Read Hmar 1 CHANCHIN SUINA 13 Bible Online

1 CHANCHIN SUINA 13 - Hmar bible

1 CHANCHIN SUINA 13

¹David chun sâng chunga hotuhai le za chunga hotuhai le ṭhuoitu tinrênghai chu ân râwnpui a.

²Chuongchun, David chun Israel mi hung inkhâwmhai po po kuoma chun, “Ṭha in ti zâwng a na, LALPA ei Pathien ṭha ti zâwng a ni chun, Israel ram po poa ei unauhai mâksan la umhai kha, an khawpuihai khawper neihaia thiempuhai le Levi mihai umnaa umhai kha, ei kuoma an hung khâwm theina dingin inchâng ei ta,

³ei kuomah ei Pathien bâwm kha hang la nâwk tâng ei tiu; Saula hun lai chena kha ei ngaisak ta dêr naw a ni si a,” a ta.

⁴Chuongchun, mipui pungkhâwmhai po po chun thaw ding an ti ta a; chu thil chu mipui ngaia chun ân dik si a.

⁵Chuongchun, David chun Aigupta vadung Sihora inthawkin Hamath lûtna chena mi chu Kiriath-jearima inthawka Pathien bâwm chu hang la dingin Israel mi po pohai chu a khâwm ta a.

⁶Chuongchun, David le Israel mi po po chu Baala-ah, chu chu Juda rama Kiriath-jearim a nih, Pathien bâwm, cherubhai inkâra LALPA chu chênga a hming an kona hlak chu hang la dingin an hang fe ta a.

⁷Chun, Pathien bâwm chu tawlailîr thar chungah an phur a; Abinadab ina inthawk chun an hung lâk suok a; Uzza le Ahio chun tawlailîr chu an khal a.

⁸Chun, David le Israel mi po pohai chu Pathien hmaa chun, hlahai le, ṭingṭanghai le, perkhuonghai le, khuongtêhai le, dârbenthekhai le tawtawrâwthai mûtin an um a.

⁹Chun, Kidon hrizâwl an hung tlung chun; bâwngchalhai chu an insui leiin bâwm chu chel dingin Uzza chun a kutin a hei ban a.

¹⁰Chuongchun, LALPA lunginsen chu Uzza chunga chun a hung chawk a, bâwm chu a kuta a hei ban lei chun ama chu a sukhlum ta a; chutaka chun Pathien hmaah a thi ta a.

¹¹Chun, Uzza chunga LALPA chun a kut a thlâk lei chun David chu a lungawi naw hle a, chu hmun chu Perez-uzza ân bûk a, tu chen hin ti a nih.

¹²Chun, chu ni chun David chun Pathien chu a ṭi ta a, “Iengtin am ka inah ka kuomah Pathien bâwm hi hung la thei tâng ka ta?” a ta.

¹³Chuongchun, David chun bâwm chu David khuoah ama kuoma chun a sawn ta naw a, amiruokchu, Git mi Obed-edom ina chun a lâk lût lem ta a.

¹⁴Chun, Pathien bâwm chu Obededom sûngkuo lai, a ina chun thla thum lai a um ta a; chuongchun, Pathienin Obed-edom in sûng le a nei po po chu mal a sâwmpêk a.