Read Hmar 1 CHANCHIN SUINA 11 Bible Online

1 CHANCHIN SUINA 11 - Hmar bible

1 CHANCHIN SUINA 11

¹Chun, Israelhai po po chu David kuomah Hebrona chun an hung inkhâwm a, “Ngai ta, i ru le i tisahai kan ni hi.

²Kha hmaa Saula lal a ni lai khawm khan, nangin i mi keihruoi a, Israel rama hin i mi hung lûtpui a na, LALPA i Pathien chun i kuomah, ‘Ka mi Israelhai chu châwm i ta, ka mi Israelhai chunga chun lal nîng i tih,’ a ti kha,” an ta.

³Chuongchun, Israel upahai po po chu Hebronah lal kuoma chun an hung a, David chun LALPA hmaah Hebrona chun anni le chun thuthlung a siem ta a; Samuel kuta LALPA thu ang peiin David chu Israel lal ni dingin hriek an nâl ta a.

⁴Chun, David le Israel mihai po po chu Jerusalemah an hang fe a (chu chu Jebus a nih); chun, Jebus mihai, a rama chênghai chu chutaka chun an um a.

⁵Jebusa chênghai chun David kuomah, “Hitaka hin i hung lût ding a ni nawh,” an lo ti a. Nisienlakhawm, David chun Zion kul chu a lâk a; chu chu David khawpui a hung ni ta a.

⁶David chun, “Tukhawm Jebus mi that hmasataktu chu sipai hotu tak nîng a tih,” a ta. Chun, Zeruia naupa Joab chu a hmasatak a na, chuongchun, hotua siem a ni ta a.

⁷Chun, David chu kula chun a chêng ta a; chuleichun, David khawpui an ti ta a.

⁸Chun, khawpui chu Millo le a vêl po po chu a vêlin a bâwl a; chun, Joab chun a la bâkhai chu a siemṭha bawk a.

⁹Chun, David chu a hung ropui deu deu a, sipaihai LALPA chu a kuomah a um si a.

¹⁰Chun, hienghai hi sipai huoisen bîkhai Davidin a nei, Israel chungthua LALPA thu ang peia ama lala siem dinga Israel mihai po po inkawpa, a ram sûnga ama le hrâta insuklanghai chu an nih.

¹¹Hieng hi mi thilthawthei Davidin a nei chu an nih: Hakmon thlaa mi Jasobeam, sâwmthum chunga hotu; mi za thum chungah a fei ân let a, kâr lovin anni chu a that tâwl ta a.

¹²Chun, ama hnunga chun Aho mi, Dodo naupa Eleazar, mi thilthawthei pathumhai laia pakhat chu a nih.

¹³Pasdammima khan David kuomah a um a, chu hmuna chun Philistin mihai chu indo dingin an inkhâwm a, chutaka chun, hmun, buṭeia sip a um a; mipuihai chu Philistin mihai hmaa chun an tlânsie a.

¹⁴Chun, chu bu hmun lailung laia chun an ngîr a, an hum tlat ta a; Philistin mihai chu an that a, LALPA chun hnena ropuitakin anni chu a sanhim a.

¹⁵Chun, sipai sâwmthumhai chu lungpuiah, David kuomah, Adullam pûka chun an va fe a; chun, Philistin sipaihai chu Rephaim ruoma chun ruongchaichea thlâkin an um a.

¹⁶Chun, David chu kula chun a um a; Philistin sipai ruol chu chu lai chun Bethlehema chun an um a.

¹⁷Chun, David chun a châk a, “Kul kawtkhâr bula Bethlehem tuisunsuo tui kha dâwn dingin mi pe um hai sien chu aw!” a ta.

¹⁸Chuongchun, mi pathumhai chun Philistin sipaihai chu an nêrthleng a, kul kawtkhâr bula Bethlehema tuisunsuoa inthawk chun tui chu an va chawi a, an hung lâk a, David kuomah an hung lâk ta a: nisienlakhawm, David chun tui chu a dawn naw a, LALPA kuomah a bunthlâk ta lem a.

¹⁹“Hi hi ka thaw ding hi ka Pathien chun mi khap raw se: an hringna ṭiumtaka sietuhai, hieng mihai hringna thisen hi ka dâwn ding am a nih? An hringna chân huoma hi hi an hung lâk a ni si a,” a ta. Chuleichun, a dâwn ta naw a. Hieng thil hi mi thilthawthei pathumhai chun an thaw a nih.

²⁰Chun, Joab unaupa Abisai chu sâwmthumhai laia hotu tak a na, ama chun za thumhai chunga chun a fei chu a phawi a, anni chu a that a, pathumhai laia chun hming ṭhat a hlaw a.

²¹Sâwmthumhai lai chun ama chu inza a kai a; chuongchun, anni chunga hotua siem chu a ni ta a; nisienlakhawm, a hmaa pathumhai lai chu a ṭhang nawh.

²²Kabzeel mi, mi thilthawtheitak naupa, Jehoiada naupa Benaia, thil nasatakhai thawtu chu a nih: Moaba Ariel naupasal pahnihai chu a that a, a fe thla a, vûr tlâk hun laiin pûk sûnga chun sakeibaknei a that bawk a.

²³Chun, Aigupta mi, mi taksa lientak tawng ngaa insâng a that a; chu Aigupta mi kuta chun puon khâwngtu puonkawl ang hi fei a um a; ama chun hmawl leh a pan thlâk a, Aigupta mi kuta fei chu a lâkpêk a, ama fei ngei chun a that ta a.

²⁴Jehoiada naupa Benaia chun hieng thilhai hi a thaw a, mi thilthawthei pathumhai[4] laia chun hming ṭhat a hlaw ta a.

²⁵Ngai ta, ama chu mi sâwmthumhai nêk khan nasatakin inza a kai a, amiruokchu, a hmasatak pathumhai lai chu a ṭhang nawh: David chun ama vêngtu pâwl hotua chun a siem a.

²⁶Chun, sipai pâwlhai laia mi thilthawtheihai chu: Joab unaupa Asahel, Bethlehema Dodo naupa Elhanan.

²⁷Haror mi Sammoth, Pelon mi Helez;

²⁸Teko mi Ikkes naupa Ira, Anathoth mi Abiezer;

²⁹Husath mi Sibbekai, Aho mi Illai;

³⁰Netophath mi Maharai, Netophath mi Baana naupa Heled;

³¹Benjamin thlaa mi Gibeaa um Ribai naupa Ithai, Pirathon mi Benaia,

³²Gaas vadungtêa um Hurai, Arbath mi Abiel;

³³Baharum mi Azmaveth, Saalbon mi Eliahba;

³⁴Gizon mi Hasem naupasalhai, Harar mi Sage naupa Jonathan;

³⁵Harar mi Sakar naupa Ahiam, Ur naupa Eliphal,

³⁶Mekerath mi Hepher, Pelon mi Ahija;

³⁷Karmel mi Hezro, Ezbai naupa Naarai;

³⁸Nathan unaupa Joel, Hagri naupa Mibhar;

³⁹Ammon mi Zelek, Beroth mi Naharai, Zeruia naupa Joab râlthuom chawituhai chu:

⁴⁰Ithra mi Ira, Ithra mi Gareb;

⁴¹Hit mi Uria, Ahlai naupa Zabad;

⁴²Reuben mi Siza naupa Adina, Reuben mi hotu le a kuoma mi sâwmthum hai leh;

⁴³Maaka naupa Hanan, Mith mi Josaphat,

⁴⁴Asterath mi Uzzia, Aroer mi Hotham naupasalhai Sama le Jeiel;

⁴⁵Simri naupa Jediael, Tiz mi a unaupa Joha;

⁴⁶Mahav mi Eliel, Elnaam naupasalhai: Jeribai le Josavia, Moab mi Ithma;

⁴⁷Mezoba mi Obed, Eliel le Jaasiel hai.