Read Hmar 2 LALHAI 6 Bible Online

2 LALHAI 6 - Hmar bible

2 LALHAI 6

¹Chun, zâwlneihai naupasalhai chun Elisa kuomah, “En ta hi, i hmaa kan ṭhung khâwmna hi kan ta dingin ân têp taluo a.

²Jordan vadungah zu fêng kan ta, chutaka thing chu zu la seng kan ta, kan ṭhung khâwmna ding chutaka chun zu siem kan ti aw?” an ta. Ama chun a dawn a, “Fe ta unla,” a ta.

³Chun, mi pakhat chun, “Lungâwi la, i siehlawhai lai hin fe ve ta la,” a ta. Ama chun, “Fe vêng ka tih,” tiin a dawn a.

⁴Chuongchun, anni lai chun a fe ve ta a. Chun, Jordan vadung an tlung chun thing chu an hei phûr a.

⁵Chun, mi pakhatin thing a hei phûr lai tak hin, a hreipui chu tuiah a tla ta a; chun, ama chun “E khai, pu, kan haw a ni bah,” tiin a khêk ta a.

⁶Chun, Pathien mi chun, “Khâwlai tak âm a tla a?” a ta. Ama chun a tlâkna lai ân entir a. Chuongchun, thingtuoi hi a hei sât a, chutaka chun a hei pei lût a, thîr chu a hung inlâng ta a.

⁷Chun, ama chun, “La raw le,” a ta. Chuongchun, a hei ban a, a lâk ta a.

⁸Suria lal chun Israelhai chu a hung rûn a, “Chulai hmun khalai hmuna chun inchân ei tiu,” tiin a upahai chu a rawn a.

⁹Chun, Pathien mi chun Israel lal kuomah, “Chuong ang hmuna chun fe lo dingin fîmkhur rawh, chutaka chun Suria mihai an hung thla ding a nih,” tiin mi a tir hlak a.

¹⁰Chun, Israel lal chun Pathien miin a lo hril ta hmun chu a vân enthlittir hlak a; chutaka chun vawi hni vawi khat chau khawm ni lovin, a lo inhumhim hlak a.

¹¹Chuongchun, chu thua chun Suria lal lungril chu a lunginzîng hle a; chun, a upahai chu a ko a, an kuomah, “Eini laia atu hîm Israel lal tienga ṭhang in mi hril nuom naw ding am a nih?” a ta.

¹²Chun, upahai laia mi pakhat chun, “Tukhawm kan ṭhang nawh ie, pu, aw laltak, Israel rama um zâwlnei Elisa hin i pindan sûngrila i hrilhai hi Israel lal a hril pei a ni lem a nih,” a ta.

¹³Chun, ama chun, “Khâwlai am a um a, va zawng ta u, inmantir ka tih,” a ta. Chun, “Ngai ta, Dothan khuoah a um,” tiin an hril a.

¹⁴Chuongchun, sakawr dâm, tawlailîr dâm, sakawr tamtakhai chutaka chun a tir a, zânah an va fe a, khuo chu an inhuol ta mup el a.

¹⁵Chun, Pathien mi siehlaw chu zîngkâr inhmatakin a tho a, a va suok chun, ngai ta, sipaihai chun sakawr leh, tawlailîr leh khuo chu an lo inhuol mup el a. Chun, a siehlaw chun a kuomah, “E khai, pu, iengtin am thaw tâng ei ta?” a ta.

¹⁶Chun, ama chun, “Ṭi da ta la, anni tienga ṭhang nêk chun, eini tienga ṭhang an tam lem annâwm,” a ta.

¹⁷Chun, Elisa chu a ṭawngṭai a, “LALPA, a hmu theina dingin, a mit hung sukvarpêk ta khai,” a ta. Chun, LALPA chun chu tlangvâl mit chu a hung sukvarpêk a, chuongchun, a hmu ve ta a; chun, ngai ta, Elisa vêla chun tlâng chu mei tawlailîr le sakawrin a sip mup el a.

¹⁸Chun, ama tieng an hung thla chun, Elisa chun LALPA kuomah a ṭawngṭai a, “Hienghai hi an mit hung sukdelpêk tâwl ta,” a ta. Chun, Elisa thu angin an mithai chu a hung sukdelpêk tâwl ta a.

¹⁹Chun, Elisa chun an kuomah, “Hi chu lampui a ni naw a, khuo khawm a ni bawk naw a; mi zui unla in mi zawngpa kuoma chun ṭhuoi ka ti cheu,” a ta. Chuongchun, Samari khuoa chun a ṭhuoi ta a.

²⁰Chun, Samari khaw sûng an hang tlung chun Elisa chun, “LALPA, hieng hai hin an hmu theina dingin an mithai hung sukvarpêk rawh,” a ta. Chun, LALPAIN an mithai a hung sukvar a, an hmu ta a; chun, ngai ta, Samari khaw sûnga chun an lo um zing el a.

²¹Chun, Israel lal chun anni chu a hmu chun Elisa kuomah, “Pa, that tâwl ka ti,? That tâwl ka ti?” a ta.

²²Chun, ama chun a dawn a, “That lo e, i kâwlhnâm le i thalngula i sal manhai chu i that ding am a nih? Bei le tui hung pe la, fain dâwn hai sienla, an pu kuomah fe nâwk raw hai seh,” a ta.

²³Chuongchun, fâk ding nasatak a buotsaipêk a; chun, an fâk a, an dâwn zo chun ân fetir nâwk ta vawng a, an pu kuom tieng an fe nâwk ta a. Chuongchun, Suriahai chu Israel rama chun an fe nâwk ta ngai naw a.

²⁴Chu hnunga chun Suria lal Benhadad chun a sipai po po a ko khâwm vawng a, Samari khuo a hang inhuol a.

²⁵Chun, Samari khuoa chun ṭâm a nasa êm el a; ngai ta, an inhuol tlat a, sabengtung lu hi tangka sâwmrietin an zawr a; chun, vaṭhu êk hi kab hmun lia ṭhea hmun khat tangka pangaah an zawr hiel bawk a.

²⁶Chun, Israel lal chu kul khotlânga a fe lai hin nuhmei pakhat hin, “Aw laltak ka pu, mi ṭhangpui rawh,” a lo ti a.

²⁷Chun, ama chun, “LALPAIN a ṭhangpui nghâl naw che leh keiin khâwlaia inthawkin am hang ṭhangpui ka ti che a? Hrizâwla inthawk amanih, grêp sâwrna khura inthawkin amanih a ni ding chu?” a ta.

²⁸Chun, lal chun a kuomah, “Ieng am i ti a ni leh?” a ti nâwk a. Chun, ama chun a dawn a. “Hi nuhmei hin ka kuomah, ‘I naupa hi vawisûna ei fâk dingin thaw la, zîngah ka naupa hi ei fâk thung ding annâwm,’ a ta.

²⁹Chuongchun, ka naupa chu kan suong a, kan fâk ta a; chun, a zînga chun keiin a kuomah, ‘I naupa chu ei fâk dingin thaw ve thung raw leh,’ ka ti a, a naupa chu a thuphmang bîk el tah a nih,” a ta.

³⁰Chun, lal chun chu nuhmei thuhril chu a hriet chun a puon a keithlêr ta a, (kul khotlânga a fe lai a nih) chun, mipuihai chun an hang en a, ngai ta, a pang depa chun saiip puon hi a lo sil zing a.

³¹Chuongchun, ama chun, “Vawisûn hin Saphat naupa Elisa chun a lu a la put hrim hrim chun, Pathien chun a law law mi law el raw se, chu nêka nasa hman khawm chun,” a ta.

³²Elisa chu a inah a ṭhung a, upahai khawm chu an ṭhung ve a, chun, laltak chun a kuomah mi pakhat a tir a, nisienlakhawm, a mi tir chun a kuom a hung tlung hmain upahai kuoma chun, “Hi tuolthattupa naupa hin ka lu la ve dingin mi a hung tir ti in hriet ve am? To ta u, a mi tir chu a hung tlung phingleh, kawt lo khâr unla, kawtkhâra khan lo dang tlat ro; a hnunga chun a pu kalchawi ri ân hriet a ni nghe nghe naw am a nih?” a ta.

³³Chun, chuonga anni a la biek lai mêk chun ngai ta, a mi tir chu a hung tlung thla ta a; chun, laltak chun, “Ngai ta, hi thil ṭha naw hi, LALPA hung tir a ni hi, LALPA chu iengdingin am la nghâk ta rawp ka ti a?” a ta.