Read Hmar 1 CHANCHIN SUINA 18 Bible Online

1 CHANCHIN SUINA 18 - Hmar bible

1 CHANCHIN SUINA 18

¹Hi hnunga hin hieng hi a hung ni a, David chun Philistin mihai chu a hne a, anni chu a tukdawl a, Philistin mihai kuta inthawk chun Gath le a vêl khuohai chu a lâk ta a.

²Chun, Moab khawm chu a hung hne a, Moab mihai chu David siehlawhai an hung ni tah a, chuongchun, siehai an hung chawi a.

³Euphrates vadung chena a ram chu indin dinga a fe malamin, Zoba lal Hadarezer chu Mahath chenin David chun a hne bawk a.

⁴David chun amaa inthawk chun sakawr tawlailîr sâng khat le, sakawr chung chuong mi sâng sari le, kea fe mi sîng hni leh a manpêk a, chun, David chun tawlailîr keimi sakawrhai chu, tawlailîr za khata ding chau a hla a, an ke tha a sat vawng a.

⁵Chun, Damaskaa Suria mihai chu Zoba lal Hadarezer ṭhangpui dinga an hung chun David chun Suria mi sîng hni le sâng hni chu a that a.

⁶Chun, David chun Damaskaa Suriaa chun sipai pâwl a sie a, chuongchun, Suria mihai chu David siehlawhai an hung ni ta a, chuongchun, sie dâm an hung chawi a. Chun, LALPA chun a fena tieng tieng David chu hnena a pêk pei a.

⁷Chun, David chun Hadarezer siehlawhai iphur rângkachak phawhai chu a lâk a, Jerusalemah a hung lâk a.

⁸Chun, Hadarezer khawpui Tibhath le Kun-a inthawkin David chun dârsen tamtak el a lâk bawk a; chuonghai chu Solomon khan dârsen bûr le bêlhai le, inṭhutnahai le, dârsen châwtawl kha a siem a nih.

⁹Chun, Hamath lal Tou chun Davidin Zoba lal Hadarezer a hne ti a hriet chun,

¹⁰Hadarezer chu a do a, a hne ta lei chun, ama chu malsâwma chibai bûk dingin, a naupa Hadoram chu lal David kuoma chun a tir ta a; Hadarezer chu Tou le chun an lo indo rawp hlak ta a; chun, ama chun dârsen le tangkaruo le rângkachak bûr le bêl chi tinrêng elhai chu ama chu a thawn a.

¹¹Hieng po pohai, tangkaruo le rângkachak hnam tamtakhaia inthawka a lâkhai chu David chun LALPA kuomah ân hlân a; Edoma inthawk dâm, Moaba inthawk dâm, Ammona inthawk dâm, Philistina inthawk dâm, Amalek mihaia inthawk dâmin a lâk a nih.

¹²Chu naw khawm chu Zeruia naupa Abisai chun Edom mi sîng le sâng riet chu Chi Ruoma chun a hne a.

¹³Chun, Edoma chun sipai pâwl a sie a, chuongchun, Edom mihai po po chu David khuo le tui an hung ni ta a. Chun, LALPA chun a fena taphawtah David chu hnena a pêk pei a.

¹⁴Chun, David chun Israelhai po po chunga chun ro a rêl a; a mi po pohai chungah indiktak le feltakin ro a rêl a.

¹⁵Zeruia naupa Joab chu sipai hotu a na; Ahilud naupa Jehosaphat chu thil inchiktu a na.

¹⁶Ahitub naupa Zadok le, Abiathar naupa Abimelek[5] chu thiempu an na; Savsa chu lekhaziektu a nih;

¹⁷Jehoiada naupa Benaia chu Kereth le Peleth mihai chunga hotu a nih; chun, David naupasalhai chu lal tienga hotu an nih.