Read Hmar 1 CHANCHIN SUINA 15 Bible Online

1 CHANCHIN SUINA 15 - Hmar bible

1 CHANCHIN SUINA 15

¹David chun David khawpuia chun inhai a bâwl a; Pathien bâwm ta ding khawm chun hmun a buotsai a; chu ding chun puon in a kei a.

²Chun, David chun, “Tu dang khawm ni lovin, Levi mihai chauin Pathien bâwm chu hang la raw hai se; LALPA chun anni chu Pathien bâwm phur dinga a ruot le ama ta dinga rawngbâwl zing zing dinga a ruot an ni si a,” a ta.

³Chun, David chun Israel mihai po po chu LALPA bâwm chu a hmun dinga a siema chun hang laa sie dingin, Jerusalema chun a khâwm ta a.

⁴David chun Aron thlahai chu a khâwm a. Levi mihai leh;

⁵Kohath naupasalhai chu: a hotu tak Uriel le a unauhai za khat le sâwmhni;

⁶Merari naupasalhai chu: a hotu tak Asaia le a unauhai za hni le sawmhni;

⁷Gerson naupasalhai chu; a hotu tak Joel le a unauhai za khat le sâwmthum;

⁸Elizaphan naupasalhai chu: a hotu tak Semaia le a unauhai za hni;

⁹Hebron naupasalhai chu: a hotu tak Eliel le a unauhai sâwmriet;

¹⁰Uzziel naupasalhai chu: a hotu tak Amminadab le a unauhai za khat le sâwm le pahni:

¹¹Chun, David chun thiempu Zadok hai, Abiathar hai le Levi mihai; Uriel, Asaia le Joel, Semaia, Eliel le Amminadab chu a ko a,

¹²an kuomah, “Levi mihai pahnam laia hotuhai in na, a hmun dinga ka buotsai tah hmuna LALPA Israelhai Pathien bâwm chu in hung lâk theina dingin insukthieng unla, nangni le in unauhai leh.

¹³A hmasa khawm khan nangniin in phur naw leiin LALPA ei Pathien chun a mi lo sukṭhul ta a; thupêk angtaka ei lo thaw naw leiin,” a ta.

¹⁴Chuongchun, thiempuhai le Levi mihai chu LALPA Israelhai Pathien bâwm chu zu la dingin an insukthieng ta a.

¹⁵Chuongchun, Levi mihai chun Pathien bâwm chu LALPA thu ang taka Mosie thupêk angin zâwnfunghaiin an liengkoin an zâwn a.

¹⁶David chun Levi mihai an hotu tak kuoma chun an unauhai chu thilrimawihai, perkhuonghai, ṭingṭanghai, dârbenthekhai le hlim râwla khêk rak rak a, sut dingin hlasaktuhai ruot dingin a hril a.

¹⁷Chuongchun, Levi mihai chu Joel naupa Heman; a unauhai Berekia naupa Asaph le an unau Merari naupasalhai laia mi chu an ruot a, Kusaia naupa Ethan hai dâm;

¹⁸chun, anni laia an unauhai ân hnuoi pâwla chun Zekaria, Benaia, Jaaziel, Semiramoth; Jehiel, Unni, Eliab, Benaia, Maaseia, Mattithia, Eliphelehu, Mikneia hai; chun, Obed-edom le Jeiel, kawtkhâr vêngtuhai chu an ruot bawk a.

¹⁹Chuongchun, hlasaktuhai Heman, Asaph le Ethan, hai hi dâr dârbenthek inringtaka sut dinga ruot an na;

²⁰chun, Zekaria, Aziel, Semira-moth, Jehiel, Unni, Eliab, Maaseia, Benaia hai chu Alamoth bia sut dinga perkhuong pua ruot an na;

²¹chun, Mattithia, Eliphelehu, Mikneia, Obed-edom, Jeiel le Azazia hai hi ṭingṭang Seminith biha per dinga ruot an nih.

²²Chun, Levi mi hotu Kenania chu hla hotu a na; a thiem leiin hla chu a ṭhuoi a.

²³Berekia le Elkana chu bâwm ta dinga kawtkhâr vêngtu an nih.

²⁴Sebania, Josaphat, Nethanel, Amasai, Zekaria, Benaia le Eliezer, thiempuhai chun, Pathien bâwm hmaa chun tawtawrâwthai an mût a; chun, Obed-edom le Jehia chu bâwm vêngtuhai chu an nih.

²⁵Chuongchun, David le Israel upahai le sâng khat chunga hotuhai chu Obed-edom ina inthawka LALPA thuthlungna bâwm chu hlimtaka hung la dingin an fe ta a;

²⁶Chuong Levi mihai LALPA thuthlungna bâwm zâwntuhai chu Pathienin a ṭhangpui lei chun bâwngchal pasari le berâmchal pasariin an inthâwi a.

²⁷David chu puon zai inhmi puonin ân thuom a, Levi mihai po po bâwm zâwntuhai le, hlasaktuhai le, hlasaktuhai hotu Kenania hai le chun chuong ang bawkin an inthuom a; David chun zakawsîng puon zai inhmi chu a hâk bawk a.

²⁸Chuongchun, Israelhai po po chun ri nasatak leh, saki mût rîk leh, tawtawrâwt ri leh, dârbenthek ri leh, ṭingṭang le perkhuonghaia inringtaka sakin LALPA thuthlungna bâwm chu an hung lâk ta a.

²⁹Chun, LALPA thuthlungna bâwm chu David khawpui chu a hung tlung chun, Saula naunu Mikal chu tukvera hin a hei dâk a, lal David chu thil sut a, lâmin a hei hmu tah a; chuongchun, a lungril chun a hmusit hle ta a.