Read Hmar 1 CHANCHIN SUINA 20 Bible Online

1 CHANCHIN SUINA 20 - Hmar bible

1 CHANCHIN SUINA 20

¹Chun, kum a hung invawi a, lalhai chu indonaa an fe hlakna huna chun, Joab chun sipai thilthawtheina chu hmangin Ammon mihai ram chu a suksiet a, a hung a, Rabba khawm chu a hung inhuol ta a. Amiruokchu, David chu Jerusalema khan a um a, Joab chun Rabba chu a hung rûn a, a hne ta a.

²David chun an lal lua inthawk chun lallukhum chu a lâk a, rângkachak talent tluka rik a nih, lunghluhai khawm a um bawk a; chu chu David lu chunga chun inkhumtir a ni ta a, khawpuia râllâk sumhai chu a hung lâk suok a, tam tak el a nih.

³Chutaka um mihai chu a hung ṭhuoi suok a, hreipui le thîr kuoikimhai le thing âtnahaiin anni chu sin ân thawtir tâwl a. Chuong ang seng chun David chun Ammon mihai khawpui po poa chun a thaw a. Chun, David le a mihai po po chu Jerusalema chun an kîr nâwk ta a.

⁴Chun, hi hnunga hin Philistin mihai leh Gezerah indona a suok ta a; chun, Husath mi Sibbekai chun Rapha naupa Sippai chu a that a, anni chu an dawl ta a.

⁵Chu hnunga chun Philistin mihai ma leh indona a um nâwk a; Git mi Goliath unaupa Lahmi chu Jair naupa Elhanan chun a that a; chu mipa feiṭhut chu puonkhâwngtu puonkawl ang a nih.

⁶Chun, Gath-a chun indona a um nâwk a, chutaka chun mi lientak el hi a um a, a kepâr le kutpârhai chu sâwmhni le pali a na; kut pakhatah kutpâr paruk pei le, ke pakhatah kepâr paruk pei; ama khawm chu mi lien chia pieng hrim a nih.

⁷Chun, ama chun Israel mihai a hung hrawk lai chun David unaupa Simea naupa Jonathan chun ama a that a.

⁸Hienghai hi Gath khuoa mi lien hrima pienghai chu an nih; anni chu David le a siehlawhai kuta chun an lo tlu ta a.