Read Hmar 1 CHANCHIN SUINA 14 Bible Online

1 CHANCHIN SUINA 14 - Hmar bible

1 CHANCHIN SUINA 14

¹Chun, Tura lal Hiram chun David kuomah mihai a tir a, sidar thing dâm, lung sut mihai dâm, thing rem mihai dâm a in bâwl dingin a tir bawk a.

²David chun LALPAIN ama chu Israelhai chunga lalah a siem a nih ti a hriet a; a ram chu a mi Israelhai leiin insângtaka chawisângin a um ti a hriet a.

³David chun Jerusalema chun nuhmei tamtak a nei a, David chun naupasal le naunuhmei a la nei sa pei a.

⁴Hienghai hi Jerusalema a nei, a nauhai hming chu a nih: Sammua, Sobab, Nathan, Solomon;

⁵Ibhar, Elisua, Elpelet;

⁶Noga, Nepheg, Japhia;

⁷Elisama, Beeliada le Eliphelet.

⁸Chun, Philistin mihai chun David chu Israel po po chunga lal dingin hriek nâl a ni tah ti an hriet chun, Philistin mihai po po chu David zawng ding chun an hang fe a; chun, David khawm chun a lo hrietin, anni chu tuok dingin a suok ta a.

⁹Chuongchun, Philistin mihai chu an hung a, Rephaim ruoma chun an hung inzâr a.

¹⁰David chun Pathien kuomah, “Philistin mihai chu ka hang do ding am a nih? Ka kutah anni chu i mi pêk ding am a nih?” tiin ân dawn a. LALPA chun a kuomah, “Hang fe rawh, anni chu i kutah ka pêk ding a ni si a,” a ta.

¹¹Chuongchun, Baal-perazim chenin an hang fe a; David chun chutaka chun anni chu a hne tâwl a; chun, David chun, “Pathien chun ka hmêlmahai chu ka kutah, tui ting inṭhe ang elin a sukdar tah a ni hi,” a ti a. Chuleiin, chu hmun hminga chun Baal-perazim an inbûk ta a.

¹²Chun, anni chun an pathienhai chu chutaka chun an tlânsan a, David chun thu a pêk a, chuonghai chu meiin an raw ta a.

¹³Philistin mihai chu phaizâwl tieng chun an la hung inzar nâwk ta rawp a.

¹⁴David chun Pathien a rawn nâwk a, Pathien chun a kuomah, “Anni chu hang hnawt naw la, annia inthawkin inherhmang lem la, thingtheihmi kûng zâwna khan anni chu zu hnawt lem rawh.

¹⁵Chun, thingtheihmi lêrhaia chun kalpên rihai i hriet pha chun indo dingin fe suok la; Pathien chu i hmaah Philistin sipaihai chu sukhlum dingin a fe suok tah a ni si a,” a ta.

¹⁶Chun, David chun Pathienin ama thu a pêk ang chun a thaw a; Gibeona inthawk Gezer chen rakin Philistin sipaihai chu a that pei ta a.

¹⁷David chanchin chu ram po poah ân thang ta a; chuongchun, LALPAIN ama ṭina chu hnam po pohai chungah ân umtir ta a.