Read Hmar 1 CHANCHIN SUINA 10 Bible Online

1 CHANCHIN SUINA 10 - Hmar bible

1 CHANCHIN SUINA 10

¹Chun, Philistin mihai chun Israelhai chu an hung do a, chuongchun, Israel mihai chu Philistin mihai hmaa inthawk chun an tlânsie a, Gilboa tlânga dâm chun anni chu thatin an tlu tâwl a.

²Chun, Philistin mihai chun Saula le a naupasalhai chu nasatakin an hnawt a; chuongchun, Philistin mihai chun Saula naupasal Jonathan le Abinadab le Malkisua chu an that a.

³Chun, Saula chunga chun indona chu a hung zuol ta hle el a, thal kâp mihai chun ama chu an nangchîng ta a; thal kâp mihai lei chun nasatakin a beidawng ta a.

⁴Chun, Saula chun a râlthuom chawitu kuoma chun, “I kâwlhnâm kha phawi la, mi hung sunthleng el rawh; chuong naw chun, hieng sertan lohai hi hung an ta, mi hung sukbuoi rawi an tih,” a ta. Nisienlakhawm, a râlthuom chawitu chu a nuom naw a, ama chu a ṭi êm êm leiin. Chuleiin, Saula chun a kâwlhnâm chu a lâk a, a baw lût ta a.

⁵Chun, a râlthuom chawitu chun Saula chu a thi tah ti a hmu chun, ama khawm chu a kâwlhnâm chu a baw lût a, a thi ve ta a.

⁶Chuongchun, Saula chu a thi ta a, a naupasal pathumhai leh; an sûngkuo chu an rêngin hmunkhata chun an thi ta a.

⁷Chun, ruoma um Israel mihai po po chu an tlânsie a, Saula le a naupasalhai chu an thi ti an hriet phing chun an khuohai chu an tlânsan a, an tlânse ve tah a; chuongchun, Philistin mihai chu an hung a, chuongahai chun an hung chêng ta a.

⁸Chun, a zînga Philistin mihaiin an râl thathai thuom chu hlîp dinga an hung chun Saula le a naupasalhai chu Gilboa tlânga chun an lo tlu ve zing ti an hmu ta a.

⁹Ama chu a thuom an hlîp a, a lu chu an lâk a, a râlthuom leh, mipuihai le an milimhai kuoma chanchin intlun dingin Philistin rama chun an thawn vêl ta a.

¹⁰Chuongchun, a râlthuomhai chu an pathienhai ina chun an sie a, a lu chu Dagon ina chun an târ a.

¹¹Chun, Jabes-gilead mihai po po chun Saula chunga Philistin mihai thilthaw po po chu an hrietin,

¹²mi hrât huoisenhai po po chu an tho a, Saula ruong le a naupasalhai ruonghai chu an lâk hmang a, Jabes-a chun an hung lâk a, Jabes-a thingsaisuo hnuoiah an ruhai chu an phûm a, ni sari sûng bu an nghei a.

¹³Chuongchun, Saula chu LALPA chunga a ringum nawna leiin a thi ta a; LALPA thu chu a zâwm naw a, khawhri zâwl aisânthiem chu zawng suokin a râwn a,

¹⁴LALPA chu a râwn naw a nih. Chuongchun, LALPA chun ama chu a sukhlum a, a ram chu Jesai naupa David kuoma pêk a ni tah.