Read Hmar 1 CHANCHIN SUINA 22 Bible Online

1 CHANCHIN SUINA 22 - Hmar bible

1 CHANCHIN SUINA 22

¹David chun, “Hi hi LALPA Pathien in a na, hi hi Israel ta dinga pumrawhmang thilinhlânna mâichâm chu a nih,” a ta.

²David chun Israel rama mikhuol umhai chu kei khâwm dingin thu a pêk a; Pathien in bâwlna dinga lung sut dingin lung suttuhai a ruot a.

³David chun ân huonna kawtkhâra ding le a zawmna vêlhaia dingin thîr tamtak a kilna dingin a buotsai a; dârsen chi tamtak el a bûk hriet lo,

⁴Sidar thing a nizât hriet lo; Zidon mihai le Tura mihai khan David kuomah Sidar thing an hung lâk ṭeu si a.

⁵Chun, David chun, “Ka naupa Solomon hi a naupangin iengkhawm a hriet si naw a, LALPA ta dinga in bâwl ding hi ropuitak a ni ding a na, ram po poa ropuitak le hming inthang tak el ding a ni si a; chuleiin, keiin buotsai ka tih,” a ta. Chuongchun, David chun a thi hma ngei chun nasatakin a buotsai ta a.

⁶Chun, a naupa Solomon chu a ko a; Israelhai Pathien, LALPA ta dinga in bâwl dingin thu a pêk ta a.

⁷David chun Solomon kuomah, “Ka naupa, keia ta ding chun ka Pathien LALPA hming ta dinga in bâwl chu ka lungrilah a um a.

⁸Nisienlakhawm, LALPA thu chu ka kuomah a hung tlung a, ‘Nang chun thisen tamtak în suo ta a, indona ropuitakhaia khawm i ṭhang ta a; ka mithmua hnuoi chunga thisen tamtak în suo ta leiin ka hming ta dingin in bâwl naw ti ni,

⁹Ngai ta, naupasal hung nei i ta, ama chu mi sâwldamtak nîng a tih, a vêlin, a hmêlmahaia inthawk khawmin ama chu râlmuongna pêng ka ta, a hming khawm Solomon nîng a ta, ama hun laia chun Israel rama hin muongna le râlmuongna pêng ka tih;

¹⁰keia hming ta dingin in bâwl a ta, ama chu ka naupa nîng a ta, kei ama pa ni bawk ka tih; chun, a ram lalṭhungpha chu Israel chungah kumkhawtluongin sukdet ka tih,’ tiin.

¹¹Tuhin, ka naupa, LALPA chu i kuomah um a ta, inhlâwtlingtir a ti che a, nangma chungthua a hril ta angin, i Pathien LALPA in chu bâwl la.

¹²LALPA chun hrietthiem theina le thlierthiem theina pe sienla che; Israel chunga thuneina pe raw se che; chuongchun, LALPA i Pathien dân chu i kawl zing theina dingin,

¹³Israel chungthua LALPAIN Mosie thu a pêk, rorêlna hai le dânhai chu thaw dinga i zâwm tlat chun hung hlawtling i tih; insukhrât la, insukhuoi la, beidawng naw la, ṭit khawm ṭi naw rawh.

¹⁴Tuhin ngai ta, ka theitâwk hu ang peiin, LALPA in ta ding chun rângkachak talent nuoi khat, tangkaruo talent maktaduoi khat, dârsen le thîr chu a bûk zât hriet lo ka buotsai ta a; chu ding chun, lung le thing khawm a tam tâwkin ka buotsai tah a nih; chu chu sunzawm thei i ta.

¹⁵Chunawa khawm, i kuomah sinthawtuhai tam tâwk tak, lung suttuhai, a âttuhai, thing thaw mi, sin tinrênga themthiem mihai;

¹⁶rângkachak le, tangkaruo le, thîr le dârsena themthiemhai, nizât hriet sêng lo rau an na; tho la, thaw el rawh, LALPA chu i kuomah um a tih,” tiin.

¹⁷David chun Israel hotuhai po po chu a naupa Solomon chu ṭhangpui dingin thu a pêk bawk a;

¹⁸“LALPA in Pathien chu in kuomah a um a ni naw am a nih? Kil tin ela chun muongna a pêk cheu a ni naw am a nih? A ram hluotuhai chu ka kutah a hung pêk tâwl ta si a; chun, a ram khawm chu LALPA le a mihai hmaa chun an intuklût ta si a.

¹⁹Tuhin, LALPA in Pathien chu zawng dingin in lungril le in lungvar chu ama tieng ngha unla, tho unla, chuongchun, LALPA Pathien hmun inthieng; LALPA thuthlungna bâwm le, Pathien bûr le bêl inthienghai chu hung lâkna dingin, LALPA hmingin in bâwl ro,” tiin.