Read Hmar 1 CHANCHIN SUINA 21 Bible Online

1 CHANCHIN SUINA 21 - Hmar bible

1 CHANCHIN SUINA 21

¹Setan chu Israel mihai chunga chun a hung tho a, David chu Israel mihai chu ân tiemtir ta a.

²David chun Joab le mipuihai hotuhai kuoma chun, “Fe unla, Beer-sebaa inthawka Dan chenin Israelhai chu hung tiem unla, an ni zât ka hriet theina dingin thu mi hung intlun ro,” a ta.

³Joab chun, “LALPA chun a mihai chu an ni hlak zât let za khawma sukpung sienla, ka pu lal, ka pu siehlawhai an ni vawng tho a ni naw am a nih? Iengdingin am ka pu hin hieng ang thil hi a hriet nuom a ni leh? Israel ta dingin iengdingin am rîtlona bul hung ni el a ta?” a ta.

⁴Nisienlakhawm, lal thu chun Joab chu a hne ta a. Chuongchun, Joab chu a fe suok a, Israel ram po po chu a fang suok a, Jerusalemah a hung nâwk a.

⁵Chun, Joab chun mipuihai tiemna nizât chu David kuomah a pêk ta a. Chuongchun, Israel rama mi chu kâwlhnâm chawi thei ṭhieu mi maktaduoi khat le nuoi khat an na; Judaa chun kâwlhnâm chawi thei ṭhieu chu mi nuoi li le sîng sari an nih.

⁶Nisienlakhawm, Benjamin chi le Levi mihai chu anni lai chun a tiem sa ve naw a; Joab ngaia chun lal thu chu theida a um vieu si leiin.

⁷Chun, hi thila hin Pathien chu a lâwm ta naw hle el a; chuleiin, Israel ram chu a hung hrem ta a.

⁸Chun, David chun Pathien kuomah, “Hi thil ka lo thaw taa hin, nasatakin thil ka suksuol a nih; amiruokchu, tuhin ka ngên che, i siehlaw khawhlona hi ngaidam rawh; invêt thlâktakin ka lo thaw ta si a,” a ta.

⁹Chun, LALPA chun David zâwlnei Gad kuoma chun, “Fe la, David kuoma chun hieng hin va hril rawh.

¹⁰LALPA chun hieng hin a tih: ‘Thil pathum ka ruotpêk che a, hi laia pakhat hi thlang rawh, i ta dinga ka thawpêk theina ding chein,’ tiin,” a ta.

¹¹Chuongchun, Gad chu David kuoma chun a fe a, a kuoma chun, “LALPA chun hieng hin a tih; i dittak thlang rawh;

¹²kum thum sûng ṭâm amanih; i hmêlmahai kâwlhnâmin a hnawt phâk pha che a, ihmêlmahai hmaa thla thum sûng sukbohmanga um amanih; annawleh, Israel ram sûng po poa LALPA vântirkoin hung sukse a, ram sûnga hri hung inlêng a, LALPA kâwlhnâm chu ni thum sûng tuor chu. Tuhin ngaituo la, ieng dawnna am a mi tirtu kuoma chun kân kîr nâwk ding a na,” a ta.

¹³Chun, David chun Gad kuoma chun, “Nasatakin ka lunginzîng a,LALPA kutah a tlûkin tlulût phawt el ka tih; a zângaina chu a nasa si a, chuleiin, mihriem kuta chun mîn tlûktir êm naw nih,”a ta.

¹⁴Chuongchun, LALPA chun Israel chunga chun hri a tir ta a, Israel mihai chu sîng sari an thi a.

¹⁵Chun, Pathien chun sukse dingin Jerusalema chun vântirko a tir a; chuonga a suksiet ding lai tak chun LALPA chun a hmu a, thil ṭha naw thaw a tum chu ân kîr a; chuongchun, a suksetu ding vântirko kuoma chun, “A hun tah, i kut tuhin chel hri rawh,” a ta. Chun, vântirko chu Jebus mi Ornan hrizâwla chun a ngîr ta zing a.

¹⁶Chun, David chu a hung dâk suok a, LALPA vântirko hnuoi le vân kâra ngîr chu a hang hmu ta a; a kâwlhnâm phawi sain, Jerusalem tienga bân pharin a hmu a. Chun, David le upahai chu saiip puon an sil a, an hmaia hnuoi sikin an bawk tâwl ta a.

¹⁷Chun, David chun Pathien kuoma chun, “Mipuihai chu tiem dinga thu pe kha kei ka ni naw am a nih? Khawhlotaka thaw a, lo suksuol ta kha kei ngei ka nih; amiruokchu, hieng berâm ruolhai hin ieng am an thaw a? Aw LALPA ka Pathien, ka hni che, i kut chu ka chunga le ka thlatuhai sûngkaw chunga hin tla sienla; i mihai chungah ni lovin, hri tuora an um nawna dingin,” a ta.

¹⁸Chun, LALPA vântirko chun, Jebus mi Ornan[6] hrizâwla chun LALPA ta dinga maichâm hang bâwl dingin David chu fe dingin, David kuoma hril dingin Gad chu thu a pêk ta a.

¹⁹Chun, Gad hril ang chun, LALPA hminga a hril ang ngei chun David chu a hang fe ta a.

²⁰Chun, Ornan chu a hei ngha kîr chun vântirko chu a hmu a, a naupasalhai pali ama le umhai ruok chu an inbi a. Ornan chun bu[7] a chîl lai a na.

²¹Chun, David chun Ornan a hung pan chun Ornan chun a hei en a, David chu a hmu a, hrizâwla inthawk chu a hung suok a, a hmaia hnuoi sikin David hmaa chun a kûn ta a.

²²Chun, David chun Ornan kuoma chun, “LALPA ta dinga maichâm ka siem theina dingin hi hrizâwl hmun hi mi pe rawh; a man huntâwk zet angin mi pêng i ta; mipuihaia inthawka hri ân kieng theina dingin,” a ta.

²³Chun, Ornan chun David kuomah, “Nangmân la el rawh, ka pu lal hin a ngai a ṭha a ti ang peiin thaw el raw se; en ta, hi bâwngchal pumrawhmang thilinhlâna dingin ka pêk che a, bu vuokna thuomhnawhai hi a thing dingin, chun, bu hi bu thilinhlân dingin; a rêngin ka pêk vawng che a nih,” a ta.

²⁴Chun, lal David chun Ornan kuoma chun, “Ni lo e a, a man kim chie ang takin kân châwk ding annâwm; nangma ta chu LALPA ta dingin ka lâkpêk ding che a ni naw a, chun, pumrawhmang thilinhlân khawm chu man bo chun kân hlân ding a ni nawh,” a ta.

²⁵Chuongchun, David chun Ornan kuoma chun rângkachak a bûk a, shekel za ruk a hmun man ding chun a pêk ta a.

²⁶Chun, Davidin chutaka chun maichâm chu LALPA ta dingin a siem a, pumrawhmang thilinhlân le, inremna thilinhlân chu ân hlân a, LALPA chu a ko ta a; chun, ama chun vâna inthawk chun pumrawhmangna maichâm chungah meiin a zuk dawn ta a.

²⁷Chun, LALPA chun vântirko chu thu a pêk a; a kâwlhnâm chu a bâwma chun a khum nâwk ta a.

²⁸Chu huna chun, Jebus mi Ornan hrizâwla chun LALPA chun a zuk dawn ti a hmu phing chun chutaka chun ân thâwi ta a.

²⁹LALPA biekbûk thlalêra Mosiein a siem le, pumrawhmang thilinhlânna mâichâm chu, chu huna chun Gibeona bâwlhmuna chun a la um zing si a.

³⁰Nisienlakhawm, chu hmaa chun Pathien rawn dingin David chu a fe thei naw a,LALPA vântirko kâwlhnâm lei chun a ṭi tlat si a.