Read Hmar 1 CHANCHIN SUINA 23 Bible Online

1 CHANCHIN SUINA 23 - Hmar bible

1 CHANCHIN SUINA 23

¹David chu a hung tar ta a, a hung upa ta hle a, a naupa Solomon chu Israel chunga lal dingin a siem ta a.

²Chun, Israel upahai po po le thiempuhai le Levi mihai chu a ko khâwm vawng a.

³Levi mihai chu kum sâwmthum chung tienga po chu tiem an na; an tiem dânbi ang chun an nizât chu, patling sîng thum le sâng riet an nih.

⁴Hi laia mi sîng hni le za li hin LALPA in sin chu an enkawl ding a na;

⁵chun, sâng ruk dang chu hotuhai le rorêltuhai an nih; sâng li chu kawtkhâr vêngtuhai an na; sâng li dang chun, “Inpâkna dinga ka siem,” Davidin a ti, chuong thuomhnawhai le chun LALPA chu inpâk ding an nih.

⁶David chun anni chu a pâwl peiin, Levi naupasalhai ang peiin a ṭhe a; Gerson le Kohath le Merari hai hi.

⁷Gerson mia chun Ladan le Simei an na.

⁸Ladan naupasalhai chu: Jehiel chu a hotu tak le, Zetham le Joel, hi pathum hi.

⁹Simei naupasalhai chu: Selo-moth, Haziel le Haran, hi pathum hi. Hienghai hi Ladan sûngkuo pahnam luhai chu an nih.

¹⁰Chun, Simei naupasalhai chu: Jahath, Zina, Jeus le Beria an nih. Hieng palihai hi Simei naupasalhai an nih.

¹¹Chun, Jahath chu a hotu tak a na, Ziza chu a pahnina; amiruokchu, Jeus le Beria chun naupasal tamtak an nei naw a; chuleiin, tiem dânah thlâ khat an nih.

¹²Kohath naupasalhai chu: Amram, Izhar, Hebron le Uzziel, hi pali hi.

¹³Amram naupasalhai chu: Aron le Mosie; chu, Aron le a naupasalhai chu ama le a nauhai chun thil inthienghai chu hlânthieng a, kumkhuoa LALPA hmaa riminhnik raw ding le, ama rawngbâwl ding le, ama hminga malsâwm kumkhuo dinga suktum an nih.

¹⁴Nisienlakhawm, Pathien mi Mosie chu, a naupasalhai chu Levi hnam laia lam sa a na.

¹⁵Mosie naupasalhai chu: Gerson le Eliezer an nih.

¹⁶Gerson naupasalhai chu: Sebuel chu a hotu tak a nih.

¹⁷Eliezer naupasalhai chu: Rehabia chu a hotu tak a nih. Eliezer chun naupasal dang a nei naw a; amiruokchu, Rehabia naupasalhai chu an tam hle.

¹⁸Izhar naupasalhai chu: Selomith chu a upa tak a nih.

¹⁹Hebron naupasalhai chu: Jeria a hotu tak a na, a pahnina chu Amaria, a pathumna chu Jahaziel, a palina chu Jekameam.

²⁰Uzziel naupasalhai chu: Mika chu a upa tak a na, a pahnina chu Issia.

²¹Merari naupasalhai chu: Mahli le Musi. Mahli naupasalhai chu: Eleazar le Kis.

²²Chun, Eleazar chu a thi a, naupasal a nei nawh, naunuhmei chau a nei; chun, an unaupahai, Kis naupasalhai chun anni chu nuhmeiah an nei tâwl a.

²³Musi naupasalhai chu: Mahli leh, Eder leh, Jeremoth leh, pathum.

²⁴Hienghai hi an pahnam anga Levi naupasalhai chu an nih, tiemna laia an pahnamhai luhai chu an na, LALPA ina rawngbâwlnaa sinthawtuhai, tiem an ni dânbi anga hming suota nizât, kum sâwmhnia inthawka chungtieng an nih.

²⁵David chun, “LALPA Israelhai Pathien chun a mihai chu muongna a pêk a;

²⁶chun, Levi mihai khawm chun a biekbûk le chutaka a rawngbâwlna bûr le bêlhai po po chu an zâwn a ṭûl bawk ta naw a,” a ti si a.

²⁷David thu nuhnung tak angin, Levi thlahai chu, kum sâwmhni le a chungtienga po chu tiem an na.

²⁸An sinthaw chu Pathien ina rawngbâwlna sinhai: thil inthieng po pohai sukthieng dâm, pindanahai le inhuonna tuol sûnga LALPA Ina rawngbâwlnaa chun Aron naupasalhai chu an ṭhangpui ding a ni si a;

²⁹entirna bei ta ding dâm, bu thilinhlân dinga beiphit inditaka ding, chawl ṭhanglo bei amanih, bêl dara zêu amanih, a suonga suong amanih, ieng anga lien le ieng ang tiet ding khawmin;

³⁰zîng tina Pathien inpâk dinga ngîr dingin, chuong ang bawkin zântieng khawm;

³¹châwlnihai dâm, thlatharhai dâm, ruoiṭhena bi ruotahai dâma LALPA hmaa chuong chungthua thaw rawp a ni ding dân ang peia LALPA kuoma pumrawhmang thilinhlân chu inhlân ding dâmin;

³²chun, LALPA ina rawngbâwlna dinga, an unau Aron thlahai sin kawl le, hmun inthieng enkawlna sin le, intuokna in enkawlna sin chu an kawl ding a nih;