Read Hmar 1 CHANCHIN SUINA 19 Bible Online

1 CHANCHIN SUINA 19 - Hmar bible

1 CHANCHIN SUINA 19

¹Hi hnunga hin hieng hi a hung na; Ammon mihai lal Nahas chu a thi a, ama aia chun a naupa chun ro a rêl ta a.

²Chun, David chun, “A pa khan ka chungah lunginsietna ân entir leiin, Nahas naupa Hanun chunga hin lunginsietna inentir vêng ka tih,” a ta. Chuongchun, a pa chungthua chun, ama thlamuon dingin David chun mi a tir a. David siehlawhai chu ama thlamuon dingin Hanun kuoma chun Ammon mihai rama chun an hung ta a.

³Amiruokchu, Ammon mihai laia an hotuhai chun Hanun kuoma chun, “David chun i pa chu ân za leiin i kuomah thlamuontuhai a hung tir ni dingin i ring am a nih? Hieng a siehlawhai hi thil zawng suok ding le, hre ding le ram chu enthlit dinga i kuoma hung an ni lem a ni naw maw?” an ta.

⁴Chuongchun, Hanun chun David siehlawhai chu a man a, an hmul a vâwpêk a, an silfênhai chu a laiah, a mawng tlung rakin a thlêrpêk a, anni chu a tir hmang ta a.

⁵Chun, mi tu amanih David kuoma chun a va fe a, mihai an lo sawisak dân chu a va hril ta a. Ama chun anni chu tuok dingin mi a tir a; mihai chu nasatakin an inzak si a. Chun, lal chun, “In khâkhmulhai ân ṭhang sei hmakhat chu Jerikoah um phawt el ro, chun, hung chau ro,” a ti a.

⁶Chun, Ammon mihai chu David ta dingin theidaumin an insiem tah ti an hriet phing chun Hanun le Ammon mihai chun, Zobaa inthawk dâm, Aram-maakaa inthawk dâm, Mesopotamiaa inthawk dâma sakawr puhai le sakawr tawlailîrhai hawna dingin tangkaruo talent sâng khat an thawn ta a.

⁷Chuongchun, sakawr tawlailîr sîng thum le sâng hni chu, Maaka lal le a mihai le chun an ruoi ta a; anni chu an hung a, Medeba phâk hmaa chun an inkul ta a. Chuongchun, Ammon mihai chu an khawpuihaia inthawk chun an hung pungkhâwm a, indo dingin an suok ta a.

⁸Davidin chu chu a hriet chun, Joab le mi thilthawthei sipai pâwl po po chu a tir ta a.

⁹Chun, Ammon mihai chu an hung suok a, khawpui dai kawtkhâra chun an intlar a; chun, lalhai a hung ṭhangvehai khawm chu an khâtin phûla chun an um a.

¹⁰Joab chun indona chu hnungtieng le hmatienga chun an hung nawr a nih ti a hmu chun, Israel laia mi ditumhai chu a thlangsuok a, Suria mihai hmaa chun ân tlartir ta a.

¹¹Mi dang po po chu a unaupa Abisai kuta chun ân kawltir a, Ammon thlahai epa chun an intlar ve ta a.

¹²Ama chun, “Suria mihai chu ka ta dinga an hung hrât talaw chun, mi ṭhangpui i ta; chun, Ammon mihai chu nanga ta dinga an hung hrât talaw bawk chun, keiin ṭhangpui thung ka ti che a.

¹³Insukhuoi unla, ei hnam le ei Pathien khawpuihai sanin insukpasal ei tiu: chun, Pathien chun ṭha a ti ang peiin thaw raw se,”a ta.

¹⁴Chuongchun, Joab le a kuoma mi umhai chun Suria mihai chu indo dingin an va hnai ta a; chuongchun, ama hmaa chun an tlânse ta a.

¹⁵Chun, Ammon mihai chun Suria mihai chu an tlânsie ti an hriet phing chun, anni khawm chuong ang bawk chun a unaupa Abisai hmaa inthawk chun an tlânse ve ta a, khawpuia chun an lût ta a, Joab ruok chu Jerusalema chun a kîr nâwk ta a.

¹⁶Chun, Suria mihaiin Israelhai hmaa chun se nâwk zuol an ni tah ti an hriet chun mi an tir a, Vadungpui râla Suria mi umhai chu, Hadarezer sipaihai hotu Sophak rawiin an incha suok ta a.

¹⁷Chu chu David kuoma chun an hril a; chun, ama chun Israel mihai po po chu a kei khâwm a, Jordan râl an hung kai a, anni chu an hmu a, thaw dingin an inzar ta a.

¹⁸Chun, Israelhai hmaa chun Suria mihai chu an tlânsie a; chuongchun, David chun sakawr tawlailîr sîng sari puhai le, kea fe mi sîng li Suria mi chu a that ta a; chun, Sophak sipaihotu khawm chu a that ta a.

¹⁹Chun, Hadarezer siehlawhaiin Israelhai hmaa chun an chan a se nâwk zuol an tah ti an hriet chun David le chun inremna an siem a, ama rawng chu an bâwl ta a; Suria mihai khawm chun Ammon mihai chu an ṭhangpui ngai ta hrim hrim naw a.