Read Hmar 2 LALHAI 2 Bible Online

2 LALHAI 2 - Hmar bible

2 LALHAI 2

¹Chun, LALPA chun Elija chu thlivira vâna a zuk lâk ding lai chun Elija chu Elisa leh Gilgala inthawk chun an fe a.

²Chun, Elija chun Elisa kuomah, “Hitaka hin lo um hri rawh, ka ngên che hi, LALPA chun Bethel chena fe dingin a mi tir a nih,” a ta. Elisa chun, “LALPA le nang a hringna sâlin ka hril a nih; um san naw tawp ka ti che,” a ta. Chuongchun, Bethela chun an fe thla ve ve ta a.

³Chun, Bethel khuoa zâwlnei naupasal umhai chu Elisa kuomah an hung a, a kuomah, “Vawisûn hin i chunga hotu hi LALPAIN a lâk hmangpêk ding che a nih ti i hriet am?” an ta. Chun, ama chun, “Aw ka hriet, lo to ṭawk ṭawk unla,” a ta.

⁴Chun, Elija chun, “Elisa, hitaka hin lo um phawt rawh, ka ngên che hi, LALPA chun Jeriko chena fe dingin a mi tir si a,” a ta. Ama chun a kuomah, “LALPA hringna le nanga hringna sâlin ka hril a nih, um san naw tawp ka ti che,” a ta. Chuongchun, Jeriko chen chun an zu fe ta a.

⁵Chun, Jeriko khuoa zâwlnei naupasalhai chu Elisa kuomah an hung a, a kuomah, “Vawisûn hin i chunga hotu hi LALPAIN a lâk hmangpêk ding che a nih ti i hriet am?” an ta. Chun, ama chun, “Aw ka hriet, lo to ṭawk ṭawk unla,” a ta.

⁶Chun, Elija chun a kuomah, “Hitaka hin lo um rawh, ka ngên che hi, LALPA chun Jordan vadung chena fe dingin a mi tir si a,” a ta. Chun, ama chun, “LALPA hringna le nanga hringna sâlin ka hril a nih, um san naw tawp ka ti che,” a ta. Chuongchun an pahni chun an fe pei ta a.

⁷Chun, zâwlnei naupasalhai mi sâwmnga an fe ve a, hlataka hin an hmazâwnah an ngîr a, anni chu Jordan vadung panga chun an ngîr ta a.

⁸Chun, Elija chun a puon chu a hlîp a, ân têl a, tui chu a vuok ta a, chuongchun, khingtieng khingtieng chun a lo inṭhe a, an pahni chun hnuoi hula chun an fe kai ta a.

⁹Chun, an kai hnung chun Elija chun Elisa kuomah, “I kuoma inthawka lâk hmang ka ni hma hin, i ta dingin ieng am thawpêk ka ti che a, mi hni rawh?” a ta. Chun, Elisa chun, “I thlarau chan lehni hi ka chungah um raw se, ka ngên che hi,” a ta.

¹⁰Ama chun, “Thil intaktak i hni a ni chu, iengkhawm ni sienla, i kuoma inthawka lâk hmanga ka um lai i hmu chun, chuong ang chun i chungah um a tih, i mi hmu naw ruok chun chuong ang chu ni naw nih,” a ta.

¹¹Chun, an fe pei a, an la ṭawng zing laiin, ngai ta, mei sakawr tawlailîr le mei sakawrhai a hung inlang a, chu chun anni chu an kâra tlain a ṭhe ta a; chun, Elija chu thlivira chun vânah a lâwn ta a.

¹²Chun, Elisa chun a hmu a, “Pa, Pa! Israel sakawr tawlailîr le sakawr chung chuong mihai !” tiin a khêk a.

¹³Elija puon amaa inthawka hung tla chu a lâk a, a kîr a; Jordan vadung panga chun a ngîr ta a.

¹⁴Chun, Elija puon amaa inthawka tla chu a lâk a, “Elija Pathien LALPA chu khâwlai am a um a?” a ti a, tui chu a vuok a, chuongchun, khingtieng khingtieng chun tui chu an lo inṭhe ta a. Chun, Elisa chu râlkhing chu a kai ta a.

¹⁵Chun, zâwlnei naupasalhai Jeriko khuoa umhaiin ama chu an lo hmu nâwk chun, “Elija thlarau kha Elisa chunga hin a um ta ngei el,” an ti a, ama chu tuok dingin an hung suok a, a hmaa chun hnuoi sikin an kûn a, chibai an bûk tâwl a.

¹⁶Chun, anni chun a kuomah, “Ngai ta, tuhin pasal hrât i siehlawhai kuoma hin sâwmnga an um a, kan ngên che hi, anni chu tir la i hotupa chu inzawngtir rawh, ama chu LALPA thlarau chun lain, tlâng khaw laia manih, ruom khaw laia manih a lo inthlâk hlau rawi mawh,” an ta. Ama chun, “infetir lo ding,” a ta.

¹⁷Ama chu inzak khawp raka an phût an phût hnunga chun ama chun, “Tir ta unla,” a ta. Chuongchun, mi sâwmnga chu an tir a, ni thum sûng an zawng a, nisienlakhawm, an hmu zo naw a.

¹⁸Chun, anni chu Jeriko khuoa a la châm sûng chun an hung tlung nâwk a, ama chun an kuomah, “Fe naw ro, ka ti hrim cheu a ni naw am a nih,” a lo ti a.

¹⁹Chun, chu khawpuia mihai chun Elisa kuomah, “Ngai ta, kan ngên che hi, hi khaw um dân hi ân hawi hle a, kan pu hin i hmu ve zing a; nisienlakhawm, tui hi a ṭha naw a, a ram khawm hi a takchang naw a nih,” an ta.

²⁰Chun, ama chun an kuomah, “Tuiûm thar mi hung lapêk unla, a sûngah chi hung sie ro,” a ta. Chun, an hung lâkpêk ta a.

²¹Chun, tuikhur hnârahai chun a hang fe a, chutaka chun chi chu a phul a, “LALPA chun hieng hin a tih, ‘Hi tui hi ka sukhnik ta a, tuta inthawk chu thina hrim hrim le, takchangnawna po po ka sukbo tah,’ tiin,” a ta.

²²Chuongchun, Elisa thuhril ang ngei chun tu chen hin tuihai chu sukṭhat an ni ta a.

²³Chun, chutaka inthawk chun Bethelah a hang fe a, chun, lampuia a fe lai chun khawpuia inthawk hin naupang chitê tehai chu an hung suok a, ama chu an nuisan a, a kuomah, “Hang fe rawh, nang lusîp kawlpa,” an ta.

²⁴Chun, a hnungtieng a hei en chun anni chu a hmu ta a, chuongchun, LALPA hmingin anni chu ṭawngsie ân phur ta a. Chun, ramhnuoia inthawk chun savawmpui pahni an hung suok a, anni laia naupang sâwmli le pahni chu an hung sê ta a.

²⁵Chun, chutaka inthawk chun Karmel tlângah a fe a, chutaka inthawk chun Samari ramah a kîr nâwk ta a.