Read Hmar 1 CHANCHIN SUINA 12 Bible Online

1 CHANCHIN SUINA 12 - Hmar bible

1 CHANCHIN SUINA 12

¹Chun, Kis naupa Saula leia an khâr khum tlat laia Ziklaga David kuoma hunghai chu hienghai hi an nih: anni chu mi thilthawtheihai laia tiemsa, indonaa ama ṭhangpuituhai chu an nih.

²Thalngul leh an inthuom a; thalngula thal kâp ding le dêngvira lung dêng dingin vawitieng le changtieng an hmang thei ve ve a; Benjamin thla Saula unauhai an nih.

³A hotu tak chu Ahiezer a na, chun, Gibeath mi Semaa naupa Joas; chun, Jeziel le Pelet, Azmaveth naupasalhai le chun; chun, Anathoth mi Jehu le Beraka leh;

⁴sâwmthum chunga le sâwmthumhai laia mi thilthawtheitak Gibeon mi Ismaia leh; chun, Gederath mi Jozabad le, Johanan le Jahaziel le, Jeremia leh;

⁵chun, Haruph mi Sephatia, Semaria, Bealia, Jerimoth le Eluzai;

⁶Kora mihai Jasobeam, Joezer, Azarel, Issia le Elkana.

⁷Gedora Jeroham naupasalhai Zebadia le Joela leh.

⁸Chun, Gad mihai chu thlalêra kula khan David kuomah an um hran bîk a, mi hrât khawkhêng, indo dinga inchûkthiem mi phaw le thal chawi thiem mi; an hmaihai chu sakeibaknei hmai ang el le, an hrâtzie chu tlâng chunga sakhi anga hrât an nih;

⁹a pakhatna chu Ezer, a pahnina chu Obadia, a pathumna chu Eliab,

¹⁰a palina chu Mismanna, a pangana chu Jeremia;

¹¹a parukna chu Attai, a pasarina chu Eliel;

¹²a parietna chu Johanan, a pakuona chu Elzabad;

¹³a sâwmna chu Jeremia, sâwm le pakhatna chu Makbanai a nih.

¹⁴Hieng Gad naupasalhai hi sipaihai hotuhai an na; anni laia a châutak chu mi za khat tluk a na, a hrâttak chu mi sâng khat tluk a nih.

¹⁵Thla khatnaa Jordan vadung a kuong a liem pûr lai khawma kântuhai chu an nih; chuongchun, chu varuoma a saktieng le a thlangtienga umhai po po chu an intlânsiettir a.

¹⁶Chun, chutaka chun Juda le Benjamin mihai chu David kuomah kula chun an hung a.

¹⁷David chu anni tuok dingin a va suok a, anni chu a dawn a, an kuomah, “Kei mi ṭhangpui dinga muongumtaka hung in ni chun, ka lungril chu nangnia kawp tlat a ta, amiruokchu, ka kutin pawi a tâwk nawh ti hre zinga; ka hmêlmahai kuoma mîn mantir dinga hung in ni ruok chun, ei thlatuhai Pathien chun, chu chu en sienla cheu, kâwk raw se cheu,” a ta.

¹⁸Chun, sâwmthum laia a hotu tak Amasai kuoma chun thlarau chu a hung tlung ta a, ama chun, “David, nangma ta kan na, nangma tienga ṭhang kan nih, nang Jesai naupa; inremna, nanga kuoma chun inremna um sienla, nangma ṭhangpuituhai che kuoma khawm inremna chu um raw se; i Pathien chun a ṭhangpui si che a,” a ta. Chun, David chun anni chu a lâwmlût ta a, sipai pâwl hotuhaiah a siem tâwl ta a.

¹⁹Saula do dinga Philistin mihai le an hung lai khan, Manasse mi ṭhenkhat chu David tienga chun an pakai a; nisienlakhawm, anni chun an lo ṭhangpui naw a; Philistin mi hotuhai chun, remruotin ama chu an tir hmang a, “A hotupa Saula kuoma hin pakai a ta, ei lu inhmang rawi ei tih,” an ti si a.

²⁰Chun, ama chu Ziklaga a fe chun Manasse mi Adna, Jozabad, Jediael, Mikael, Jozabad, Elihu le Zillethai hai hi, sipai sâng pâwl hotuhai, Manasse hnama mi, ama tieng an ṭhang a.

²¹Anni chun David chu inru pâwl laia inthawkin an ṭhangpui a; anni chu mi hrât khawkhêng ruok an ni si a, sipai pâwl lai khawm hotu an ni bawk a.

²²Chuongchun, a ni têlin sipai pâwl lientak, Pathien sipaihai ang hiel an ni hmakhat chun David kuoma chun an hung pei a.

²³Hienghi LALPA thu ang pei a, Saula ram chu ama kuoma pe dinga Hebrona David kuoma, indo dinga inthuom saa hunghai hotuhai nizât chu a nih.

²⁴Juda thlahai, phaw le fei chawia indo dinga inthuom chu sâng ruk le za riet an nih.

²⁵Simeon thlahai, indonaa mi hrât khawkhênghai chu sâng sari le za khat,

²⁶Levi thlahai chu sâng li le za ruk.

²⁷Chun, Jehoiada chu Aron sûngkuoa chun a ṭhuoitu a na, ama le chun sâng thum le za sari an um a;

²⁸chun, Zadok tlangvâl hrât khawkhêng, a pa pahnamah hotu sâwmhni le pahni.

²⁹Saula unauhai, Benjamin mihai chu sâng thum: anni a tam lem tak chu Saula tienga ṭhang an nih.

³⁰Chun, Ephraim mihai, an pa- hnama mi hming inthang le mi hrât khawkhênghai chu sîng hni le za riet.

³¹Manasse hnam zâtvea chun sîng le sâng riet; anni chu David chu lala siem dinga fe dinga an hming pe ṭhalhai chu an nih.

³²Issakar mihai, Israel chun ieng am a thaw ding a na ti hre dinga thil umziehai hrethiem mihai; an hotuhai chu za hni an ni a; an unauhai po po chu an thu hnuoia chun an um a nih.

³³Zebulun mihai, sipai ni dinga fe suok thei ṭhieu, indona khawm a pâwl pâwla ṭhangkhaw thiem mi, indo hriem tinrêng hmang thiem mi chu sîng nga; chuonghai chu indona chu pâwl tlar indiktaka rem thiem, lungril thuo hni nei ni lo an nih.

³⁴Naphtali mihai hotu sâng khat le, phaw le fei chawi mi sîng thum le sâng sari an nih.

³⁵Dan mihai indona chu a pâwl pâwla ṭhangkhaw thiem mihai chu sîng hni le sâng riet le za ruk.

³⁶Aser mihai, sipai pâwla fe suok thei ṭhieu, indona chu a pâwl pâwla ṭhangkhaw thiem mi sîng li.

³⁷Jordan râl tienga, Reuben mihai, Gad mihai le Manasse hnam zâtvehai, indona hriem tinrêng hmang thiem mihai chu nuoi khat le sîng hni.

³⁸Hieng mi po po, indo thiem mi, indona chu a pâwl pâwla rêl fel thiem mihai hi, Israel po po chunga David chu lala siem dingin Hebrona chun lungril hmunkhat putin an hung tâwl a; chun, Israel laia mi dang hrim hrim khawm chu David chu lala siem ding thua chun lungril hmunkhatin an um a.

³⁹Chun, chutaka chun David rawi chun ni thum sûng chu faa dâwnin an um a; an unauhai chun an ta dingin an lo buotsaipêk si a.

⁴⁰Chu chau naw khawm chu, anni hnai deuhai; Issakar le Zebulun le Naphtali ram chen khawma, sabengtung dâmin, sanghâwngsei dâmin, sabengtung lienchi dâmin, bâwngchal dâmin, bei dâm, fâk ding tinrêng dâm, theichang bei dâm, grêp ra ṭâwl bâwr dâm, uoin dâm, hriek dâm, bâwngchal le berâm chen khawm tamtak an hung chawi a; Israel rama chun nasataka hlimna a um a.