Read Hmar 1 CHANCHIN SUINA 16 Bible Online

1 CHANCHIN SUINA 16 - Hmar bible

1 CHANCHIN SUINA 16

¹Chun, Pathien bâwm chu an hung lâk lût a, Davidin a lo siem puon in lailung laitaka chun an inṭhut ta a; chun, Pathien hmaah pumrawhmang thilinhlânhai le inremna thilinhlânhai an inhlân ta a.

²Chun, David chun pumrawhmang thilinhlân le inremna thilinhlân chu ân hlân hnung chun, LALPA hmingin mipuihai chu mal a sâwm ta a.

³Chun, Israel mihai mi tin el chu a nuhmei a pasalin, bei tlang le sa tlin le grêp ra ṭâwl a pêk seng a.

⁴Chun, Levi mihai mi ṭhenkhat chu LALPA Israelhai Pathien chu inpâka lâwmthu hrila, ama chawimawi dingin LALPA bâwm hmaa rawngbâwl hlak ding chun a ruot a;

⁵a hotu tak chu Asaph a na, ama dawta chun Zekaria, Jaaziel, Semira-moth, Jehiel, Mattithia, Eliab, Benaia, Obed-edom le Jeiel hai; ṭingṭang le perkhuong puhai an nih;

⁶Asaph chu dârbenthek inringtaka sutin; thiempu Benaia le Jahaziel hai chu Pathien thuthlung bâwm hmaa chun tawtawrâwt leh an um zing bawk a.

⁷Chun, chu ni chun David chun Asaph le a unauhai LALPA hmaa lâwmthu chu inhlân dingin a ruot hmasatak a.

⁸Aw, LALPA kuomah lâwmthu hril unla, a hming lam ro; Mi tin lai chun a thil thaw inhriettir ro.

⁹Ama chawimmawiin hla sak unla,ama inpâkin sak ro; A thilmak thaw po po thu hril ro.

¹⁰A hming inthieng chu sawng ro; LALPA zawngtuhai lungril chu hlim raw se.

¹¹LALPA le a hrâtna chu zawng unla, A hmêl chu zawng rawp ro.

¹²A thilmak thawhai chu hre zing ro, A thilmakhai le a baua a rorêl suokhai chu:

¹³Aw, a siehlaw Israelhai, Jakob thla, a ithlanghai.

¹⁴Ama chu LALPA ei Pathien chu a nih, A rorêlhai chu hnuoi chung po poa hin a um.

¹⁵A thuthlung chu kumkhuoin hre zing unla, Suon sâng khat chena a thu lo pêk chu.

¹⁶Abraham kuoma a thuthlung le, Isak kuoma a inkhâmna chu.

¹⁷Chu ma chu thuruot ni dingin Jakob kuomah a sukdet a, Israel kuoma kumkhawtluong thuthlung dingin;

¹⁸“Kanaan ram hi i kuomah pêng ka ti che, I rochanpuol ding chu,” tiin.

¹⁹Mi tlâwmte chau in ni lai khan, Anih, mi tlâwmte chau, chutaka mikhuol in na;

²⁰Hnam tum tum kuomah an fe lawn an fe lawn a, Ram tum tuma inthawkin mi tum tumhai kuomah.

²¹Tu inêksâwr khawm a phal naw a. Anih, anni leiin lalhai khawm a kâwk a;

²²“Ka hriek nâlhai chu tâwk naw unla, Ka zâwlneihai pawi hrim hrim khawm tâwk naw ro,” tiin.

²³Leihnuoia um po pohai, LALPA chawimawiin hla sak ro, Ni tin a sandamna thu chu inhriettir ro.

²⁴Hnam tin lai chun a ropuizie hril unla, Mi tinrênghai lai chun a thilmak thawhai hril ro.

²⁵LALPA chu a ropui a, nasataka inpâk ding a ni si a, Ama chu pathien po po nêka ṭi ding a nih.

²⁶Mipuihai pathienhai chu milimhai an ni si a, LALPA ruok chun vânhai khi a siem a nih.

²⁷Chawimawina le ropuina a hmaah an um a, Hrâtna le hlimna chu a hmun inthiengah an um.

²⁸Mi tina chi tinrênghai, LALPA kuomah pe unla, LALPA kuoma chun ropuina le hrâtna pe ro.

²⁹LALPA kuomah a hming ropui chu pe unla, Thil inhlân ding chawiin, a hmaah hung ro. Aw, inthieng mawina inbelin LALPA chu chibai bûk ro.

³⁰Leihnuoia um po pohai, a hmaa chun inthin ro; Khawvêl khawm hi ân hnîng thei nawna dingin sukdetin a um a.

³¹Vânhai khi lâwmtakin um sienla, hnuoi khawm hi hlimtakin um raw se; Hnam tin lai chun, “LALPA chu lalah a ṭhung a,” ti ro.

³²Tuisuoriet le a sûnga um po po hi inri hum hum sienla, Lo le a sûnga um po po hi lâwmtakin um raw se.

³³Chu pha chun ram hnuoia thing po po hi LALPA hmaah hlimin hla sak an tih, Hnuoi ro rêl dingin a hung ding a ni si a.

³⁴Aw LALPA kuomah lâwmthu hril ro, ama chu a ṭha si a, A zângaina chu kumkhuoin a um zing si a.

³⁵A kuoma chun, “Aw Pathien, nang kan sandamna, mi sandam la, Nangin mi ṭhuoi khâwmin, hnamhai laia inthawk chun mi sanhim la, I hming inthieng kuoma lâwmthu hril ding le, Nangma inpâknaa chawimawi ding in,” ti ro.

³⁶LALPA Israelhai Pathien chu inpâkin um raw se. Chatuona inthawka chatuon chenin. Chun, mipui po po chun, “Amen,” an lo tih a, LALPA an inpâk ta a.

³⁷Chun, ni tina sin ṭûlzie ang peia rawngbâwl zing zing dingin, Asaph le a unauhai chu LALPA thuthlungna bâwm hmaa chun a sie ta a;

³⁸Obed-edom le an unauhai sâwmruk le pariet hai leh; Jeduthun naupa Obed-edom le Hosa chu kawtkhâr vêngtuhai ni dingin;

³⁹chun, thiempu Zadok le a unau thiempuhai chu Gibeon bâwlhmuna chun, LALPA biekbûk hmaa chun an um a,

⁴⁰Israelhai kuoma thu a pêk tah, LALPA dâna in ziek ang po po ang taka zîngtieng le zântieng tina, pumrawhmanga mâichâma pumrawhmang thilinhlân chu LALPA hmaa inhlân dingin;

⁴¹chun, an kuoma chun Heman hai, Jeduthun hai, an hming lama thlanga umhai chu, a zângaina chu kumkhuoin a um zing leia LALPA chu lâwmthu hril dingin an um a;

⁴²anni laia Heman le Jeduthun chu, ân ring zing ding dârbenthek le tawtawrâwt le chun an um a; Pathien hlahai sakna dinga hlasakna thuomhnaw kim le chun, chun, Jeduthun naupasalhai chu dai kawtkhâra um ding an nih.

⁴³Chun, mi po po chu mâni in sengah an ṭîn ta a; David khawm chu a insûng chu mal sâwm dingin a ṭîn ta a.