Read Hmar 1 CHANCHIN SUINA 24 Bible Online

1 CHANCHIN SUINA 24 - Hmar bible

1 CHANCHIN SUINA 24

¹Aron naupasalhai pâwlhai chu hieng hi a nih: Aron naupasalhai chu: Nadab, Abihu, Eleazar le Ithamar an nih.

²Amiruokchu, Nadab le Abihu chu an pa nêkin an thi hmasa a, nau an nei naw a; chuongchun, Eleazar le Ithamar chun thiempu sin chu an thaw ta a.

³Chun, David chun an rawngbâwlnaa an sinthaw ang peiin, Zadok, Eleazar nauhai le, Ahimelek, Ithamar nauhai chu a ṭhe a.

⁴Ithamar naupasalhai laia nêk chun Eleazar naupasalhai laia chun hotu tam lem hmu a na; chuong ang chun ṭhe an na; Eleazar naupasalhai pahnam luhai chu sâwm le paruk an na, Ithamar naupasalhai chu an pahnam ang peiin pariet an nih.

⁵Chun, ṭhumvâwra ṭhe an na, chi dân dang dangin, Ithamar naupasalhai le Eleazar naupasalhai laia chun Pathien in hotuhai le hmun inthienga hotuhai chu an um ve ve si a.

⁶Chun, Nethanel naupa ziektu Semaia chun lal le, rorêltuhai le, thiempu Zadok le, Abiathar naupa Ahimelek le, Levi mihai le thiempu chihai pahnam luhai hmaa chun a ziek a; Eleazar ta dingin pahnam khat chan chu a tlu a; Ithamar ta dingin pahnam khat chan chu a tlu bawk a.

⁷Chun, âna pakhatna chu Jehoiarib chungah a tlah a, a pahnina Jedaia chungah,

⁸a pathumna Harim chungah, a palina Seorim chungah;

⁹a pangana Malkija chungah, a parukna Mijamin chungah,

¹⁰a pasarina Hakkoz chungah, a parietna Abija chungah,

¹¹a pakuona Jeshua chungah, a sâwmna Sekania chungah;

¹²A sâwmpakhatna Eliasib chungah, a sâwmpahnina Jakim chungah.

¹³A sâwmpathumna Huppa chungah, a sâwmpalina Jesebeab chungah,

¹⁴A sâwmpangana Bilga chungah a sâwmparukna Immer chungah;

¹⁵A sâwmpasarina Hezir chungah, a sâwmparietna Happizzez chungah.

¹⁶A sâwmpakuona Pethahia chungah, a sâwmhnina Jehezekel chungah,

¹⁷a sâwmhni pakhatna Jakin chungah, a sâwmhni pahnina Gamul chungah;

¹⁸A sâwmhni pathumna Delaia chungah, a sâwmhni palina Maazia chungah,

¹⁹LALPA Israelhai Pathienin ama thu a pêk anga, an thlatu Aron hmanga dân a pêk ang taka, LALPA ina rawngbâwl dinga an hung dân dinga, an rawngbâwlnaa an indawt dân chu a nih.

²⁰Chun, Levi naupasal danghai chungthua chu: Amram naupasalhai laiah Subael, Subael naupasalhai laiah Jedeia,

²¹Rehabia thlaah: Rehabia naupasalhai laiah Issia a hotu.

²²Izhar mia chun Selomoth; Selomoth naupasalhai laia chun Jahath.

²³Chun, Hebron naupasalhaia chun: a hotu tak Jeria, a pahnina chu Amaria, a pathumna chu Jahaziel, a palina chu Jekameam.

²⁴Uzziel naupasalhaia chun Mika; Mika naupasalhaia chun Samir.

²⁵Mika unaupa chu Issia; Issia naupasalhaia chun Zekaria.

²⁶Merari naupasalhai chu Mahli le Musi; Jaazia naupasalhaia chun Beno;

²⁷Merari naupasala Jaazia naupasalhai chu: Beno, Soham, Zakkur le Ibri.

²⁸Mahli naupasal chu: Eleazar, naupasal hrim neilo chu.

²⁹Kis naupasal chu: Jerahmeel.

³⁰Chun, Musi naupasalhai chu: Mahli, Eder le Jerimoth. An pahnam ang peia Levi naupasalhai laia lusahai chu hienghai hi an nih.

³¹Hieng hai khawm hin an unau Aron naupasalhai ang bawkin, lal David, Zadok, Ahimelek, Levi mihai le thiempu pahnam luhai hmaah, an unau naupang lemhai le thlatuhai khawm inthuruolin ṭhum chu vâwr a ni ve a.