni naw nih, tiin LALPA chu inringtir naw raw se cheu.

³¹Hezekia thu chu pawm naw ro, Assuria lal chun hieng ang hin a ti a nih: Mîn rempui unla, ka kuomah hung thla ro, mi tinin mâni grêp hruia mi le, mâni theichang kûnga mi fa seng unla, mi tinin mâni tuikhur tui tlân seng ro:

³²nangni ram anga bu le uoin ram, bei le grêp huon ram, oliv le khuoizu ram, thi lova in hring theina ding rama ka hung ṭhuoi hmakhat cheu chun; Hezekian, LALPAIN mi sanhim a ta, tia a thlêm cheu khawmin pawm nuom naw ro.

³³Hnam tinhai pathien po po laia mi hrim hrimin an ram chu Assuria lala inthawkin an sanhim ta hlak am a nih?

³⁴Hamath le Arpad pathienhai kha khâwlai am an um ta leh? Sepharvaim dâm, Hena dâm, Ivva dâm pathienhai khawm kha khâwlai am an um ta leh? Samari khuo kha keia inthawkin an sanhim am a nih?

³⁵Ram tin pathienhai po po laia mi chun tuhai am an ram keimaa inthawka sanhim a, LALPA chun Jerusalem khuo hi keimaa inthawkin a sanhim ding hrim am a nih?’ tiin,” a ti a.

³⁶Anni chu an to zing a, bau khat khawma an dawn nawh; lal thupêk dân chu, “Anni chu dawn naw ro,” ti a ni si a.

³⁷Chuongchun, lal insûng tieng hotu Hilkia naupa Eliakim hai, lekhaziektu Sebna hai, chanchin ziektu Asaph naupa Joa hai chu an silfên keithlêrhai inbelin Hezekia kuoma chun an fe a, Rabsake thuhrilhai chu an hril a.